ދިވެހި ޕްރިމިއާ ލީގުގައި ރޭ ޓީސީ އާއި ބުރު ކުޅުނު މެޗުގައި، ޓީސީގެ ހަމައެކަނި ގޯލު ޖެހި ޒައްޔޫ ބޯޅަ ހިފައިގެން ކުރިއަށް ދަނީ، މެޗުގެ މޮޅު ކުޅުންތެރިއަކީ ވެސް އޭނާ.-- ފޮޓޯ: ފަޔާޒް މޫސާ/ މިހާރު
30 އޯގަސްޓް 2023 - 10:18
ބުރު ސްޕޯޓްސް ކަލްބްގެ މައްޗަށް 1-0 އިން ކާމިޔާބު ހޯދައި ޓީސީން ދިވެހި ޕްރިމިއާ ލީގުގެ ގަދަ ހަތަރެއްގައި އޮވެ ދިގު ބުރޭކަކަށް ހިނގައްޖެ އެވެ.
ރޭ ގެ މެޗަށް ފަހު، އޭއެފްސީ ކަޕުގައި މާޒިޔާ ކުޅޭ މެޗުތަކަށް ތައްޔާރުވުމަށާއި ވޯލްޑް ކަޕް ކޮލިފައިންގެ ޕްރިލިމިނަރީ ބުރުގެ މެޗަށް ތައްޔާރުވާން، ލީގު ދެ މަސް ދުވަހަށް މެދުކަނޑާލީ އެވެ. މިއީ ލީގު ފެށިފަހުން ދިގު މުއްދަތަކަށް ލީގު މެދުކަނޑާލި ދެވަނަ ފަހަރެވެ. މީގެ ކުރިން ޖޫން ޖުލައިގައި ބޭއްވި ސާފް ޗެމްޕިއަންޝިޕަށް ތައްޔާރުވާން ވެސް ގާތްގަނޑަކަށް ދެ މަހުގެ ބްރޭކެއް ނެގި އެވެ.
ލީގުގެ މެޗެއް ދެން އޮންނާނީ އޮކްޓޯބަރު 28 ގަ އެވެ. އެ ދުވަހު ހަވީރު ކުޅޭ މެޗުގައި ކްލަބް އީގަލްސް ނުކުންނާނީ ޔުނައިޓެޑް ވިކްޓަރީއާ ދެކޮޅަށެވެ. އެ ރޭ ކުޅޭ މެޗުގައި ސުޕަ ޔުނައިޓެޑް ސްޕޯޓްސް އާއި ސަސް ވާދަކުރާނެ އެވެ.
ގައުމީ ފުޓްބޯޅަ ދަނޑުގައި ރޭ ބުރާ ދެކޮޅަށް ކުޅުނު މެޗުގައި ޓީސީގެ ލަނޑު 32 ވަނަ މިނެޓްގައި ޖެހީ ޒަޔާން ނަސީރު (ޒައްޔޫ) އެވެ. މި ދެ ޓީމު ފުރަތަމަ ބުރުގައި ކުޅުނު މެޗު 1-0 އިން ކާމިޔާބު ކުރީ ބުރެވެ.
ޓީސީ ހަތަރުވަނައިގައި އޮތީ 19 ޕޮއިންޓް ހޯދައިގެންނެވެ. ތިންވަނައިގައި އޮތީ 21 ޕޮއިންޓާ އެކު އޮތް ސުޕަ ޔުނައިޓެޑް ސްޕޯޓްސް (ސަސް) އެވެ. ދެވަނައިގައި އޮތީ މާޒިޔާ އެވެ. އެ ޓީމަށް 22 ޕޮއިންޓެވެ. މާޒިޔާ އަށް ވުރެ އެއް މެޗު އިތުރަށް ކުޅެގެން އީގަލްސް އެއްވަނައިގައި އޮތީ 23 ޕޮއިންޓާ އެކު އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
އެގިދާނެތާ!
31 August 2023
އަލުން ފެށޭނެތޯ ބަލާނަން!!!