ހުސްވެފައިވާ ސީއީއޯގެ މަގާމަށް މީހަކު ހޯދުން ލަސްވަނީ އިދާރީ އޮނިގަނޑު ރިވިއު ކުރާތީ ކަމަށް ނޭޝަނަލް ޑްރަގް އެޖެންސީ (އެންޑީއޭ) އިން މިއަދު ބުނެފި އެވެ.
އެންޑީއޭގެ ސީއީއޯގެ މަގާމުގައި ހުންނެވި މުހައްމަދު ހަބީބު ވަނީ މިދިޔަ މެއި، 16 ވަނަ ދުވަހު މަގާމުން ވަކިކޮށްފަ އެވެ. އޭގެ ފަހުން ތިން މަހަށް ވުރެ ގިނަ ދުވަސްވީއިރު ވެސް އެ މަގާމަށް މީހަކު ހޯދަން އިއުލާނެއް ނުކުރެ އެވެ. އޭނާ ވަކިކުރީ ޕްރޮބޭޝަންގެ މުއްދަތުގައި ކުރެއްވި މަސައްކަތުގެ އިވެލުއޭޝަނުން ރަނގަޅު ނަތީޖާއެއް ނެރެދެވިފައިނުވާ ކަމަށްބުނެ އެވެ.
ސީއީއޯއެއް ހަމަޖެހެންދެން އެ އެޖެންސީގެ ހިންގުން ވަގުތީ ގޮތުން ހަވާލުކޮށްފައިވަނީ އެންޑީއޭގެ ޒިންމާދުވެރިޔާ އައިޝަތު ވަހީދާއާ އެވެ.
އެކަމާ ގުޅިގެން އެ އެޖެންސީގެ މީޑިއާ އޮފިޝަލަކު ވިދާޅުވީ، ހިންގުން ހަރުދަނާކުރުމަށް އެންޑީއޭގެ އިދާރީ އޮނިގަނޑަށް ބަދަލު ގެނައުމުގެ މަސައްކަތް ކުރަމުން އަންނަ ކަމަށެވެ. ސީއީއޯގެ މަގާމަށް އިއުލާނުކުރުން ލަސްވެފައިވަނީ އެ ސަބަބާ ހެދި ކަމަށް އޭނާ ވިދާޅުވި އެވެ.
ހާލަތު ގޯސްވެފައިވާ އެންޑީއޭގެ ކަންކަން ރަނގަޅުކުރުމަށް އެ އެޖެންސީ ވަނީ ޖެންޑާ މިނިސްޓްރީގެ ދަށުން ހެލްތު މިނިސްޓްރީގެ ދަށަށް ވެސް މިދިޔަ މެއި މަހު ބަދަލުކޮށްފަ އެވެ. އޭގެ ފަހުން އެ ތަނުގެ ބޯޑަށް ބަދަލުތައް ގެނެސްފައި ވެ އެވެ.
މަސްތުވާތަކެތި ބޭނުންކުރާ މީހުންނަށް ފަރުވާދީ މުޖުތަމައަށް ނެރުމުގެ މަސައްކަތްތައް ހަވާލުކޮށްފައިވާ އެންޑީއޭ އަށް އެންމެ ފަހުން ސީއީއޯއެއް ވެސް އައްޔަންކުރީ، ކުރިން އެ މަގާމުގައި ހުންނެވި ހަސަން ޝަހީލް އިސްތިއުފާ ދެއްވިތާ ހަތަރު މަސް ފަހުންނެވެ.
މަސްތުވާތަކެތީގެ ގާނޫނުގައިވާ ގޮތުން އެންޑީއޭ ބޯޑުގެ މަސައްކަތަކީ އެކި ކަންކަމުގައި ލަފަ އާއި އިރުޝާދު ދިނުމެވެ. އެ ކަންކަމަށް ރިއާޔަތްކޮށް ތަން ހިންގުމުގައި އިސްކޮށް ހަރަކާތްތެރިިވާނީ ސީއީއޯ އެވެ.