ވިލާ އިންޓަނޭޝަނަލް ހައި ސްކޫލުން ގްރޭޑް 11 އަށް ފުރުސަތު ހުޅުވާލައިފި

ވިލާ އިންޓަނޭޝަނަލް ހައި ސްކޫލްގެ ނޫސްވެރިންގެ ބައްދަލުވުމުގައި ބައިވެރިވި ސްކޫލްގެ އިސްވެރިން. -- ފޮޓޯ: ވިލާ އިންޓަނޭޝަނަލް ހައި ސްކޫލް

އައިޝަތު ޖަޒްލީ، މިހާރު

15 އޯގަސްޓް 2023 - 11:49

2 comments

ވިލާ އިންޓަނޭޝަނަލް ހައި ސްކޫލަށް ވަނުމުގެ ފުރުސަތު ހުޅުވާލައިފި އެވެ.

އެ ސްކޫލުން އެޑްމިޝަން އިއުލާނުކޮށް ބޭއްވި ނޫސްވެރިންގެ ބައްދަލުވުމުގައި އެ ސްކޫލުގެ ޕްރިންސިޕަލް ސައީދު އަހުމަދު ވިދާޅުވީ މި މަހުގެ 29 ވަނަ ދުވަހުގެ ނިޔަލަށް، އެ ސްކޫލަށް ވަނުމަށް ބޭނުންވާ ދަރިވަރުންނަށް އެ ފުރުސަތު ހުޅުވާލާފައިވާ ކަމަށެވެ. އޭނާ ވިދާޅުވީ ގްރޭޑް 11 ގައި 800 ދަރިވަރުންގެ ޖާގަ އެބަ އޮތް ކަމަށެވެ.

ވިލާ އިންޓަނޭޝަނަލްގެ ޕްރިންސިޕަލް ވިދާޅުވީ ކޮންމެ އަހަރަކު ވެސް ދަރިވަރުންނަށް އެ ދަރިވަރުންގެ ތަރައްގީއަށް އިތުރު މާއްދާތައް ތައާރަފްކުރަމުންދާ ކަމަށެވެ. އެގޮތުން މި އަހަރު ޗައިނީޒް ލެންގުއެޖް އަލަށް ފެށުމަށް ހަމަޖެހިފައިވާ ކަމަށާއ މި މާއްދާ ކިޔަވާދޭނީ ޗައިނާގެ ދެ ޔުނިވަސިޓީއަކާ އެކު ކަމަށް ވިދާޅުވި އެވެ.

ޕްރިންސިޕަލް ސައީދު ވިދާޅުވީ އެ މާއްދާ ކިޔަވަ ދަރިވަރުންނަށް ޗައިނާ ސަރުކާރުންދޭ ސްކޮލާޝިޕުތަކާއި އެ ގައުމުގެ ޔުނިވާސިޓީތަކުން ކިޔެވުމުގެ ފުރުސަތު ހޯދުމަށް މަގުފަހިވެގެން ދާނެ ކަމަށެވެ. އަދި އެ ސްކޫލުން މަސައްކަތް ކުރަނީ ދަރިވަރުންގެ މުސްތަގުބަލަށް ބޭނުންތެރި މާއްދާތަކާއި ތަޖުރިބާތައް ހޯދައިދިނުމަށް ކަމަށް ވިދާޅުވި އެވެ.

ނޫސްވެރިންގެ ބައްދަލުވުމުގައި ސައީދު ވިދާޅުވީ މިނިސްޓްރީގެ މިންގަނޑަށް ފާސްވާ ދަރިވަރުންނަށް އެއްވެސް ފީއެއް ނުދައްކައި ހިލޭ ކިޔެވޭނެކަން ފާހަގަކުރެއްވި އެވެ.

ވިލާ އިންޓަނޭޝަނަލްގައި ތައުލީމީ ގޮތުން ރަނގަޅު ނަތީޖާ ލިބިފައިވާ ދަރިވަރުންނަށް ބްރިލިއަންސް ސްޓޫޑެންޓްސް ސްކޮލާޝިޕާއި އިތުރު ހަރަކާތްތަކާއި ކުޅިވަރުގެ މުބާރާތްތަކުން ވަނަތައް ހޯދާފައިވާ ދަރިވަރުންނަށް ސްޕޯޓްސް އެންޑް ކޯ ކަރިކިއުލާ ސްކޮލާޝިޕަށް ކުރިމަތިލުމުގެ ފުރުސަތު ލިބޭނެ އެވެ. މި ސްކޫލާއި ސްކޫލުން ހުޅުވާލާފައިވާ އެޑްމިޝަންއާ ގުޅޭ މައުލޫމާތު ހޯދަން ބޭނުންވާ ދަރިވަރުންނަށް އަމާޒުކޮށް މި ހަފްތާ ބަންދުގައި އޯޕަން ޑޭ އެއް ބާއްވާނެ އެވެ.

ވިލާ އިންޓަނޭޝަނަލްގައި ކިޔެވުމުގެ ފުރުސަތު ލިބޭ ދަރިވަރުންގެ ލިސްޓު މި މަހުގެ 31 ވަނަ ދުވަހު ނެރޭނެ އެވެ. ދަރިވަރުންގެ ކިޔެވުން ފެށޭނީ އަންނަ މަހުގެ ތިން ވަނަ ދުވަހު އެވެ.

ވިލާ އިންޓަނޭޝަނަލް ހައި ސްކޫލްގެ ވެބްސައިޓު މެދުވެރިކޮށް ގްރޭޑު 11 އަށް އެޕްލައި ކުރެވޭނެ އެވެ.