މިފަހަރު އޮސްކާއަށް "ކްރައިސިސް" ޓީމެއް އުފައްދައިފި

މިދިޔަ އަހަރުގެ އޮސްކާގައި ވިލް ސްމިތު، ކްރިސް ރޮކްގެ މޫނުމަތީ ޖަހަނީ.

އަހުމަދު އަރުޝަމް، މިހާރު

28 ފެބުރުއަރީ 2023 - 06:02

މިދިޔަ އަހަރުގެ އޮސްކާ އެވޯޑު ހަފުލާގައި ވިލް ސްމިތު، ކްރިސް ރޮކްގެ ކޯތާފަތް މަތީގައި ޖެހި މައްސަލައަށް ފަހު، އޮސްކާގެ ސެކިއުރިޓީ ވަރުގަދަކުރުމަށް "ކްރައިސިސް" ޓީމެއް އުފައްދައިފި އެވެ.

މިދިޔަ އަހަރު ބޭއްވި އޮސްކާ އެވޯޑު ހޯސްޓުކުރި ކޮމީޑިއަން، ކްރިސް ވާހަކަދައްކަމުން ވިލްގެ އަންހެނުން ޖޭޑާ ސްމިތަށް ހަޖޫ ޖެހުމުން، އައި ރުޅީގައި ސްޓޭޖަށް އަރާ ކްރިސްގެ ކޯތާފަތް މަތީގައި ޖެހި މައްސަލަ ވަރަށް ހޫނުވި އެވެ. އަދި މިހާރު ވަނީ، 10 އަހަރު ވަންދެން އޮސްކާގައި ބައިވެރި ނުވެވޭ ގޮތަށް ވިލް ސަސްޕެންޑްކޮށްފަ އެވެ.

One moment you're laughing hard at a joke targeted at your wife. The next moment you're slapping Chris Rock.

Will Smith deserves a separate Oscar Award for this switch in character. pic.twitter.com/htUJURg27I
— St. Oracle🇳🇬🇳🇬 (@call_me_oracle) March 28, 2022

އަންނަ މަހު 12 ގައި ބާއްވަން ހަމަޖެހިފައިވާ 95 ވަނަ އޮސްކާ އެވޯޑު ހަފުލާ ކުރިއަށް ދާ ވަގުތު ދިމާވެދާނެ ކޮންމެ ކަހަލަ ކަމަކަށް ވެސް އެޓެންޑުވާން ތައްޔާރަށް ތިބި "ކްރައިސިސް" ޓީމް އެކުލަވާލިކަން، ދަ އެކަޑަމީ އޮފް މޯޝަން ޕިކްޗާ އާޓް އެންޑް ސައިންސްގެ ސީއީއޯ ބިލް ކްރޭމާ، "ޓައިމް" އަށް ދިން އިންޓަވިއުއެއްގައި ވަނީ އިއުލާންކޮށްފަ އެވެ.

"މިއީ މީގެ ކުރިން ދުވަހަކު ވެސް މި ހަފްލާގައި ކުރިކަމެއް ނޫން. އެބަހުރި އެހެން ގިނަ ޕްލޭންތައް ވެސް. ވަރަށް ގިނަ ސިނޭރިއޯތައް ބަލައިފިން. އުންމީދަކީ، މިވަގުތަށް ލަފާނުކުރެވޭ ކަމެއް ދިމާވިޔަސް އަހަރެމެންގެ ޓީމު އެކަމަކަށް ތައްޔާރަށް ތިބުން،" ކްރޭމާ ބުންޏެވެ.

ކްރޭމާ ބުނިގޮތުގައި، އުއްމީދަކީ "ކްރައިސިސް" ޓީމް ބޭނުންކުރަން ޖެހޭ ފަދަ ހާދިސާއެއް ނުހިނގުމެވެ.

މިފަހަރުގެ އޮސްކާ އެވޯޑުގެ ނޮމިނޭޝަންތައް މިދިޔަ މަހު އިއުލާނުކޮށްފައިވާއިރު، ޝޯ ހޯސްޓު ކުރަން ހަމަޖެހިފައި ވަނީ ޖިމީ ކިމެލް އެވެ. މިއީ އޭނާ އޮސްކާ ހޯސްޓުކުރާ ތިން ވަނަ ފަހަރެވެ.

އެވޯޑް ހަފުލާގައި ޕަފޯމްކުރަން ހަމަޖެހިފައިވާ އާޓިސްޓުންގެ ތެރޭގައި ރިއާނާ ވެސް ހިމެނޭއިރު، ކުރިއަށް އޮތް ދުވަސްތަކުގައި އެހެން އާޓިސްޓުންގެ ނަމާއި ހުށަހަޅައިދޭ ލަވަތައް އިއުލާނުކުރާނެ ކަމަށް ވެސް އެކަޑަމީން ބުންޏެވެ.