ލާމަރުކަޒީ ރާއްޖޭގެ ބޭނުމަކީ އެ މީހަކު ބޭނުންވާ ތަނެއްގައި އުފާވެރި ދިރިއުޅުމަކަށް މަގުފަހިކޮށްދިނުން: ރައީސް
ގައުމުގައި ކުރިއަށްދާ ވިއަވަތި ކޮންފަރެންސް ފެށުމުގެ ރަސްމިއްޔާތުގައި ރައީސް ވާހަކަފުޅުދައްކަވަނީ.-- ފޮޓޯ: ރައީސް އޮފީސް
11 ސެޕްޓެމްބަރ 2022 - 11:48
10 comments
ލާމަރުކަޒީ ރާއްޖެ ތަރައްގީކުރުމުގެ ބޭނުމަކީ ކޮންމެ މީހަކަށް ވެސް އެ މީހަކު ބޭނުންވާ ތަނެއްގައި އުފާވެރި އާއިލާއެއް ބިނާކުރުމުގެ މަގުފަހިކޮށްދިނުން ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ލ. ގަމުގައި "ވިއަވަތި ކޮންފަރެންސް" ފެށުމަށް ބޭއްވި ރަސްމިއްޔާތު ޝަރަފުވެރި ކޮށްދެއްވަމުން އެ މަނިކުފާނު ވިދާޅުވީ، ލާމަރުކަޒީ ނިޒާމަކީ އަތްނުލެވޭ، ހަގީގަތެއް ނެތް ބިލާހެއް ނޫން ކަމުގެ ޔަގީންކަން އެންމެންނަށް ލިބިއްޖެ ކަމަށެވެ.
އެއީ މިހާތަނަށް ރާއްޖެ އަށް ގެނެވޭ އެންމެ ބޮޑު އިދާރީ ބަދަލު ކަމަށް ވެސް ރައީސް ވިދާޅުވި އެވެ.
އެ މަނިކުފާނު ވިދާޅުވިގޮތުގައި، ކައުންސިލަރުން އިންތިހާބުވެ ތިބީ ތަރައްގީގެ މަސައްކަތް ކުރުމަށެވެ. ރައީސްކަމުގެ މަގާމުގައި އެ މަނިކުފާނު ދެމިހުންނަވަނީ ވެސް އެ މަސައްކަތް މުޅިން ނިންމައި، ވަށައިޖެހޭ ޖަޒީރާ ދިރިއުޅުމެއް ހުރިހާ ދިވެހިންނަށް ލިބިދިނުމަށް ކަމަށް ވިދާޅުވި އެވެ.
"އެ ނޫން އެއްވެސް ބޭނުމެއް، އަމާޒެއް އަދި ތަސައްވުރެއް އަޅުގަނޑުގެ ނެތް،" ރައީސް ވިދާޅުވި އެވެ.
ލ. ގަމުގައި ކުރިއަށްގެންދާ "ވިއަވަތި" ކޮންފަރެންސް ފެށުމުގެ ރަސްމިއްޔާތުގައި ރައްޔިތުން މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު ބައިވެރިވެ ވަޑައިގަންނަވަނީ-- ފޮޓޯ: ރައީސް އޮފީސް
"ރާއްޖެ ވިއަވަތިވެ، ދިރިއުޅުން ޖަޒީރާވެ، އުފާފާގަތިކަމާއި ބާއްޖަވެރި ހަޔާތެއްގެ ނަސީބު ކޮންމެ ރަށެއްގެ ކޮންމެ ދިވެއްސަކަށްމެ ހައްގު."
ރައީސް އިބްރާހިމް މުހައްމަދު ސޯލިހު ވިދާޅުވީ، ލާމަރުކަޒީ ގާނޫނަށް ގެނައި އިސްލާހު ނުގެނެސް މަޑުކޮށްފި ނަމަ ކަންކަން އަނެއްކާ ވެސް އޮންނާނީ ކުރިން ވެސް އޮތްގޮތަށް މަޑުޖެހި، ހުއްޓިފައި ކަމަށެވެ. މިހާރު ހިންގަމުންދާ ހުރިހާ ސިޔާސަތެއް ފަރުމާވެ، ނިމި ހިނގަމުން ދަނީ އޭގެ މައިބަދަ އަކީ ލާމަރުކަޒަކީ ނިޒާމު ކަމުގައި ކަނޑައަޅައިގެން ކަމަށް އެ މަނިކުފާނު ވިދާޅުވި އެވެ.
ލ. ގަމުގައި ކުރިއަށްގެންދާ "ވިއަވަތި" ކޮންފަރެންސް ފެށުމުގެ ރަސްމިއްޔާތުގައި އަންހެނުން ކޮމިޓީގެ ރައީސުންތަކެއް ބައިވެރިވަނީ.-- ފޮޓޯ: ރައީސް އޮފީސް
ވިއަވަތި ކޮންފަރެންސްގެ ބޭނުމަކީ ލާމަރުކަޒީ ގާނޫނުގެ ދަށުން ކައުންސިލްތަކަށް ދިމާވާ ދަތިތައް ހޯދައި، އެ ކަންކަން ހައްލުކުރުމެވެ. ރައީސް އިބްރާހިމް މުހައްމަދު ސޯލިހު ވަނީ ރާއްޖޭގެ ތަރައްގީގެ ކަންކަން ވިލަރެސް ކުރުމުގައި، އެ ކޮންފަރެންސްގައި ކުރާ މަޝްވަރާތަކުން ނިންމާ ނިންމުންތަކަށް ރިއާޔަތްކޮށް، އެ ކަންކަމަށް އަމަލީ ސިފަ ގެނެވޭނެ ކަމުގެ ޔަގީންކަން ދެއްވައިފަ އެވެ.
އެ މަނިކުފާނު ވިދާޅުވީ އއ. އުކުޅަހުގައި މިދިޔަ މޭ މަހު ބޭއްވި ކޮންފަރެންސުން ފެށިގެން ގަމުގައި މިއަދު ފެށި ކޮންފަރެންސާ ހަމައަށް އައިއިރު ލާމަރުކަޒީ ނިޒާމު ހިންގުމުގައި އެކަށީގެންވާ ރަނގަޅު ނަތީޖާތަކަކާއި ކުރި އެރުންތަކެއް ހާސިލް ކޮށްފައިވާ ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބޮޑުމީހާ
11 September 2022
މިކަހަލަ ވާހަކަ ދެއްކީމަވެސް އަތްޖަހާނެ ބަޔަކު ތިބެންޏާ ދެން ކިހިނެއް ކަމެއް ރަގަޅުވާނީ! އަމުދުން ތި ކޮންފަރެންސްގައި ތިނަދޫ ކައުންސިލަރުން ތިބޭނެ. އެރަށުގަ ބިން ހިއްކާފަ އޮވެމެ ގޯތި ނުދީ 4 އަހަރު ހިފަހައްޓައިފި، 4 އަހަރަކީ ކަންތައްތައް މަގުފަހިކުރަން ވަރަށް ދިގު މުއްދަތެއް!
ފަރުހާދި
11 September 2022
އެހެންވެދޯ ހަމައެކަނި މާލޭ ރައްޔިތުންނަށް ހުޅުމާލެއިންގޯތި ހިލޭދެނީ، މިވަރުގެ ބޭ އިންސާފެއް ދުވަހަކުވެސް މަށެއް ނުދެކެން،
އެންމެންގެ ބިން
11 September 2022
މާލޭ ބޭފުޅުންނަށް އެކަނި ބިން ހައްގުވާނީ ، ކަމެއްނުކޮށް ދިރިއުޅެން
މާލޭ މުހައްމަދު
11 September 2022
މާލޭ ސަރަހައްދައް ހިޖުރަ ކޮށްފައިވާ ދިވެހި ރައްޔިތުންނާ ދޭތެރޭ ސަރުކާރުން އަމަލުކުރަނީ ދެވަނަ ދަރަޖައިގެ ރައްޔިތުންގެ ގޮތުގައި. މާލޭގެ ގިނަބަޔަކު އެބުނާ ކޮތަރު ކޮށިތަކަށް ވެއްދުމަށްފަހު ރިއަލް އިސްޓޭޓް ވިޔަފާރި ފުޅާ ކުރުމަށް މާލޭގެ ބިންވެރިންގެ ދަރިންނަށް ނާޖާއިޒް މަންފާ ހޯދާދިނުމަށް ބިންހިލޭ ބެހުން މިއީ ސަރުކާރުގެ ތަފާތު ކުރުމުގެ ލާމަސީލު މިސާލެއް. މިތަފާތު ކުރުމާއި ހެދި މަމީ މާލޭ މީހަކަށް ވިޔަސް އެމްޑީޕީ އަށް ވޯޓް ދެވޭކަށްނެތް. ބައިބައި ފޯއެވަ
ގޯތިއަސާސީ
11 September 2022
ގޯތިނުދީ ކިހިނެއްތޯ ދިރިއުޅޭނީ. ބޮޑުން އޭސީ ކޮޓަރިތަކުގައި އުޅެފައި އަމިއްލަ އެޕާޓްމަންޓުތަކަށް ނިދަން ވަނަސް ރަށްރަށުގައި މިއުޅޭ އިންސާނުން ތައް އެއުޅެނީ ގޯތިނުލިބިގެން ނުއެޅެވިގެން
ރަދީފު ބިން ރަފައިދާ
11 September 2022
މީ ހަމަ ފޮނިއަނގަތެޅުމުގެ އެއްވަނަ. ދެން އުޅޭ ޕޮލިސް ކޮމިޝަނަރުވެސް.
ާއުނިމާ
11 September 2022
އެކަމެއް ސަރުކާރުގެ ސިޔާސަތުތަކަކުން ނުފެނޭ! ރަށުގައި ދިރި ނޫޅެވިގެން ދަރިންނަށް ރަގަޅު ތައުލީމާއި ޞިއްޚަތާއި ވަޒީފާގެ ފުރުޞަތުތުތައް ހޯދަދޭން މާލެއަށް ހިޖުރަކޮށް މާލޭ އެތަކެއް އަހަރު އުޅުމަށްފަހު މާލެ ދަފްތަރުގައި ޖެހިގެން މާލޭ ރައްވެއްސަކަށްވީމާވެސް މާލޭ މީހުނަށް ޤާނޫނީ ގޮތުން ލިބިދޭ ޙައްޤުތައް ހިޖުރަކޮށް މާލޭ ރައްވެއްސަކަށް ވީމާވެސް ރައްފުށުގަ އުފަންވީތީ މިސަރުކާރުންވަނީ އެޙައްޤު ނިގުޅައިގެންފަ! މީ ނަސްލީ ތަފާތުކުރުން ބޮޑު ސަރުކާރެއް!
އޮނަރަބްލް އަފީފު ދީދީ
11 September 2022
ހޮޅިވާހަކަ ނުދައްކަވާ. މިއީ ވެލްފެއަރ ސްޓޭޓަކަށްހަދަން ތިއުޅެނީ ރައްޔިތުންނަކީ "ނިކަމެތި ބައެއްކަން" އެބައިމީހުނަށް ވިސްނާދިމުގެ ބޭނުމަށްތޯ. # ދައުލަތުން ނާށިގަނޑުހިފައިގެން "ސަލާން ޖަހަމުން" ތިފަދަ ވާހަކަފުޅުދައްކަވަން ލަދުގަންނާންޖެހޭނެ. އަހަރުމެނަކީ ﷲ ގެ މިންވަރުފުޅާއިއެކު ގައިގަބާރުހުރި އަދި ތައުލީމީގޮތުންވެސް ކަންކަންކުރެވޭވަރަށް ލޯހުޅުވިފައިތިބިބައެއް. އަހަރުމެނަށްބޭނުންވަނީ "އަޅާފައިހުރި ހުރަސްތައްދޫކޮށް" އިޤްތިސޯދަށް މަގު ފަހިކޮށްދިނުން.
ހިޔާލީ އަލީ
11 September 2022
ގަބޫލުކުރިޔަސް ނުކުރިޔަސް ބައެއް މީހުން މާލެ އަންނަނީ އަސާސީ ހިދުމަތާއި ތައުލީމު ލިބެން ނެތިގެން ނޫން. ރަށްރަށުގަ އޮންނަ ހަސަދަވެރިކަމާ ސިހުރާއި ފަންޑިތަ އަދި އެސްފީނާ ތަކުން ސަލާމަތްވާން. މި ހަގީގަތަކީ މީހުން ނުދައްކާ ނުވަތަ ދައްކަން ލިޔަން ބޭނުންވާ ވާހަކަ ތަކެއްނޫން. ގިނަ ދިވެހިންނަކީ އަސްލު މައްސަލަ ބާއްވާފަ މީހުން ފަސޭހައިން ގަބޫލުކުރާ ކަހަލަ އުޒުރެއް ދައްކާ މީހުން
ާއުނިމާ
11 September 2022
ކަލޭތީ ކޮންރަށަކު މީހެއްބާ! އަހަރެން މާލެޔަށް އައީ ތަޢުލީމުވެސް ހަމަ ނުލިބިގެން، ޞިއްޚީ ހިދުމަތް ވެސް ހަމަ ނުލިބިގެން...ވަޒީފާވެސް ނުލިބިގެން..ކަލޭ އައި ސަބަބެއް އެގޭނީ ކަލެޔަށް...