ކުރީ ސަރުކާރުން އެންމެ ފަހުން، މާލެ ރަށްވެހިންނަށް ދިން ގޯތީގެ ތެރެއިން އާބަންކޯގެ އިހްތިސާސްގައި ހިމެނޭ ބިންތަކުން ދިން ގޯތީގެ ބަދަލުގައި އެ ކުންފުންޏަށް މާލެ އަތޮޅުން ދެ ފަޅާއި ފައިސާގެ އަދަދެއް ދޭން ފިނޭންސް މިނިސްޓްރީން ނިންމައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އާބަންކޯގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވީ، ދެ ފަޅުގެ އިތުރުން ގާތްގަނޑަކަށް 7.9 މިލިއަން ރުފިޔާ ވެސް ސަރުކާރުން ދޭން އެއްބަސްވެފައި އެބަ އޮތް ކަމަށެވެ.
"ދެ ލެގޫނެއް ގެއްލުމުގެ ބަދަލުގެ ގޮތުގައި ދެއްވާފައި އެބަ އޮތް. އެއީ އެއްބައި. އޭގެ އިތުރުން 7.7-7.9 [މިލިއަން ރުފިޔާ]އާ ދެމެދުގެ އަދަދެއް ހޯދަން ސަރުކާރާއެކު ވާހަކަދެކެވެމުން މިދަނީ އެ އަދަދު ދައްކާނެ ގޮތަކާ ގުޅޭ ގޮތުން،" އޭނާ ވިދާޅުވި އެވެ.
މިދިޔަ ސަރުކާރުން ވަނީ މާލެ ސަރަހައްދުން 18،955 މީހުން ގޯއްޗަށް ޝަރުތު ހަމަވާކަމަށް ކަނޑައަޅައިފަ އެވެ. އޭގެ ތެރެއިން ގުޅިފަޅުން 2،218 ގޯތި ދޭ އިރު ހުޅުމާލެއިން 1،351 ގޯތި އަދި ގިރާވަރުފަޅުން 5،432 ގޯތި ދޫކޮށްފަ އެވެ.
