ދިވެހި ލީގުގެ އުތުރު ޒޯނުގެ ކޯޑިނޭޓަރު ކަމަށް މޯ ހުރީ ފައްކާވެފައި

އަލިފުށީގައި ކުޅުނު ޕްރެޒިޑެންޓްސް ކަޕުގެ ފައިނަލް މެޗު އަމިއްލަ ރަށް، ދުވާފަރުގައި ހުރެފައި މުހައްމަދު އީސާ (މޯ) ދިޔައީ މެޗު ބަލާލުމުގެ ގޮތުންނެވެ. އެކަމަކު ދެ ޓީމު ދަނޑަށް ހާޒިރުވުމުގެ ކުރިން މޯ ދަނޑަށް ވަދެ އެހެން ބައެއް ކަންތައްތައް ބަލާލި އެވެ.

އެއީ ކޮންމެހެން އޭނާއާ ކަމެއް ހަވާލުކޮށްގެން ކުރި ކަމެއް ނޫނެވެ. އޭނާ ބޭނުންވީ ދަނޑުގެ ވިނަގަނޑުގެ ފެންވަރާއި ދަނޑުގައި ހުރި ވަސީލަތްތައް ބަލާލުމަށެވެ. ޓީސީ ސްޕޯޓްސްގެ މެނޭޖަރުކަމާއި ގައުމީ ފުޓުބޯޅަ ޓީމުގެ މެނޭޖަރުކަން ކުރި މޯ އަށް އެއީ އެ ދެ މަގާމުގައި މަސްއޫލިއްޔަތު އަދާކުރިއިރު އާންމުކޮށް ކުރާ މަސައްކަތެވެ.

ފުރަތަމަ ޑިވިޝަންގެ ބައެއް ކަލްބަތަކުގެ ޕްރެކްޓިހަށް ޒުވާން އުމުރުގައި ނުކުތް މޯ އަށް ފުޓްބޯޅަ ފެންނަނަނީ ދެ ޓީމެއް ދަނޑުމަތީގައި ކުޅޭ މެޗެއްގެ ގޮތުގައި އެކަންޏެއް ނޫނެވެ. ފުޓްބޯޅަ މެޗުގެ ބޭރުން ފުރިހަމަކުރަންޖެހޭ އިންތިޒާމުތަކާއި އިދާރީ އެންމެހާ ކަންކަންކަމަށް އޭނާ ސަމާލުކަން ދެ އެވެ.

"އަޅުގަނޑު ބެލިން އަލިފުށީ ދަނޑުގައި ހުރި ފެސިލިޓީސް. ދެ ޓީމު ބޭނުން ކުރަން ހުރި ޗޭޖިން ރޫމަށް ވަނިން. ރެފްރީސް ރޫމަށް ވަނިން. ޕިޗަށް އެރިން. އެއީ އަޅުގަނޑު ބޭނުންވީ އަޅުގަނޑު އަމިއްލަ އަށް އެކަންކަން ބަލާލަން،" ރާއްޖެއިން 2018 ގެ ސާފް ޗެމްޕިއަންޝިޕް ކާމިޔާބު ކުރިއިރު ގައުމީ ޓީމުގެ މެނޭޖަރެއްގެ ގޮތުގައި މަސައްކަތް ކުރި މޯ ކިޔައި ދިނެވެ.

"ރަނގަޅު މުބާރާތެއް ކުރިއަށް ގެންދެވޭނީ ޕިޗުގެ ބޭރުން ވެސް އިންތިޒާމު ކަންކަން ވީ އެންމެ ބޮޑަކަށް ފުރިހަމަކޮށްގެން ކަމަށް އަޅުގަނޑު ގަބޫލު ކުރަނީ."

ދިވެހި ޕްރިމިއާ ލީގު 2023-2024 ގައި ހޯމް އެންޑް އަވޭ އުސޫލުން ބާއްވަން އެފްއޭއެމުން ރާއްޖެ ހަތަރު ޒޯނަކަށް ބަހާލި އެވެ. ނޯތު ޒޯންގެ ކޮޑިނޭޓަރަކަށް އެފްއޭއެމުން ހަމަޖެއްސީ މޯ އެވެ. ހއ. އަތޮޅުން ފެށިގެން ރ. އަތޮޅާ ދެމެދުގެ ކޯޑިނޭޓަރެއްގެ ގޮތުގައި އޭނާ އަށް އޮތީ ފަސޭހަ މަސައްކަތެއް ނޫނެވެ. ދިވެހި ޕްރިމިއާ ލީގުގެ ފޯމެޓް އެކުލަވައިލުމުގެ މަރުހަލާގައި ވަކި މުއްދަތަކަށް މަސައްކަތް ކުރި މޯ ހުރީ އޭނާ އާ އެފްއޭއެމްއިން ހަވާލުކުރި އާ މަގާމަށް ވަރަށް ރަނގަޅަށް ފައްކާވެފަ އެވެ.

"މި ޒޯންގައި ލޮޖިސްޓިކް އިންތިޒާމުތައް ހަމަޖައްސަން ޖެހޭ ގޮތް އަޅުގަނޑު ވާނީ މިހާރު ބަލާފައި. މިފަހުން ށ. އަތޮޅާއި ނ. އަތޮޅު އަދި ރ. އަތޮޅުގައި ދަތުރުފަތުރުގެ ރޫޓްތައް ހުރިގޮތް އަޅުގަނޑު ބަލައިފިން. ކުރިން އޮންނާނެ ހދ. ބާލަފައި،" މޯ ބުންޏެވެ.

"މިހާރު މި މަސައްކަތް ކުރަނީ މި ޒޯނުން ޕްރިމިއާ ލީގުގެ ކޮލިފިކޭޝަންގައި ބައިވެރިވާ 17 ޓީމާ ހަމައަށް ރީޗް ވެވޭތޯ. އެޓީމުތަކުގެ ހިޔާލު ހޯދާނަން."

މޯ ގަބޫލުކުރާގޮތުގައި އެ މަގާމުގެ މަސްއޫލިއްޔަތުތައް އަދާކުރުމުގައި އޭނާ އަށް އޮތް އެންމެ ބޮޑު ފަސޭހައަކީ ބައިނަލްއަގްވާމީ ދެ މުބާރާތެއްގައި މެނޭޖަރެއްގެ ގޮތުން އޭނާ ކުރި މަސައްކަތެވެ. ބަންގްލަދޭޝްގައި 2017 ގައި ބޭއްވި ޝައިހް ކަމާލް އިންޓަނޭޝަނަލް ކަޕް ޓީސީން ކާމިޔާބުކުރި އިރު އެމުބާރާތުގައި ޓީސީގެ މެނޭޖަރެއްގެ ގޮތުގައި މަސައްކަތްކޮށް ލިބުނު ތަޖުރިބާތަކާއި ގައުމީ ފުޓުބޯޅަ ޓީމުގައި ކުރި ތަޖުރިބާތައް ބޮޑު އެހީ އަކަށް ވާނެކަމަށް އޭނާ ގަބޫލު ކުރެ އެވެ.

"އެންމެ ފުރަތަމަ ދަނޑަށް ދާން ޖެހޭނީ މެނޭޖަރު. ދަނޑުގެ ކޮންޑިޝަން ބަލައި ޓީމު ދަތުރުކުރަން ޖެހޭ ރޫޓްތައް ބަލަން،" ސާފް ޗެމްޕިއަންޝިޕްގެ ކާމިޔާބަށް ފަހު ދީފައިވާ އިންޓަވިއުއެއްގައި މޯ ބުނެފައިވެ އެވެ.

"ޓީމު ޕްރެކްޓިސް ކުރަނީ ކިހިނެއްތޯ އަޅުގަނޑު ނުބަލަން، އަޅުގަނޑު ބެލީ ޓީމު ޕްރެކްޓިސް ގުރައުންޑަށް ދާއިރު ހުރިހާ ކަމެއް ހަމަޖެހިފައި ހުރިތޯ ބެލުން. މުޅިން އާ ކިޓް މެނޭޖަރަ ކާއެކު މަސައްކަތް ކުރަން ފެށީ، ނަމަވެސް ގަތަރު ޓްރެއިނިން ކޭމްޕް ނިމިގެން ދިޔައިރު އެއްވެސް މީހަކު ނުބުނާނެ އޭނާއަކީ މުޅިން އާ ކިޓް މެނޭޖަރެކޭ. އެހާވެސް ރަނގަޅަށް މަސައްކަތްތައް ރާވައިގެން ކުރިއަށް ގެންދިޔައީ."