ކުރީގެ ރައީސް ޑރ. މުހައްމަދު ވަހީދު މިއަދު ޕީޕީއެމުން ވަކިވެވަޑައިގެންފި އެވެ.
ޕީޕީއެމްގެ ސެޕްޝަލް އެޑްވައިޒަރުގެ މަގާމުގައި ވެސް ހުންނެވި ޑރ. ވަހީދު އެ ޕާޓީން ވަކިވެ ވަޑައިގަތުމަށް ނިންމެވިކަން އިއުލާން ކުރައްވައި، މިރޭ ކުރެއްވި ޓްވީޓްގައި ވިދާޅުވީ، މީގެ 10 އަހަރު ކުރިން، ޕީޕީއެމާ ގުޅިވަޑައިގަތީ އެމަނިކުފާނުގެ ވެރިކަމުގައި ފެއްޓެވި ތަރައްގީގެ މަޝްރޫއުތައް ކުރިއަށް ގެންދެވުމުގެ ނިޔަތުގައި ކަމަށެވެ.
އެކަމުގެ ގިނަ މަސައްކަތްތަކެއް އަދިވެސް ކުރިއަށް ހުރި ނަމަވެސް، އޭގެ ގިނަ ކަންކަން ހާސިލުވެފައިވާ ކަން ވަހީދު ހިއްސާކުރެއްވި ކުރު މެސެޖުގައި ވިދާޅުވި އެވެ.
އެހެންކަމުން، ޕީޕީއެމުން ވަކިވެވަޑައިގަންނަވަން ނިންމެވީ ވަރަށް ފުންކޮށް ވިސްނަވާފައި ކަމަށް ވަހީދު ވިދާޅުވި އެވެ.
"އަޅުގަނޑަށް ގަބޫލުކުރެވެނީ، އަޅުގަނޑުގެ އިލްމާއި ހުނަރާއި ތަޖުރިބާގެ ބޭނުން ރައްޔިތުންނަށް ފައިދާވާނެ ގޮތަކަށް ހިފޭނެ އަމާން، އިހުލާސްތެރި އަދި ތެދުވެރި މާހައުލެއް އޮތުމަކީ ވަރަށް މުހިންމު ކަމެއް ކަން،" އިސްތިއުފާ ދެއްވި ސަބަބު ހާމަކުރައްވައި ވަހީދު ވިދާޅުވި އެވެ.
ވަހީދު ޕީޕީއެމުން ވަކިވެ ވަޑައިގަތުމަށް ނިންމެވީ އެ ޕާޓީގެ ރިޔާސީ ޓިކެޓާ މެދު އުފެދުނު ހިޔާލު ތަފާތުވުންތަކަށް ފަހު ޕީއެންސީގެ ފަރާތުން ޑރ. މުހައްމަދު މުއިއްޒު ރިޔާސީ އިންތިހާބަށް ނުކުންނަވާފައި ވަނިކޮށެވެ. އޭނާ ވެސް އެ ޓިކެޓަށް ޝައުގުވެރިވި ކަމުގެ އަޑުތައް ފެތުރުނެވެ.
ރިޔާސީ އިންތިހާބުގައި ވާދަކުރެއްވުމަށް ވަހީދުގެ ކުށުގެ ރެކޯޑް ސާފު ކުރެއްވުމަށް ވެސް އެ މަނިކުފާނު ހުށަހެޅުއްވި އެވެ. ނަމަވެސް ކުރީގެ ރައީސް އަބްދުﷲ ޔާމީނަށް ކުރިމަތިނުލެއްވޭ ހާލަތު ކުރިމަތިވުމާ އެކު، ޕީއެންސީގެ ސެނެޓްގެ ތާއީދާ އެކު ޓިކެޓް ހޯއްދެވީ މުއިއްޒެވެ.