ބަންގްލަދޭޝްގެ ބޮޑުވަޒީރު ޝޭޚު ހަސީނާ ރާއްޖެއަށް ކުރައްވާ ދެ ދުވަހުގެ ދަތުރުގައި މިއަދު މާލެއަށް ވަޑައިގަތުމުން ރައީސް އިބްރާހީމް މުހައްްމަދު ސޯލިހު އޭނާއާ ބައްދަލުކުރައްވަވައި ރަސްމީ މަޝްވަރާތައް ކުރައްވައިފި އެވެ.
ރައީސް އޮފީހުން ބުނެފައިވާ ގޮތުގައި ބަންގްލަދޭޝާއި ރާއްޖޭގެ މަޝްވަރާތަކަށް ފަހު، ދެބޭޭފުޅުން މިއަދު ޖޮއިންޓް ޕްރެސް ބްރީފިން އެއް ބާއްވާނެ އެވެ. މަޝްވަރާތަކާއި ބެހޭ ތަފްސީލު ދެއްވާނީ އެ ބްރީފިންގަ އެވެ.
ހަސީނާ މިއަދު މާލެވަޑައިގަތުމުން އިއްޒުއްދީން ފާލަމުން އޭނާއަށްް މަރުހަބާ ވިދާޅުވީ ރައީސް އިބްރާހީމް މުހައްމަދު ސޯލިހެވެ. އެ ރަސްމިއްޔާތުގައި ވަޒީރުންނާއި ދައުލަތުގެ އިސް އެހެން ބޭފުޅުން ވެސް ބައިވެރިވެވަޑައިގަތެވެ.
ހަސީނާގެ ޝަރަފުގައި 21 ބަޑީގެ ސަލާމެއް އެރުވި އެވެ. އެއަށް ފަަހު އެމްއެންޑީއެފްގެ ބޭންޑުން، ބަންގްލަދޭޝާއި ރާއްޖޭގެ ގައުމީ ސަލާމް ކުޅުނެވެ. އެމްއެންޑީއެފުން އޭނާއަށް އޮނަ ގާޑެއް ވެސް އެރުވި އެވެ.
ރައްޔިތުންގެ މަޖިލީހުގައި ހަސީނާ ތަގުރީރު ކުރެއްވުން ވެސް މިއަދު އޮންނާނެ އެވެ.
ރައީސް އޮފީހުން ކުރިން ބުނެފައިވާ ގޮތުގައި ހަސީނާގެ ދަތުރުގައި ދެ ގައުމުގެ ގުޅުން ބަދަހި ކުރުމުގެ މުހިއްމު އެއްބަސްވުންތަކެއްގައި ސޮއިކުރަން ވަނީ ހަމަޖެހިފަ އެވެ. އެ އެއްބަސްވުންތަކުގައި ސޮއިކުރާ އިރު މަސްވެރިކަމާއި މީހުން ބިނާކުރުމާއި ތައުލީމަކީ މިހާރު ވެސް ދެ ގައުމުގެ ދެމެދު ގާތް ގުޅުމެއް އޮންނަ ބައެއް ދާއިރާތައް ކަން ރައީސް އޮފީހުން އޭރު ފާހަގަކުރި އެވެ.
"ދެ ގައުމުގެ ދެމެދު ސޮއިކުރެވޭ މި އެއްބަސްވުންތަކާ އެކު ދެ ގައުމުގެ މެދުގައި އޮތް ގުޅުން އިތުރަށް ވަރުގަދަވެ ހަރަދަނާ ވެގެންދާނެ އެވެ،" ރައީސް އޮފީހުން މިދިޔަ ހޯމަދުވަހު ބުންޏެވެ.
ބަންގްލަދޭޭޝްގެ ފޮރިން މިނިސްޓްރީއާ ހަވާލާދީ އެ ގައުމުގެ ނޫސްތަކުން އިއްޔެ ބުނި ގޮތުގައި ހަސީނާގެ ދަތުރުގައި އެ ގައުމުން ސިއްހީ ދާއިރާގެ މާހިރުން ގެންނަން ރާއްޖެއާ އެކު އެއްބަސްވުމެއްގައި ސޮއިކުރައްވާނެ އެވެ.