ރައީސްގެ ރަނިން މޭޓް އަސްލަމް މިރޭ އައްދޫގައި ވާހަކަ ދައްކަވަނީ: އަސްލަމް ވިދާޅުވީ މި ސަރުކާރުން ގެނައި ވަރުގެ ތަރައްގީއެއް އައްޑޫއަށް މީގެ ކުރީގެ އެއްވއެސް ސަރުކާރަކުން ގެނެސްފައި ނުވާ ކަމަށް.-- ފޮޓޯ: އެމްޑީޕީ
08 ސެޕްޓެމްބަރ 2023 - 03:10
9 comments
އައްޑޫގެ ތަރައްގީއަށްޓަކައި އައްޑޫ ރައްޔިތުން ކުރަންވީ ކަމަކީ ރައީސް އިބްރާހިމް މުހައްމަދު ސޯލިހް އިންތިހާބު ކުރުން ކަމަށް އެމަނިކުފާނުގެ ރަނިންމޭޓް މުހައްމަދު އަސްލަމް ވިދާޅުވެއްޖެ އެވެ.
ހިތަދޫގައި މިރޭ ބޭއްވި ޖަލްސާގައި ވާހަކަ ދައްކަވަމުން އަސްލަމް ވިދާޅުވީ މި ސަރުކާރުން އައްޑޫގެ ތަރައްގީއަށް ކޮށްދީފައިވާ ކަންކަމާއި ކުރިއަށް އޮތް ދައުރުގައި ކޮށްދޭން މެނިފެސްޓޯގައިވާ ކަންކަން ފުރިހަމަ ކުރުމަށްޓަކައި އައްޑޫ ރައްޔިތުން ރައީސް ހޮވަން ޖެހޭ ކަމަށެވެ.
"ތިބޭފުޅުންނަށް، މި ގައުމަށް، ތިބޭފުޅުންގެ މި އައްޑޫއަށް، ތިބޭފުޅުންގެ މި ރާއްޖެއަށް ތިބޭފުޅުންގެ މި ރަށްރަށަށް ކޮށްދެވޭނެ އެންމެ ބޮޑު ހިދުމަތަކީ މިވަގުތު ރައީސް އިބްރާހިމް މުހައްމަދު ސޯލިހް އަށް ދެވަނަ ދައުރެއް ދެއްވުން." އޭނާ ވިދާޅުވި އެވެ.
"އިނގިރޭސިން މިތާ ތިބެގެން ކުރި ހަރަަދަށްވުރެ މާ ބޮޑެތި ހަރަދުތަކެއް މި ކުރެވުނީ މި ފަސް އަހަރު ތެރޭގައި. އެއީ އެއާޕޯޓު ތަރައްގީ ކުރުން ކަމުގައި ވިޔަސް، މިވީހާތަނަށް އައްޑޫ އެއާޕޯޓު ތަރައްގީ ކުރަން ސޮއި ކުރެވިފައި ހުރި ކަންކަމަށް ބެލިކަމުގައި ވިޔަސް. އަދި އޭރު އެއާޕޯޓުގައި އިނގިރޭސިން ބަހައްޓާފައި ހުރި އިންޖީނާއި މިހާރު މި އަޅާ އިންޖިނު ގެއާ ބައްލަވާ."
އަސްލަމް ވިދާޅުވީ އެހެން ސަރުކާރުތަކުން އައްޑޫއަށް ކޮށްދީފައިވާ ކަންކަމުގެ ވާހަކަ ދައްކަވަން ބޭނުން ނުވާ ކަމަށެވެ. ސަބަބަކީ އައްޑޫގެ ތަރައްގީއަށް މި ސަރުކާރުން ކުރި ކަންކަން ކިރިޔާ ވެސް އަޅާކިޔޭނީ އިނގިރޭސިން އައްޑޫގައި ތިބި އިރު ކުރި ކަންތައްތަކާ ކަމަށް އަސްލަމް ވިދާޅުވި އެވެ.
"އުފާވެރި އައްޑޫ" ޖަލްސާގެ ތެރެއިން: އެއްބުރުން އިންތިހާބު ކާމިޔާބުވާނެ ކަމަށް އަސްލަމް ވިދާޅުވި.-- ފޮޓޯ: އެމްޑީޕީ
ރައީސް މިރޭ ވަނީ އައްޑޫގެ ތަރައްގީއަށް ކުރިއަށް އޮތް ފަސް އަހަރު ކުރައްވާނެ ކަންކަން އިއުލާން ކުރައްވާފަ އެވެ. އޭގެ ތެރެއިން ފާހަގަ ކޮށްލެވޭ ބައެއް ކަންކަމަކީ:
- ޒަމާނީ ވިޔަފާރި ހަބަކަށް އައްޑޫ ހެދުން
- އިކޯ ޓޫރިޒަމް ތަރައްގީކުރުން
- ރޭސިން ޓްރެކެއް އެޅުން
- މަގު ހެދުމާއި ބޯހިޔަވާހިކަން ހައްލު ކުރަން 1000 ފްލެޓް އެޅުން
- ހޮސްޕިޓަލް އިތުރަށް ތަރައްގީކުރުން
- އާރްޓީއެލުން އައްޑޫ ގުޅާލުން
އަސްލަމް ވިދާޅުވީ އައްޑޫއަށް ދެން އޮތް މެނިފެސްޓޯގައި ހުރި ކަންކަން ނިމޭއިރު އައްޑޫގައި ކުރަން އިތުރު ކަމެއް ނޯންނާނެ ކަމަށެވެ.
އަންނަ ދައުރެއްގައި އައްޑޫގެ ޓޫރިޒަމަށް ގެނެވޭ ބަދަލާއެކު އައްޑޫގެ އިގްތިސޯދު މާ ބޮޑުތަކުން ކުރިއަށްދާނެ ކަމަށެވެ. އެގޮތުން އައްޑޫގެ ތަސައްވަރު ކުރަހާ ނިމިފައިވާ ކަމަށާއި ކުރިއަށް އޮތް ފަސް އަހަރު ނިމޭއިރު ކުލަ ޖެހި، އައްޑޫ މީހުންނަކީ ފަހުރުވެރި އައްޑޫ ދަރިންގެ ގޮތުގައި ތިބެވޭނެ ކަމަށް އަސްލަމް ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އައްޑޫއަންސް
08 September 2023
5 އަހަރުގެ އިންތިހާބެއް ތިނިމުނީ މިހާރުވެސް ހުރީ އައްޑޫއައް ޓަކައި ދެން ބޭނުންވަނީ ބަދަލެއް
އަކްމެޑް
08 September 2023
އައްޑޫ މީހުނަކީ ވަރަށް ފަސޭހައިން ބޮލަށް ޗިޕު ޖެހޭ ބައެއް.
ދޯޕައްޓާ
08 September 2023
ކ.މާލޭމީހުނަށް ބައިތުލްމާލުން ކ.ހުޅުމާލެ ތަރައްގީކޮށްދޭ މަކަރުވެރި ރޭވުން އައްޑޫއިންވެސް ބޭނުންކުރަންޖެހޭ. ސަރުކާރުން އައްޑޫއިން ރައްޔިތުންނަށް ގޯތިދެންޏާ ކައުންސިލަށް ފައިސާދައްކާފަ ބިން ގަނެފަ ދޭންވާނީ. ހުޅުމާލެއިން ކ.މާލޭމީހުނަށް ގޯތިދޭން 5 ހެކްޓަރުގެ ބިންކޮޅެއް ސަރުކާރަށްދިނީ 800 މިލިއަން އަތުލައިގެން. އޮފީހެއް ހެދިއަސް ސަރުކާރުން އެތަނަށް ލާރިދީފަ ބިން ގަންނަންޖެހެނީ. އައްޑޫއަށްވެސް މިގޮތް އޮންނަންޖެހޭ.
ގޯސް
08 September 2023
ކޮބައިތޯ ދިވެހިންގެ ރާއްޖޭގަ މީހުންއުޅޭ އެހެން ރައްތައް؟ ތިޔަވިދާޅުވީ ވަރައް ގޯސް ބަސްފުޅެއް ހަމައެކަނި ވަކިބަޔަކަށްޓަކާ ރައީސަކު ހޮވާވާހަކަ. އެގޮތައްހޮވާނީ ސިޓީކައުންސިލުގެ ރައީސް. އެދުމުން ފުރިގެންވާ ބައެއް ތިޔައީ. ރާއްޖޭގެ އެހެން ރައްޔިތުން މިކަމަށް ވިސްނަމާތޯ!
މުޑަހަންޖާ
08 September 2023
ދައުލަތުގެ އަހަރީ ބަޖެޓު 40 ބިލިއަނަށް އަރައިފި، އެއީ 5 އަހަރަކުން 200 ބިލިއަން. އެއިން 1 ނުވަތަ 2 ބިލިއަން އައްޑޫއަށް ހަރަދުކޮށްފީމޭ ކިޔާފަ ކޮންމެ 5 އަހަރަކުން މިސަކަރާތެއް އެބަޖަހާ، މަދުރަސާތަކުގަ ހިސާބު ކިޔަވަދޭއިރު މިވަރަށް ބަޔަކު ބީތާވީމަ އަހަރެމެން ހައިރާންވަނީ، ބަލަގަ ދައުލަތުގެ ފައިސާއިން އައްޑޫއަށް ހައްގުވަނީ 1% ނޫނޭ %25 ހައްގޭ އާބާދީގެ ނިސްބަތުން.
އުދުހޭ
08 September 2023
ހޮވިފައޮއްވާ ދެން ކީއްކުރަންތޯ އެހާބޮޑަށް އާދޭސް ދަންނަވަނީ؟ އިބޫ ބުނި މިކަން މިއޮތީ ނިމިފައޭ އެއްބުރުން.
ނާއިންސާފަށް ނޯ ވޯޓް
08 September 2023
އެތައް ސަތޭކަ އަހަރެއް ވެއްޖެ ރަށްރަށު މީހުން މާލެއަށް ބަރޯސާކުރުވާތާ. އަދިވެސް ދަނީ ކުރިއަށް. ދަނޑެއް، ބަނދަރެއް، މަގެއް ހާވާލާފަ އެއީ ރަށްރަށަށް ފުދޭވަރަށްވުރެެވެސް އިތުރުކަމަށް ވިސްނަދޭން އުޅެނީ. ވިސްނާލަ! ވޯޓް ހޯދަން މާލެ މީހުންނަށް ގޯތިދޭން ފަޅުތައް ހިއްކާ ވާހަކަ. އެއީ ހަމަ ފަޅެއް ހިއްކާލުމެއް ނޫން. އެކަމަކު ހުރިހާ ވަސީލަތަަކާއެކު އަގުބޮޑު ތިންހަތަރު ސަހަރު ބިނާކުރާ ވާހަކަ. ޕްލޭނެއްވެެސްނެތި ހަމަ ފަށައިގަނެވިއްޖެ މާލެ ވީމަ. ސޮރީ! ނޯ ވޯޓް
އައްޑޫ ކޫދު
08 September 2023
އަސްލަމަކަށް ނެތް ތާއީދެއް އައްޑޫއަކު. މަވޯޓާ އާ އަސްލަމާ ރޮޒޭ ރީކޯ ޖާބިރު ސިޔާމު ކަހަލަ ފެއިލްވެފަ ތިބި ކަރަޕްޓު ބަޔަކު ތިބެގެން ނުދޭނަން ވޯޓެއް.
އަލީބަލީ
08 September 2023
އައްޑޫވެސް ސަލާމަތް ކުރެވޭނީ މުޅި ރާއްޖެ ސަލާމަތްކޮށްގެން . އައްޑު މީހުންނަށް މިސަރުކާރުން ވަރަށް އަނިޔާކޮށްފި . އައްޑޫ އަސްލަމަށް ރަނިންގ މޭޓްކަން ދެއްވީ އަސްލަމަށް ހެޔޮ އެދިގެން ނޫންކަން މިހާރު ތިޔަ ބަސްފުޅުތަކުން ވަރަށް ސާފު. އައްޑޫ އަސްލަމަށް ރަނިންގ މޭޓްކަން ދެއްވީ ހަމައެކަނި އައްޑޫ މީހުންގެ ވޯޓު ހޯދުމުގެ ބޭނުމުގައި ކަން ވެސް ވަރަށް ސާފު . ދަންނަވާލަން އޮތީ އައްޑޫ މީހުންނަކީ ރައީސް އިބޫ ގުރުބާން ކުރަން އޮތް ކަންބަޅި ބަކަރި އައނެއް ނޫން . ވަރަށް ވެދުން