ހިމަންދޫން ފަލަސްތީން ފަންޑަށް 230،000ރ.

ފަލަސްތީން ފަންޑަށް ފައިސާ އެއްކުރުމަށް އއ. ހިމަންދޫގައި ބޭއްވި ފަންޑްރެއިޒިން އިވެންޓުގައި އިސްކޮށް އުޅުނު ސްޓެލްކޯގެ މުވައްޒަފުން.-- ފޮޓޯ: ސްޓެލްކޯ

އިފްރާޒް އަލީ، މިހާރު

01 ނޮވެމްބަރ 2023 - 10:19

3 comments

އާބާދީގައި ގާތްގަނޑަކަށް 500 މީހުން ދިރިއުޅޭ އއ. ހިމަންދޫން ފަލަސްތީން ފަންޑަށް 230،000ރ. ޖަމާކޮށްފި އެވެ.

އެއީ އިޒުރޭލުގެ ލާއިންސާނީ ހަމަލާތަކުގައި ހާލުގައި ޖެހިފައިވާ ފަލަސްތީނުގެ މީހުންނަށް އެހީވުމަށް ހިމަންދޫގައި ހިންގި ފަންޑްރެއިޒިން އިވެންޓުން ލިބުނު ފައިސާ އެވެ. އެ އިވެންޓު އިންތިޒާމު ކުރީ ހިމަންދޫ އިންޖީނުގެ ހިންގާ ސްޓެލްކޯގެ މުވައްޒަފުންނެވެ.

ފަލަސްތީން ފަންޑަށް ފައިސާ އެއްކުރަން އއ. ހިމަންދޫގައި ބޭއްވި ފަންޑްރެއިޒިން އިވެންޓުގައި އިސްކޮށް އުޅުނު އެ ރަށުގެ މީހުން.-- ފޮޓޯ: ސްޓެލްކޯ

ސްޓެލްކޯ އިން މިއަދު އެކްސްގައި ކުރި ޕޯސްޓެއްގައި ބުނީ ފަލަސްތީނުގެ ރައްޔިތުންނަށް އެހީވާން ހިމަންދޫގެ އިންޖީނުގޭގެ މުވައްޒަފުންގެ އިސްނެގުމުގެ މަތިން އެ ރަށުގެ ސަރުކާރުގެ މުއައްސަސާތަކާއި ކުލަބް ޖަމިއްޔާތަކާއި ޓީމުތަކާ އަދި ހުރިހާ ރައްޔިތުން ޝާމިލްވާ ގޮތަށް ބޭއްވި "ހިމަންދޫ ރައްޔިތުން ފަލަސްތީނާ އެކު" އިވެންޓުން 230،000ރ. ލިބިފައިވާ ކަމަށެވެ.

އެ ފައިސާ މިހާރު އިންޓަނޭޝަނަލް އެއިޑް ކެމްޕޭން (އައިއޭސީ)އާ މިހާރު ހަވާލުކޮށްފައިވާ ކަމަށް ސްޓެލްކޯ އިން ބުންޏެވެ.

"މިފަދަ ކަންކަމުގައި އަޅުގަނޑުމެންގެ މުވައްޒަފުން އަބަދުވެސް ދައްކަވަމުން ގެންދާ ނަމޫނާއަށް ފަހުރުވެރިކަމާ އެކު ޝުކުރު ދަންނަވަން،" އެ ކުންފުނިން ބުންޏެވެ.

ފަލަސްތީން ފަންޑަށް ފައިސާ އެއްކުރަން އއ. ހިމަންދޫގައި ބޭއްވި ފަންޑްރެއިޒިން އިވެންޓުގައި ސްޓެލްކޯގެ މުވައްޒަފުން ބާބަކިއު ހަދަނީ.-- ފޮޓޯ: ސްޓެލްކޯ

ފަލަސްތީނަށް އެހީ ފޯރުކޮށްދޭން އަންނަ ދިވެހި އަމިއްލަ ޖަމިއްޔާއެއް ކަމަށްވާ އިންޓަނޭޝަލް އެއިޑް ކެމްޕެއިން (އައިއޭސީ)ން ހުޅުވާލާފައިވާ ފަންޑަށް މިހާތަނަށް ވަނީ 24 މިލިއަނަށް ވުރެ ގިނަ ރުފިޔާ ލިބިފަ އެވެ.

އިޒްރޭލުގެ ލާއިންސާނީ އަނިޔާތަކުގައި ހާލުގައި ޖެހިފައިވާ ފަލަސްތީނަށް އެހީވާން ރާއްޖޭގެ އެކި ރަށްރަށުގައި އަންނަނީ ތަފާތު ހަރަކާތްތައް ބާއްވަމުންނެވެ. އެކި ކުންފުނިތަކާއި ޖަމިއްޔާތަކާއި އާންމުން ވެސް އަންނަނީ ބޮޑެތި އަދަދުތަކުން ފައިސާގެ އެހީ ދެމުންނެވެ.