މޮސްކޯ (އޮކްޓޯބަރު 20) - ޔޫރޮޕާ ލީގުގައި ލެސްޓާ ސިޓީން ފަހަތުން އަރައި ރަޝިއާގެ ސްޕާޓަކް މޮސްކޯ 4-3 އިން ބަލިކޮށްފި އެވެ.
ލެސްޓާއިން މިމެޗުގައި ޖެހި ހަތަރު ލަނޑު ވެސް ޖެހީ، މިސީޒަނުގައި އޮސްޓްރިއާގެ ސަލްޒްބާގުން ގެނައި ޒަމްބިއާގެ 23 އަހަރުގެ ޒުވާން ފޯވަޑް ޕަސްޓޮން ޑާކާ އެވެ.
ރަޝިއާގައި ކުޅުނު މެޗުގެ 11 ވަނަ މިނިޓުގައި ސްޕާޓާކް މޮސްކޯއިން ލީޑު ނެގީ އެ ޓީމުގެ ފޯވަޑް އެލެކްޒެންޑަ ސޮބޮލޭވް ޖެހި ލަނޑުންނެވެ. އަދި 44 ވަނަ މިނިޓުގައި އެޓީމުން ލީޑު ފުޅާކުރީ ލެސްޓާގެ ޑިފެންސުން ހެދި ގޯހެއްގެ ފައިދާ ނަގައިގެންނެވެ. ލެސްޓާގެ ޑިފެންޑަރު ކަގްލާ ސޮޔުންޗޫ އަތުން ބޯޅަ ހޯދައިގެން ސްޕާޓަކް މޮސްކޯގެ ވިކްޓަ މޮސެސް އޭރިއާ ތެރެއަށް ހުރަސް ކޮށްލި ބޯޅައިން މި ލަނޑު ޖެހީ އޭރިއާ ތެރޭގައި ހުސްކޮށް ހުރި ޖޯޑަން ލާސަން އެވެ.
ލާސަންގެ މި ގޯލަށް ފަހު މިނިޓެއް ތެރޭ ޑާކާ ވަނީ ކެލެޗީ އިހެނާޗޯގެ އެހީތެރި ކަމާއެކު ލަނޑެއް ޖަހައި ލެސްޓާ އަށް ފަރަގު ކުޑަ ކޮށްދީފަ އެވެ.
ޑާކާ ލެސްޓާއަށް ނަތީޖާ އެއްވަރު ކޮށްދިނީ ދެވަނަ ހާފު ފެށިގެން ތިންވަނަ މިނިޓުގައެވެ. މި ލަނޑު ވެސް އޭނާ ޖެހީ އިހެނާޗޯ ހުސްކޮށްލައިފައި ދިން ބޯޅައަކުންނެވެ. އަދި އެއްވަރު ކުރިތާ ހަ މިނިޓު ފަހުން ޔޫރީ ޓީލަމަންސްގެ ޕާހަކުން ޑާކާ ވަނީ ލެސްޓާ އަށް މެޗުގައި ފުރަތަމަ ފަހަރަށް ލީޑު ނަގައިދީ، އޭނާގެ ހެޓްރިކް ފުރިހަމަ ކޮށްފަ އެވެ.
ލެސްޓާގެ ހަތަރު ވަނަ ލަނޑު މެޗުގެ 78 ވަނަ މިނިޓުގައި ޑާކާ ކާމިޔާބުކުރީ ޖޭމްސް މެޑިސަން ދިން ޕާހަކުންނެވެ. ސްޕާޓަކް މޮސްކޯއަށް ފަރަގު ކުޑަ ކޮށްދިނީ 86 ވަނަ މިނިޓުގައި، ފުރަތަމަ ލަނޑު ވެސް ޖަހައިދިން ސޮބޮލޭވް އެވެ.
ޑާކާ ވަނީ އެންމެ ފަހުން ލީގުގައި ލެސްޓާ ސިޓީން މެންޗެސްޓާ ޔުނައިޓެޑް ބަލިކުރި މެޗުގައި ވެސް ލަނޑު ޖަހައިފަ އެވެ. އެމެޗުގައި ބަދަލު ކުޅުންތެރިއެއް ގޮތުގައި ކުޅެން އެރި ނަމަވެސް ރޭގެ މެޗުގައި އޭނާ ވަނީ ފުރަތަމަ 11 ގައި ހިމެނިގެން މެޗު ފުރިހަމަ ކޮށްފަ އެވެ. ރޭގެ މެޗުގައި ލެސްޓާގެ ޖެމީ ވާޑީ އިނީ ބެންޗުގަ އެވެ.
މިއީ ޔޫރޮޕާ ލީގު ގުރޫޕް ސްޓޭޖުގައި ލެސްޓާ ކުޅުނު ތިން މެޗުން އެޓީމު މޮޅުވި ފުރަތަމަ މެޗެވެ. ފުރަތަމަ މެޗުގައި ނަޕޯލީއާ ދެކޮޅަށް ކުޅެ 2-2 އިން އެއްވަރުވި އިރު، ދެވަނަ މެޗުގައި ޕޮލެންޑުގެ ލީޖިއާ ވަރްސާވާއާ ދެކޮޅަށް ކުޅެ ބަލިވީ 1-0 އިންނެވެ.
މި ނަތީޖާއާއެކު ލެސްޓާ އޮތީ ސްޕާޓަކް މޮސްކޯއަށް ވުރެ އެއް ޕޮއިންޓް އިތުރަށް ހޯދައިގެން ގުރޫޕުގެ ދެވަނައިގަ އެވެ. ކުޅުނު ދެ މެޗުން ވެސް މޮޅުވެ އެއްވަނައިގައި އޮތީ ލީޖިއާ ވަރްސާވާ އެވެ.