މާލޭގައި އިއްޔެ ރޭ އަލިފާނުގެ ހާދިސާ ހިނގި ގެ ތަޅާލައި އެ ތަން ސާފުކުރުމުގެ މަސައްކަތް ހައުސިން މިނިސްޓްރީން މިއަދު ފަށައިފި އެވެ.
އެ މިނިސްޓްރީން ކުރި ޓުވީޓެއްގައި ބުނީ، އަލިފާނުގައި 10 މީހުން މަރުވި ހާދިސާ ހިނގި މ. ސެންރޯސްގެ ހުޅަނގުބައި ތަޅާލުމުގެ މަސައްކަތް ކުރިޔަށް ގެންދާ ކަމަށެވެ.
އެ މިނިސްޓްރީގެ ޕަބްލިކް ވޯކްސް ޑިޕާޓްމަންޓުން އެ ސަރަހައްދަށް ގޮސް ދަނގަޑުތައް ނަގައި އެ ގަރާޖުގެ ތެރޭގައި ހުރި އަނދާ ހުލިވެފައި ހުރި ވެހިކަލްތައް ވެސް އެ ސަރަހައްދުން ނެރުމުގެ މަސައްކަތް މިހާރު އެބަ ކުރެ އެވެ.
ސޯޝަލް މީޑިއާގައި އެ މިނިސްޓްރީން އާންމު ކުރި ބައެއް ފޮޓޯތަކުން ފެންނަ ގޮތުގައި ރޯވެފައި އޮތް ލޮރީއެއް ވެސް ވަނީ ގަރާޖުގެ ތެރެއިން ނެރެފަ އެވެ.
މިއީ ރާއްޖޭގައި މިހާތަނަށް އަލިފާނުގެ ހާދިސާއެއްގައި އެންމެ ގިނަ މީހުން މަރުވި ފަހަރެވެ. އޭގެ ތެރޭގައި ގިނަ އަދަދެއްގެ އިންޑިއާ މީހުންނާއި ބަންގްލަދޭޝް ބައެއް ވެސް ހިމެނެ އެވެ. މިހާތަނަށް ފުލުހުން ބުނެފައިވާ ގޮތުގައި މަރުވެފައި ވަނީ އިންޑިއާގެ ހަތް މީހަކާއި ބަންގްލަދޭޝްގެ ދެ މީހެކެވެ. މަރުވި މީހުންގެ ތެރެއިން 10 ވަނަ މީހާ އަކީ ކާކުކަން އަދި ނޭނގޭ ކަމަށް ފުލުހުން މިއަދު ބުންޏެވެ.
އޭގެ ތެރެއިން ސަލާމަތްވީ އެކަކު އޮތީ އައިޖީއެމްއެޗްގައި ވަރަށް ނާޒުކް ހާލަތުގަ އެވެ.
