ނައިބު ރައީސް ފައިސަލް ނަސީމް އައްޑު އާއި ފުވައްމުލަކަށް ރަސްމީ ދަތުރުފުޅެއްގައި މިއަދު ހެނދުނު ފުރާވަޑައިގެންފި އެވެ.
ރައީސް އޮފީހުން ބުނީ ނައިބު ރައީސްގެ މި ދަތުރުފުޅުގައި މިއަދު، އައްޑޫގައި މީހުން ދިރިއުޅޭ ހުރިހާ ރަށަކަށް ޒިޔާރަތްކުރައްވާނެ ކަމަށެވެ. އަދި އައްޑޫގައި ހިނގަމުންދާ ތަރައްގީގެ މަޝްރޫއުތައް ކުރިޔަށްދާ ގޮތް ބައްލަވާލައްވައި، ސަރުކާރުގެ މުއައްސަސާތަކަށް ޒިޔާރަތް ކުރައްވާނެ ކަމަށް ވެސް ބުންޏެވެ.
ސ. ހުޅުމީދޫ ހެލްތު ސެންޓަރުގައި، އަލަށް ފަށާ ހިދުމަތްތައް ވެސް ނައިބު ރައީސް މިއަދު އިފްތިތާހުކޮށްދެއްވާނެ ކަމަށް ރައީސް އޮފީހުން ބުންޏެވެ.
އެ އޮފީހުން ބުނީ ނައިބު ރައީސްގެ މި ދަތުރުފުޅުގައި، ފުވައްމުލަކަށް ވަޑައިގެން، އެ ރަށުގައި ހިންގާ އުމުރާނީ ތަރައްގީގެ މަޝްރޫއުތައް ބައްލަވާލައްވައި ސަރުކާރުގެ މުއައްސަސާތަކަށް ޒިޔާރަތްކުރައްވާނެ ކަމަށެވެ. އަދި ފުވައްމުލަކު ހޮސްޕިޓަލުގެ އާ އިމާރާތް ހުޅުއްވައި ދެއްވައި، ޏ. އަތޮޅު ތައުލީމީ މަރުކަޒުގެ އަހަރީ ދުވަހާއި ގުޅިގެން ބާއްވާ ޖަލްސާ ވެސް އެމަނިކުފާނު ޝަރަފުވެރިކޮށްދެއްވާނެ ކަމަށް ބުންޏެވެ.
މި ދަތުރުފުޅު ނިންމާލެއްވުމަށް ފަހު ނައިބު ރައީސް މާލެ ވަޑައިގަންނަވަނީ އަންނަ ހޯމަ ދުވަހު އެވެ.