އޮޅުވާލައިގެން ސިޔާސީ ޕާޓީތަކަށް މީހުން ވައްދާ ނަމަ ޖޫރިމަނާކުރަން ނިންމައި ފޯމުތަކުގެ ސައްހަކަން ކަށަވަރުކުރަން ފެށި ފަހުން ޕާޓީތަކުން ހުށަހަޅާ ފޯމުތައް ވަރަށް ބޮޑަށް މަދުވެއްޖެ އެވެ.
ވަގު ފޯމު ހުށަހެޅުމުގެ މައްސަލަ ބޮޑުވުމުން ސިޔާސީ ޕާޓީތަކުން ހުށަހަޅާ މެމްބަރުންގެ ފޯމުތައް ކަށަވަރު ކުރުމަށް އިލެކްޝަންސް ކޮމިޝަން (އީސީ)ން ގެންގުޅޭ އުސޫލު ވަނީ ހަރުކަށިކޮށްފަ އެވެ.
މިދިޔަ މަހުން ފެށިގެން އެ ކޮމިޝަނުން އަންނަނީ ޕާޓީއަށް ސޮއިކުރާ މީހާގެ ނަން އާއްމުކުރަމުންނެވެ. އަދި ފޯމު ހުށަހަޅާ މީހުންގެ ފޯނަށް މެސެޖެއް ވެސް ފޮނުވަ އެވެ. އޭގެ އިތުރުން ވަގު ފޯމު ހުށަހަޅާ ޕާޓީތައް 10،000ރ. އިން ޖޫރިމަނާކުރަން ވަނީ ނިންމައިފަ އެވެ.
އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބް "މިހާރު" އަށް މިއަދު ވިދާޅުވީ ކުރިއަށް އޮތް އަހަރުގެ ބަޖެޓު ފާސްކުރުމުގެ ކުރިން ޕާޓީތަކުގެ މެމްބަރުންގެ އަދަދު އިތުރުކުރުމަށް ކޮންމެ އަހަރެއްގެ ފަހު ކޮޅު ވެސް ގިނަ އަދަދެއްގެ ފޯމު ހުށަހަޅާ ކަމަށެވެ.
އެ ގޮތަށް، އެ ކޮމިޝަނަށް އެންމެ ގިނައިން ފޯމު ހުށަހަޅަނީ، ހަބީބު ވިދާޅުވި ގޮތުގައި، އޮކްޓޯބަރު، ނޮވެމްބަރު އަދި ޑިސެމްބަރު މަހުގަ އެވެ. އެއީ، ދައުލަތުން ސިޔާސީ ޕާޓީތަކަށް ދޭ ފައިސާ ލިބެނީ ޕާޓީގައި 10،000 އަށްވުރެ މެމްބަރުން ގިނަވުމުންނެވެ.
ނަމަވެސް ހަބީބް ވިދާޅުވީ މިދިޔަ މަހުން ފެށިގެން ފޯމު ހަރުދަނާ ކުރުމުގެ އުސޫލަށް ގެނައި ބަދަލާ ގުޅިގެން، ޕާޓީތަކުން ހުށަހެޅި ފޯމުގެ އަދަދު، އޭގެ ކުރީ އަހަރަށް ވުރެ މި ފަހަރު މަދުވެފައިވާ ކަމަށެވެ.
ޑިސެމްބަރު، 2021 ގައި އީސީއަށް ޕާޓީތަކުން 22،398 ފޯމު ހުށަހެޅި އެވެ. އެކަމަކު، މިދިޔަ މަހު ހުށަހެޅީ 1،013 ފޯމެވެ.
"ފޯމުތަކުގެ ސައްހަކަން ކަށަވަރުކުރުމުގެ މި ބަދަލުން އެނގުނު މި މައްސަލަތައް ކުޑަވާނެކަން." ހަބީބު ވިދާޅުވި އެވެ.
ސިޔާސީ ޕާޓީތަކަށް ވަނުމަށް ޕާޓީތަކުން ހުށަހަޅާ ފޯމުގެ ސައްހަކަން އިތުރަށް ކަށަވަރުކުރުމަށް ފޯމުގައިވާ ފޯނު ނަންބަރަށް އެސްއެމްއެސް ކުރުމާއި އީސީގެ ވެބްސައިޓުގައި ފޯމުގެ މައުލޫމާތު ހިމަނައި ޝަކުވާ ހުށަހެޅުމަށް ހަތް ދުވަސް ދެ އެވެ.
