އުނގަނޑަށް ތަދުވާތީ ކޯޓުގައި ގިނަ ވަގުތު ހޭދަކުރައްވަން ދަތި ކަމަށް ވިދާޅުވެ، އަޑުއެހުންތައް ލުއި ގޮތަކަށް ތާވަލްކޮށްދިނުމަށް ކުރީގެ ރައީސް އަބްދުﷲ ޔާމީން މިއަދު ސުޕްރީމް ކޯޓުގައި އެދިވަޑައިގެންފި އެވެ.
ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރެއްވި ކަމުގެ ކުށް ސާބިތުވެ ޔާމީނަށް އިއްވި ފަސް އަހަރުގެ ހުކުމުގެ އިސްތިއުނާފު ޝަރީއަތުގެ މިއަދުގެ އަޑުއެހުން ހެނދުނު 9:00 އިން 12:00 އަށް އަދި މެންދުރު ފަހު 1:30 އިން 3:00 އަށް ވަނީ ތާވަލްކޮށްފަ އެވެ.
މިއަދުގެ އަޑުއެހުން ފެއްޓުމުން ޔާމީން ވަނީ އެ މަނިކުފާނުގެ އުނަގަނޑުގެ މައްސަަލައެއް ހުންނަ ކަމަށް ވިދާޅުވެ، ކޯޓުގައި ގިނަ އިރު ހޭދަކުރައްވަން ޖެހޭތީ އެކަމުގެ ތަކުލީފު އުފައްލަވަން ޖެހިވަޑައިގަންނަވާ ކަމަށް ވިދާޅުވެފަ އެވެ. އަދި މައްސަލަ ތާވަލުކޮށްފައިވާ ގޮތުން ކޯޓުގައި އެތައް ގަޑިއިރުތަކެއް ހޭދަކުރައްވަން ޖެހިވަޑައިގަންނަވާތީ ތާވަލު ބަދަލުކޮށްދިނުމަށް އެދިވަޑައިގަތެވެ.
"އަޅުގަނޑަކީ އުނގަނޑުގެ ވަރަށް ބޮޑު މައްސަލައެއް ހުންނަ މީހެއް. އަޅުގަނޑަށް ހަމަ، ތެެދު ތެދަށް ދަންނަވަންޏާ ވަރަށް ދަތިވޭ ކޮންޓިނުއަސްލީ [ހުއްޓުމެއް ނެތި] ދެ ގަޑިއިރު ގޮނޑިއެއްގައި އިންނަން ވެސް،" ޔާމީން ވިދާޅުވި އެވެ.
އަޑުއެހުން 10:30 ގައި މެދުކަނޑާލުމުގެ ކުރިން، އަޑުއެހުންތައް ކުރިއަށްގެންދަން އެދޭ ވަކި ގޮތެއް އޮތްތޯ، މައްސަލަ ބަލާ ބެންޗުގެ ރިޔާސަތުން ފަނޑިޔާރު މަހާޒް އަލީ ޒާހިރު ސުވާލު ކުރެއްވުމުން ޔާމީން ވިދާޅުވީ، ދުވާލަކު ތިން ގަޑިއިރަށް ވުރެ ގިނަ އިރު ނުވާނެހެން އަޑުއެހުންތައް ބާއްވައިދިނުމަށް އެދިވަޑައިގަންނަވާ ކަމަށެވެ.
"އަޅުގަނޑު އެެދެނީ ދުވާލަކު އެއް ސެޝަން. ސެޝަނެއް ތިން ގަޑިއިރަށް ވުރެ ދިގުވެގެންދާ ކަމަށް ވަންޏާ މި ދެންނެވި ތަކުލީފު އަޅުގަނޑު އުފުލަން ޖެހޭ ވާހަކަ އަޅުގަނޑު ދަންނަވާލީ،" ޔާމީން ވިދާޅުވި އެވެ.
އަޑުއެހުން މެދުކަނޑާލާ ވަގުތު އެކަމާ ގުޅޭ ގޮތުން މަޝްވަރާ ކުރައްވާނެ ކަމަށް ފަނޑިޔާރު މަހާޒް ވިދާޅުވި އެވެ. އަލުން އަޑުއެހުން ފައްޓަވައި މަހާޒު ވިދާޅުވީ، ސިއްހީ ހާލަތާ ގުޅޭ ލިޔުންތައް ހުށަހަޅުއްވައި އަޑުއެހުން ތާވަލުކުރަން އެދޭ ގޮތް ލިޔުމުން ހުށަހެޅުމުން އެކަމާ މެދު ގޮތެއް ނިންމަވާނެ ކަމަށެވެ.
"ސިއްހީ ހާލަތާ ގުޅޭ ލިޔެކިޔުންތައް ހުށަހަޅުއްވައި މި ދެންނެވި ޓައިމް މެނޭޖްކުރައްވާނެ ގޮތް ލިޔުމުން ކޯޓަށް ހުށަހެޅުއްވުމާ އެކީގައި ހުށަހެޅުއްވުމަށް ރިއާއަތް ކުރައްވައި ކުރިއަށް ހުރި އަޑުއެހުންތަކާ މެދު ޝަރީއަތުން، ކުރިއަށް ތާވަލު ކުރެވިފައިވާ ގޮތަށް ކުރިއަށްގެންދިޔުމާ މެދު ޝަރީއަތުން ގޮތެއް ނިންމަވާނެ،" މަހާޒު ވިދާޅުވި އެވެ.
މީގެ ކުރިން ބޭއްވި އަޑުއެހުމުގައި ވެސް އަދި މިއަދުގެ އަޑުއެހުމުގައި ވެސް މަހާޒް ވަނީ ހުލާސާކޮށް ވާހަކަ ދައްކަވަން ޔާމީންގެ ވަކީލުންގެ ކިބައިން ތަކުރާރުކޮށް އެދިވަޑައިގެންފައި
ޔާމީން އެގޮތަށް އެދިވަޑައިގެންނެވުމުން މިއަދު މެންދުރު ފަހުގެ އަޑުއެހުން 3:00 ގައި ނިންމަވާނެ ކަމަށް ވެސް މަހާޒް ވިދާޅުވި އެވެ.
މަހާޒް ފާހަގަ ކުރެއްވީ، އެހެން މައްސަލަތައް ވެސް ކޯޓުން ބަލަންޖެހޭތީ ކޯޓުގެ ތާވަލުން ޖާގަ ހޯދުން ވެސް ދަތިކަމެވެ. މެންދުރު ފަހަށް އަޑުއެހުންތައް ތާވަލުކޮށްފައިވަނީ ވެސް މައްސަލަ ކުރިއަށްގެންދެވޭ ސްޕީޑަށް ބަލާފައި ކޯޓުގެ ތާވަލުން ޖާގަ ލިބޭނެ ވަރުގެ ސްޕީޑެއްގައި ކުރިއަށް ނުގެންދެވިދާނެތީ ކަމަށް ވިދާޅުވި އެވެ.
މީގެ ކުރިން ޔާމީންގެ މައްސަލައިގައި ސުޕްރީމް ކޯޓުގައި ބޭއްވި ދެ އަޑުއެހުމުގައި ވެސް ހުށަހެޅީ އިސްތިއުނާފީ ނުކުތާތަކެވެ. މިއަދު ވެސް އޮތީ އެކަމެވެ. މީގެ ކުރިން ބޭއްވި އަޑުއެހުމުގައި ވެސް އަދި މިއަދުގެ އަޑުއެހުމުގައި ވެސް މަހާޒް ވަނީ ހުލާސާކޮށް ވާހަކަ ދައްކަވަން ޔާމީންގެ ވަކީލުންގެ ކިބައިން ތަކުރާރުކޮށް އެދިވަޑައިގެންފަ އެވެ.
މަހާޒް ރިޔާސަތު ބަލަހައްޓަވާ މި މައްސަލައިގެ ބެންޗުގައި ދެން ތިއްބަވަނީ ފަނޑިޔާރު ޑރ. އަޒްމިރަލްދާ ޒާހިރު އަދި ފަނޑިޔާރު ޑރ. މުހައްމަދު އިބްރާހިމެވެ.