ފުރަތަމަ ދިޔައީ މަހަށް، ދެން ވައްދާލީ ޗައިނާ ކޮޅަށް ގޯލެއް!

ވޯލްޑް ކަޕް ކޮލިފައިންގައި 2001 ވަނަ އަހަރު ކުޑަކުޑަ ދިވެހިރާއްޖެއާ ދެކޮޅަށް ބިޔަބޮޑު ޗައިނާ އިން އަމިއްލަ ގައުމުގައި ނުކުތީ ހަމައެކަނި މޮޅުވާކަށް ނޫނެވެ. ޗައިނާ ފުޓްބޯޅަ އެސޯސިއޭޝަނުގެ ވައިސް ޗެއާމަން ޔަން ޝިދުއޯ "ޗައިނާ ސްޕޯޓްސް ޑެއިލީ" އަށް ދެއްވި އިންޓަވިއުގައި ވިދާޅުވީ މޮޅުވާން ޖެހޭނީ ބައިވަރު ލަނޑުތަކެއް ވެސް ޖަހައިގެން ކަމަށެވެ.

އޭނާގެ އެ ވާހަކަތައް ސިފަކޮށް އެ ނޫހުން ބުނެފައިވަނީ ޗައިނާ އިން ރާއްޖެއާ ދެކޮޅަށް ނުކުންނަނީ "މަރާލުމުގެ އަމުރު" ހިފައިގެން ކަމަށެވެ. ކަންވީ ވެސް އެހެންނެވެ. އޭޕްރިލް 22، 2001 ގައި ޗައިނާގެ ޒިއާންގެ ގަދަފިނީގައި، އެ ގައުމުން ރާއްޖެ އަތުން 10-1 އިން މޮޅުވި އެވެ. މާލޭގައި ކެމްބޯޑިއާ އަތުން 6-0 އިން މޮޅުވެ ރާއްޖޭން ރަނގަޅު މިސްރާބެއްގައި ކޮލިފައިން ފެށި ނަމަވެސް ޗައިނާ އަތުން އެހާ ބޮޑު ތަފާތަކުން ބަލިވުމުން، 1998 ގެ ކޮލިފައިންގައި އީރާނުން ރާއްޖެ ކޮޅަށް ޖެހި 17 ލަނޑުގެ މާޔޫސްކަން ދިވެހިންގެ ހިތުގައި އާވި އެވެ.

ހަގީގަތުގައި ޗައިނާގެ ބައެއް ސަޕޯޓަރުން އުއްމީދުކޮށްގެން ތިބީ އީރާނުން ރާއްޖެ ކޮޅަށް ޖެހި ވަރަށް ވުރެ ގިނައިން އެ ދުވަހު ލަނޑު ޖެހޭނެ ކަމަށެވެ. އޭރު އޮސްޓްރޭލިއާ އިން އޮތީ އެ އަހަރު އެމެރިކަން ސަމޯއާ އަތުން 31-0 އިން މޮޅުވެ، އީރާނުން ރާއްޖެ ކޮޅަށް 17 ލަނޑު ޖަހައިގެން ހެދި ދުނިޔޭގެ ރެކޯޑް މުގުރާލައިފަ އެވެ. އެހެންވެ ޗައިނާގެ ބައެއް ސަޕޯޓަރުންގެ އުއްމީދަކަށްވީ އޮސްޓްރޭލިއާގެ ރެކޯޑް މުގުރާލުމެވެ.

"ބައެއް މީހުން ތިބި ގަނޑު ހިފައިގެން 33 ލަނޑު ނޯޓުކުރަން އައިސްގެން ވެސް،" ގައުމީ ޓީމުގެ މެނޭޖަރު އަބްދުލްހަމީދު އަބްދުލްގަފޫރު (އައްޑޯ) "ހަވީރަ"ށް ދިން އިންޓަވިއުގައި ބުންޏެވެ.

ދުނިޔޭގެ ރެކޯޑެއް ނެހެދުނަސް ޖަރުމަނުގެ އަލެމަނިއާ އާޗެންގެ ޒައި ހުއީގެ ހެޓްރިކާއި އިންގްލެންޑުގެ ކްރިސްޓަލް ޕެލަސްގެ ފެން ޒިޔާގެ ދެ ލަނޑާ އެކު ޗައިނާ ރާއްޖެ ކޮޅަށް 10 ލަނޑު ޖެހުންވީ އެ ގައުމަށް ހިތްހަމަޖެހުމެކެވެ. އެކަމަކު މެޗަށް ފަހު ޗައިނާގެ ނޫސްވެރިންގެ އެންމެ ބޮޑު ސަމާލުކަމެއް ލިބުނީ ދިވެހި ކުޅުންތެރިޔަކަށެވެ. އެއީ އެއްކޮޅަށް ބުރަވެފައި އޮތް އެ މެޗުގައި ޗައިނާ ކޮޅަށް ރާއްޖޭން ފޮނުވާލި ހަމައެކަނި ހަމަލާގައި، ރާއްޖެ އަށް ގޯލް ޖަހައިދިން ކ. ހުރައަށް އުފަން އިސްމާއީލް ނަސީމް (ކޭޑީ) އެވެ.

މެޗު ނިމުމާ އެކު ޗައިނާ ނޫސްވެރިން ކޭޑީ ވަށާލި އެވެ. އޭރު ރާއްޖޭގައި ގިނައީ އެހެން ވަޒީފާއެއްގައި އުޅެމުން ފުޓްބޯޅަ ކުޅޭ އެމެޗުއާ ކުޅުންތެރިންނަށް ވާތީ، ފުޓްބޯޅަ ކުޅުމުގެ އިތުރުން ކޭޑީ ކުރަނީ ކޮން މަސައްކަތެއްތޯ ޗައިނާ ނޫސްވެރިން އެހި އެވެ.

"އަހަރެން ފުރަތަމަ ދިޔައީ މަހަށް. މަހަށް ގޮސް އުޅެނިކޮށް އަހަރެން ރަށު ޓީމަށް ކުޅުވަންވެގެން ބޭބެ އަހަރެން ރަށުގައި ބެހެއްޓީމާ ގަވާއިދުން ކުޅެން ފެށީ،" ކޭޑީ އެ ދުވަހު ބުންޏެވެ.

ކޭޑީގެ އެ ޖަވާބުން ޗައިނާ ނޫސްވެރިން އަންތަރީސްކޮށްލި އެވެ. މަސްވެރިކަން ކުރަމުން ކުޅުނު ކުޅުންތެރިޔަކަށް ޗައިނާ ފަދަ ޕްރޮފެޝަނަލް ކުޅުންތެރިން ތިބި ޓީމެއް ކޮޅަށް ލަނޑެއް ޖަހާލެވުމުން އެ މީހުން ހައިރާންވީ އެވެ. އެކަމަކު އެއީ އޭރުގެ ހަގީގަތެވެ. ކޭޑީ ފަދަ އެތައް ދިވެހި ކުޅުންތެރިންނަކީ އޭރު ކޮންމެވެސް އެހެން މަސައްކަތެއް ކުރަމުން ހަވީރު ޕްރެކްޓިސްކޮށްލާފައި ފުޓްބޯޅަ ކުޅުނު ކުޅުންތެރިންނެވެ.

ކޭޑީގެ ހުނަރުވެރިކަން ފާހަގަވެ އޭނާ ލައްވާ ރަށު ޓީމު ކުޅުވަން އޭރު އެ ރަށުގެ އެންމެ ސީނިއާ ކުޅުންތެރިޔާ އަދި އޭނާގެ ދޮންބެ އަބްދުލްވާހިދު ނިންމީ، ކޭޑީ ކުޑަކަމުން އެންމެ ފުރަތަމަ އެ ފުރުސަތު ނުދޭން ނިންމުމުން، އެކަމުގެ ހިތްހަމަނުޖެހުމުގައި އޭނާ ރަށް ދޫކޮށް ރިޒޯޓެއްގައި މަސައްކަތްކުރަން ގޮސް ހުއްޓަ އެވެ.

"ވަރަށް ފޫހިވި ފުރުސަތު ނުލިބުމުން. އެހެންވެ ރަށު ޓީމަށް ވާގޮތެއް ނުވެސް ބަލަން،" ވެލެންސިއާ އަށް ކުޅުނު ސްރީ ލަންކާގެ ކުޅަދާނަ ޑިފެންޑަރު ކޭޑީ ލަލިތުއާ ވައްތަރު ގޮތެއް ހުންނާނީ ހުރާ މީހުން ކޭޑީގެ ނަމުން މުހާތަބުކުރަން ފެށި ކުޅުންތެރިޔާ "މިހާރަ"ށް ބުންޏެވެ.

ގަސްފިނޮޅު ރިޒޯޓުގެ ޑައިވިން ދޯނީގެ ވަޒީފާގައި ހުއްޓާ ރަށު ޓީމަށް ކުޅުވަން ކޭޑީ ބަލާ އައީ ދޮންބެ ވާހިދު އާއި ޓީމުގެ މެނޭޖަރު ހުސެއިން ޒަރީރު (ހުސޭނުބޭ) އެވެ. އޭނާ އުފަލާ އެކު އެ ފުރުސަތުގެ ބޭނުން ހިފި އެވެ. އަދި ރޭވަންސްގެ ނަމުގައި ދެ ވަނަ ޑިވިޝަނުގައި ވާދަކޮށް ކ. ހިންމަފުށި ބަލިކޮށް ފުރަތަމަ ޑިވިޝަނުން ޖާގަ ހޯދި ހުރާ ކުޅުންތެރިންގެ ތެރޭގައި ހިމެނުނެވެ.

އެކަމަކު ރޭވަންސް ނަމުގައި ފުރަތަމަ ޑިވިޝަނުގައި ނުކުޅެން ރަށުގެ ނަގާކިޔާ މީހުން ނިންމުމުން ޖެހިގެން އައި އަހަރު އެ ކުޅުންތެރިން ވާދަކުރީ ހުރާ ޖަމިއްޔަތުލް ހުއްރިއްޔާގެ ނަމުގަ އެވެ. މުބާރާތް ނޯންނަ ދުވަސްވަރު ކޭޑީ ދަނީ މަހަށެވެ. އޭރު އެ ޓީމަށް ކޯޗުކޮށްދޭން، ހަފުތާއަކު ދެ ދުވަހު، މޯނިންސަން މޫސާމަނިކު (ކުޑަމޫސަ) އެ ރަށަށް ދެ އެވެ. މޫސަގެ އިރުޝާދު ލިބުމަކީ ހުރިއްޔާ ކުޅުންތެރިންނަށް ލިބުނު ބޮޑު ހިތްވަރެކެވެ.

ނަތީޖާއަކަށްވީ ހުއްރިއްޔާ އިން 1996 ވަނަ އަހަރު މަޝްހޫރު ކްލަބް ލެގޫންސް ކަޓުވާލައި ފުރަތަމަ ޑިވިޝަނުން ޖާގަ ހޯދުމެވެ. އޭރު ހުއްރިއްޔާގައި ހުނަރުވެރި ވަރަށް ގިނަ ކުޅުންތެރިން ތިއްބެވެ. ގަތަރުގައި 1994 ގައި އޮތް 21 އަހަރުން ދަށުގެ ވޯލްޑް ކަޕުގެ ކޮލިފައިންގައި ވާދަކުރި ރާއްޖޭގެ 19 އަހަރުން ދަށުގެ ޓީމުގައި ހިމެނުނު އަލީ ޝިހާމް (ހުރާ އައްޔަ) މައުސޫމް އަބްދުގް ގަފޫރު (މާސޭ) އާއި އަބްދުﷲ އިބްރާހިމް (އަބުޅޯ) އާއި ގޯލްކީޕަރު އިސްހާގު އީސާ ތިބީ ސީނިއާ ފުޓްބޯޅައަށް ފައްކާވެފަ އެވެ.

ކޭޑީ ހިމެނިގެން ހުއްރިއްޔާ އިން މާލޭގެ ޓީމުތަކަށް ރަނގަޅު ވާދައެއް ދިނެވެ. އެގޮތުން 1997 އާއި 1999 ގެ ގައުމީ މުބާރާތުގެ ފައިނަލުގައި ކުޅުނެވެ. މީގެ ތެރެއިން 1999 ގައި ގައުމީ މުބާރާތުގެ ލީގު ބުރުގެ ޗެމްޕިއަންކަން ހޯދި އެވެ. އަދި އެ އަހަރާއި 2000 ވަނަ އަހަރު، ރާއްޖޭގެ ބައިނަލްއަގްވާމީ ކްލަބް މުބާރާތް ޕޮމިސް ކަޕް ކާމިޔާބުކުރި އެވެ. ޓީމުގެ އެންމެ ސީނިއާ ކުޅުންތެެރިޔަކީ، ވެލެންސިއާ ދޫކޮށް އެ ޓީމާ ގުޅުނު ކުޑަމޫސަ އެވެ.

ހުރާ އައްޔަ އާއި މާސޭ އާއި އަބުޅޯ އަދި އިސްހާގު އޭރު ގައުމީ ޓީމުން ޖާގަ ހޯދަމުން އައި ނަމަވެސް ކޭޑީ އަށް އޭރު އެ ފުރުސަތެއް ނުލިބުނެވެ. އެކަމަކު 1999 ގައި ވިކްޓްރީ 1-0 އިން ބަލިކޮށް އަދި 2000 ވަނަ އަހަރު ވެލެންސިއާ އަތުން ޕެނަލްޓީން 4-3 އިން މޮޅުވެ ހުއްރިއްޔާ އިން ޕޮމިސް ކަޕް ކާމިޔާބުކުރިއިރު ކޭޑީގެ ހިއްސާ ވަރަށް ބޮޑެވެ.

ރާއްޖޭން ބޭރުގައި އޭނާ އަށް އެންމެ ފުރަތަމަ ކުޅެން ލިބުނީ 2000/2001 ގެ އޭޝިއަން ކްލަބް ޗެމްޕިއަންޝިޕުގަ އެވެ. އެ މުބާރާތުގެ ފުރަތަމަ ބުރުގެ އިރުމަތީ އޭޝިއާ ފަޅީގައި، ސެޕްޓެމްބަރު، 2000 ގައި މުބާރާތުގެ ޗެމްޕިއަންކަން ހޯދި ދެކުނު ކޮރެއާގެ ސުވޮން ސެމްސަން ބްލޫވިންގްސްއާ ކުޅެ 2-1 އިން ބަލިވި މެޗާއި 0-0 އިން އެއްވަރުވި މެޗުގައި ކޭޑީ ވަނީ ކުޅެފަ އެވެ. އޭރު ވެސް ކޭޑީ ޕްރެކްޓިހަށް ނޯންނަ ނަމަ މަހަށްދެ އެވެ. އެކަމަކީ އެ ރަށު ކުޅުންތެރިން ފަހުރުވެރިކަމާ އެކު ކުރި ކަމެކެވެ. ފުޓްބޯޅަ ކުޅުންތެރިޔަކަށް ނުވީ ނަމަ ވީހީ މަސްވެރިޔަކަށް އެ ޓީމުގެ އަލީ ޝިހާމް ވެސް ބުނެފައިވެ އެވެ.

ކޭޑީގެ މޮޅު ކުޅުމުގެ ނަތީޖާއަކަށްވީ 2001 ވަނަ އަހަރު އޭނާ ގެންދަން ނިއު ރޭޑިއަންޓުން މަސައްކަތްކުރުމެވެ. އެކަމަކު އޭރު ހުއްރިއްޔާ އަށް ވެސް ހަރަދުކުރައްވާ ނިއުގެ ޗެއާމަން މުހައްމަދު ވަހީދުއްދީން (ޑީން) އެކަމަށް ހުރަސް އެޅުއްވި އެވެ. ހުއްރިއްޔާ ނިކަމެތިވެދާނީވެ އެވެ. އެކަމަކު ކޭޑީ އާއި ހުރާ އައްޔަ އާއި އަބުޅޯ، ހުއްރިއްޔާގައި މަޑުނުކޮށް އެހެން ކްލަބްތަކަށް މިސްރާބު ޖެހި އެވެ. ކޭޑީގެ ސޮއި ހޯދީ ނިއު ލެގޫންސް ގަނެގެން އައިލެންޑް ފުޓްބޯޅް ކްލަބް (އައިއެފްސީ) ގެ ނަމުގައި އައްޑޫ ވިޔަފާރިވެރިން އުފެއްދި ކްލަބުންނެވެ.

އެ އަހަރު އައިއެފްސީ އަށް މެޗެއް ނުކުޅެވެނީސް ކޭޑީ އަށް ގައުމީ ޓީމުން ޖާގަ ލިބުނެވެ. ދެކުނު ކޮރެއާ އާއި ޖަޕާނުގައި 2002 ގައި ބާއްވާ ވޯލްޑް ކަޕް ކޮލިފައިންގައި ވާދަކުރާ ރާއްޖޭގެ ސްކޮޑުން ކޭޑީ އަށް ކޯޗު ޖޯސެފް ޔަންކޭޒް ޖާގަ ދިނީ އޭރުގެ ކެޕްޓަން އަދި އިތުބާރު ޑިފެންޑަރު މުހައްމަދު އިބްރާހީމް (ކައްޕި) ގެ ލަފާގެ މަތިންނެވެ.

އެކަމަކު މާލޭގައި ކެމްބޯޑިއާ އަތުން 6-0 އިން މޮޅުވި މެޗާއި ޖަކާޓާގައި އިންޑޮނީޝިއާ އަތުން 5-0 އިން ރާއްޖެ ބަލިވި މެޗުގައި ކޭޑީ އަށް ކުޅެން ފުރުސަތެއް ނުލިބުނެވެ. ކޯޗު އޭނާ އަށް ޖާގަ ހޯދީ އޭޕްރިލް 15 ގައި ކެމްބޯޑިއާއާ ދެކޮޅަށް އެ ގައުމުގައި ކުޅުނު މެޗުގަ އެވެ. އިބްރާހީމް ފަޒީލް (އޮއްޕޮ) ގެ ބަދަލުގައި 66 ވަނަ މިނެޓުގައި ކޭޑީ އެރުވިތާ ދެ މިނެޓު ފަހުން އޭނާ ރާއްޖެ އަށް ގޯލެއް ޖަހައިދީ ލީޑު ނަގައިދިނެވެ. ގައުމީ ޓީމަށް ކުޅުނު ފުރަތަމަ މެޗުގައި ލަނޑެއް ޖެހުންވީ ކޭޑީ އަށް ވަރަށް ހާއްސަ އުފަލަކާއި ޝަރަފެއް ލިބުނު ކަމެކެވެ. އެކަމަކު 79 ވަނަ މިނެޓުގައި ކެމްބޯޑިއާ އިން ލަނޑު ޖަހައި ނަތީޖާ އެއްވަރުކޮށް، އޭނާގެ ލަނޑުން ރާއްޖެ މޮޅުކޮށްދިނުމުގެ އުފާފާޅުކުރަން ތައްޔާރުވެ ހުރި ކޭޑީ މާޔޫސްކޮށްލި އެވެ.

ރާއްޖެ އަށް ދެން އޮތީ ޗައިނާ މެޗެވެ. އެއީ އޭގެ ކުރީ އަހަރު އޭޝިއަން ކަޕުގެ ސެމީ ފައިނަލުގައި ކުޅެފައިވާ އޭޝިއާގެ ވަރުގަދަ ޓީމެކެވެ. ކޯޗަކަށް ހުރީ އޭގެ ކުރީ ހަތަރު ވޯލްޑް ކަޕުގައި، މެކްސިކޯ އާއި ކޮސްޓާ ރީކާ އާއި އެމެރިކާ އާއި ނައިޖީރިއާ އަށް ކޯޗުކޮށްދިނީ އެ ހަތަރު ޓީމު ވެސް ދެ ވަނަ ބުރަށް ގެންގޮސްދީފައިވާ ޔޫގޮސްލާވިއާގެ ބޯރާ މިލުޓިނޮވިޗެވެ. ރާއްޖެ ކޮޅަށް ގިނަ ގޯލްތަކެއް ޖަހަން ޗައިނާގެ ފުޓްބޯޅައިގެ އިސް މީހުންގެ ޕްރެޝަރު އޮތުމުންނާ އެކު ޗައިނާ އިން ވަރުގަދަ އެޓޭކިން ގޭމެއް ކުޅޭނެތީވެ ކޯޗު ޔަންކޭޒް އެ މެޗަށް ނެގީ ޑިފެންސިވް ފުރަތަމަ އެގާރައަކަށެވެ. ނަތީޖާއަކަށްވީ ކޭޑީ އަށް ފުރަތަމަ އެގާރައިން ފުރުސަތު ލިބުމެވެ.

ބޯކޮށް ވާރޭ ވެހި ދަނޑު ތެމިފައި އޮތް ނަމަވެސް، ޗައިނާގެ އިސްކޮޅުން ދިގު ބިޔަ ކުޅުންތެރިން ދިޔައީ މެޗުގެ ފުރަތަމަ މިނެޓުން ފެށިގެން ދިވެހި ކުޅުންތެރިންގެ މައްޗަށް ކޮންޓްރޯލް ނަގަމުންނެވެ. އަދި 12 ވަނަ މިނެޓުގައި ނެގި ލީޑާ އެކު، ގޯލްކީޕަރު އިމްރާން މުހައްމަދު މޮޅު ކުޅުމެއް ދެއްކި ނަމަވެސް ޗައިނާ އިން ފުރަތަމަ ހާފު ނިންމާލީ ރާއްޖެ ކޮޅަށް ހަތަރު ލަނޑު ޖަހައިފަ އެވެ.

މެޔަށް ތަދުވުމުގެ ސަބަބުން އިމްރާނުގެ ބަދަލުގައި ދެ ވަނަ ހާފުގައި ގޯލް ބެލެހެއްޓީ އަސްލަމް އަބްދުއްރަހީމް ބެލެހެއްޓި ރާއްޖޭގެ ގޯލަށް ޗައިނާ އިން ދެ ވަނަ ހާފުގެ ފުރަތަމަ 16 މިނެޓުގައި ހަތަރު ގޯލް ވައްދާލި އެވެ. އެއާ އެކު ހިތްމަރުވެފައި ތިބި ދިވެހި ކުޅުންތެރިންނަށް ކުޑަނަމަވެސް ހިތްވަރެއް ލިބުނީ 61 ވަނަ މިނެޓުގަ އެވެ.

ޗައިނާ އިން ނެގި ކޯނަރެއް އަސްލަމް ދިފާއުކޮށް ފޮނުވާލުމުން ލިބުނީ ކޭޑީ އަށެވެ. އޭނާ އެ ބޯޅަ މުހައްމަދު ހުސެއިން (އޮއިއްޓޭ) އަށް ދީފައި ކުރިއަށް އެރީ އެ ބޯޅަ އަލުން އޭނާ އަށް ޕާސްކުރުމަށް އޮއިއްޓޭ ގާތު އެދިފަ އެވެ. އޮއިއްޓޭ އެ ބޯޅަ އަލުން ކޭޑީ އަށް ފޯރުކޮށްދިން އިރު، އޭނާ މާކުކުރަން އެރި ޗައިނާ ޑިފެންޑަރަށް ހުރެވުނީ ބޯޅައަށް ފުރަގަސްދީގެންނެވެ. އެއާ އެކު ކޭޑީ އަށް ކުރިއަށް އަރާނެ ޖާގަ ލިބުނެވެ. އަދި ސްޕީޑާ އެކު ކުރިއަށް އަރައި އޭރިއާ ތެރެއަށް ވަދެ ޗައިނާ ގޯލްކީޕަރަށް އެއްވެސް ފުރުސަތެއް ނުދީ ބޯޅަ ތިރީ ކަނަށް ވައްދާލި އެވެ.

ކޭޑީ ބޯޅަ ގޯލަށް ފޮނުވާލި ވަގުތަކީ، އެ ބޯޅަ ދިފާއުކުރަން އެރި ޗައިނާ ޑިފެންޑަރުގެ ޓެކުލެއް އަރައި ކޭޑީ ބިމާ ހަމަވި ވަގުތެވެ. ބޯޅަ ގޯލުގެ ތެރެއަށް ވަންކަން އެނގުނު ނަމަވެސް، ވެއްޓިފައި އޮތުމުން އުފާފާޅުކުރަން ދުއްވައިގަނެވޭ ގޮތެއް ނުވި އެވެ. އެކަމަކު އެހެން ކުޅުންތެރިން އައިސް ކޭޑީ ގައިމައްޗަށް ވެއްޓި ވަރަށް ބޮޑަށް އުފާފާޅުކުރި އެވެ.

"އެ ވަގުތު ނޭގޭ ވީ ގޮތެއް ވެސް. ހުއްޓުން އަރާފައި ހުރެވުނީ،" އެ ދުވަހުގެ އިހުސާސްތައް ކޭޑީ "މިހާރަ"ށް ކިޔައިދިނެވެ.

ޗައިނާ އިން ރާއްޖެ ކޮޅަށް ލަނޑު ގޯންޏެއް އޮއްސާލި މެޗެއްގައި ރާއްޖޭން ޖެހި އެންމެ ލަނޑެއްގެ ފައިދާއެއް ނަތީޖާއިން ނުކުރި ނަމަވެސް އެ ގޯލަކީ އަގުހުރި ގޯލެކެވެ. ޗައިނާ ފަދަ ވަރުގަދަ ޓީމެއް ކޮޅަށް ކައުންޓާ އެޓޭކެއްގައި ރާއްޖެ އަށް ލަނޑެއް ޖަހާލެވުމަކީ ކުޅުންތެރިންނަށް ލިބުނު ވަރަށް ބޮޑު އިތުބާރެކެވެ. އެހެންވެ ޗައިނާ އަށް 10 ގޯލުން ލިބުނު އަގާ އެއްވަރުގެ އަގެއް ރާއްޖެ އަށް އެންމެ ގޯލަކުން ލިބުނެވެ. މެޗަށް ފަހު ޗައިނާ ނޫސްވެރިން ކޭޑީ ވަށާލީ އެހެންވެ އެވެ.

"އެ މީހުން އެހީ އެހާ ފަސޭހައިން ޗައިނާ ކޮޅަށް ގޯލް ޖެހީ ކިހިނެއްހޭ؟ އަހަރެން ބުނިން އެއީ ފަސޭހަ ގޯލެއް ނޫނޭ،" ކޭޑީ ބުންޏެވެ.

ޖެހިގެން އައި ހަފުތާގައި ޗައިނާ އިން ދެ ވަނަ ލެގު ކުޅެން ރާއްޖެ އައީ ސަތޭކައެއްހާ ސަޕޯޓަރުންނާއި 25 އެއްހާ ނޫސްވެރިންނާއި ފޮޓޯގްރާފަރުން ގޮވައިގެންނެވެ. ދުނިޔޭގެ ބޮޑެތި ނޫސް އެޖެންސީތަކުން ވެސް އެ މެޗު ކަވަރުކުރި އެވެ.

މި މެޗުގައި ކޭޑީ އަށް ފުރަތަމަ އެގާރައިން ފުރުސަތެއް ނުލިބުނެވެ. ބަދަލުގައި ކޯޗު ފުރުސަތު ދިނީ އޭރު ވިކްޓްރީ އާއި 23 އަހަރުން ދަށުގެ ގައުމީ ޓީމަށް ކުޅޭ އިސްކޮޅުން ދިގު ޒުވާން ޑިފެންޑަރު ސޮބާހު މުހައްމަދު އިބްރާހިމް އާއި އަނިޔާއިން ފިޓްވި އައްސަދު އަބްދުލްގަނީ އަށެވެ. އެ ދެ ކުޅުންތެރިންގެ މޮޅު ކުޅުމާ އެކު، ހާއްސަކޮށް ސޮބާގެ ތަފާތު ކުޅުމާ އެކު ރާއްޖޭން ޗައިނާގެ ފޯވާޑް ލައިން ހުއްޓުވި އެވެ. އޭރިއާ ތެރެއިން ރާއްޖޭގެ ޑިފެންސް ލައިން ފޫއަޅުވާނުލެވުމުން ޗައިނާ އިން މަސައްކަތްކުރީ ގޯލް ކުރިމައްޗަށް ބޯޅަ ހުރަސްކުރާށެވެ. އެގޮތުން ލިބުނު ފުރުސަތެއްގައި ފުރަތަމަ ހާފުގެ ފަހު މިނެޓުގައި ޗައިނާ އިން ގޯލެއް ޖެހި އެވެ.

ދެ ވަނަ ހާފުގައި ވެސް ރާއްޖޭން ޗައިނާ ހިފައްޓައިގެން ކުޅުނެވެ. އެކަމަކު 75 ވަނަ މިނެޓުގައި ފޯވާޑް އާދަމް އަބްދުއްލަތީފް (ލައްޗޭ) އަށް ދެ ވަނަ ރީނދޫ ކާޑާ އެކު ރަތްކާޑެއް ދެއްކުމުން، ރާއްޖެ އަށް މައްސަލަތަކެއް ދިމާވި އެވެ. އެހެންވެ ނަތީޖާ 1-0 ގައި ހިފަހައްޓަން އަލީ ޝިހާމްގެ ބަދަލުގައި ކޯޗު އެރުވީ ކޭޑީ އެވެ.

"އަޅުގަނޑު އެރީ ޑިފެންސަށް. އެކަމަކު ކައްޕި ވަރަށް ބޮޑަށް ހިތްވަރުދިން ކައުންޓާގައި އަރަން. ކުރީ ދެ މެޗުގައި ވެސް ގޯލް ޖެހިފައިވާތީ މި މެޗުގައި ވެސް ޖެހޭނެ ކަމަށް ބަލައި އަޅުގަނޑު ވެސް ކުރިއަށް ޖެހިލިން،" ކޭޑީ ބުންޏެވެ.

އެކަމަކު ޗައިނާ ކުޅުންތެރިން ތިބީ ކޭޑީއާ މެދު އެއަށް ވުރެ ވަރަށް ބޮޑަށް ސަމާލުވެގެންނެވެ. އެހެންވިޔަސް ދޭތެރެއަކުން ދެމި ގަނެ އޭނާ ޗައިނާ ހާފުގެ ތެރެއިން ގޯލަށް ހަމަލައެއް ފޮނުވާލި އެވެ. އެ ބޯޅަ ދިޔައީ ހުރަސް ދަނޑި މަތިންނެވެ. އެ ލަނޑު ވަން ނަމަ ރާއްޖެ އަށް ނަތީޖާ އެއްވަރުކުރެވި، އެއީ އެހާތަނަށް ރާއްޖެ ބައިނަލްއަގްވާމީ ފުޓްބޯޅައިގައި ހޯދި އެންމެ ބޮޑު ކާމިޔާބަށްވީހެވެ.

އެކަން ނުވިޔަސް، ކުރީގެ މެޗުގެ ގޯލާ އެކު ކޭޑީގެ ނަން ދިވެހި ފުޓްބޯޅައިގެ ތާރީހުގައި ލިޔެވިފައިވަނީ ރަނުންނެވެ. އެ އަހަރު އައިއެފްސީ އަށް ކުޅުމަށް ފަހު، ފަހުން ރާއްޖޭގެ އެންމެ ބޮޑު ދެ ޓީމު ކަމަށްވާ ވިކްޓްރީ އާއި ނިއު ރޭޑިއަންޓަށް ކުޅެ ދެ ޓީމާ އެކު ތަށި ހޯދުމަށް ފަހު ހުއްރިއްޔާ ޓީމުން 2005 ގައި އޭނާ ރިޓަޔާކުރި އެވެ. ފަހުން ގައުމީ ޓީމުން ފުރުސަތު ނުލިބުނަސް ކޭޑީ ހިމެނެނީ ކުޅުނު މެޗުގެ ނިސްބަތުން ގައުމީ ޓީމަށް އެންމެ އެހީއެއްވެދިން އެއް ކުޅުންތެރިޔާ އަށެވެ.

ކުޅުން ހުއްޓާލައި އޭނާ އޭރުން ފެށިގެން ކޭޑީ، 51، މަސައްކަތްކުރަނީ ކައިރީގައި އޮންނަ ކުޑަހުރާ ރިޒޯޓުގެ ލޯންޗް ކެޕްޓަނަކަށެވެ. ފުޓްބޯޅައާ ދުރުގައި ހުރި ނަމަވެސް، ޗައިނާ ކޮޅަށް ޖެހި އެ ހާއްސަ ލަނޑުގެ ހަނދާންތައް އޭނާގެ ސިކުނޑީގައި ހަރުލާފައި ހުރެ އެވެ.