އާޓިފިޝަލް ބީޗުގައި ޓަކް ޝޮޕެއް ހަދައި، އެތަން ހިންގަން މާލެ ސިޓީ ކައުންސިލުން ބަޔަކާ ހަވާލުކޮށްފި އެވެ.
އެ ކައުންސިލްގެ އޮފިޝަލަކު "މިހާރު" އަށް މިއަދު ވިދާޅުވީ، އާންމުންނަށް ހިދުމަތް ދިނުމަށް އާޓިފިޝަލް ބީޗުގައި ޓަކް ޝޮޕެއް ހެދުމަށް ބަޔަކާ ހަވާލުކޮށްފައިވާ ކަމަށެވެ.
ލުއިކާނާ އާއި ބުއިންތައް ލިބޭ ގޮތަށް ހަދާ އެ ޓަކް ޝޮޕް ދިނީ ކޮން ބަޔަކަށްތޯ އެހުމުން ސިޓީ ކައުންސިލުން ބުނީ އޭގެ ތަފުސީލު ފަހުން ދޭނެ ކަމަށެވެ.
އެ ޓަކް ޝޮޕް ހެދުމަށް އާޓިފިޝަލް ބީޗުގެ އުތުރު ފަރާތުން ބިމެއް ވަނީ ހަމަޖައްސައިފަ އެވެ. ފިލާތައް ބޭނުންކޮށްގެން އެ ތަން ހެދުމުގެ މަސައްކަތް ވެސް މިހާރު ވަނީ ފަށައިފަ އެވެ.
އެތަން ހަދައި، ހިންގަން ބަޔަކާ ހަވާލުކުރީ، މިދިޔަ އަހަރު ޑިސެމްބަރު މަހުން ފެށިގެން ސިޓީ ކައުންސިލުން އަމަލުކުރަމުން އަންނަ މާލޭގެ ޕާކުތަކާއި މައިޒާންތަކާއި އެފަދަ ތަންތަން ހިންގާ ބެލެހެއްޓުމާއި ކުއްޔަށް ދިނުމާ ބެހޭ އުސޫލުގެ ތެރެއިން ކަމަށް ބުންޏެވެ.
މިހާރު ވެސް ސިޓީ ކައުންސިލުން ރަސްފަންނުގައި ބަޔަކާ ހަވާލުކޮށްގެން ޓަކް ޝޮޕެއް ހިންގަ އެވެ.