އައިއޯއައިޖީގެ ނައިބުރައީސަކަށް ދެވަނަ ދައުރަށް ޗަމްޕީ އިންތިހާބުކޮށްފި

އިންޑިއަން އޯޝަން އައިލެންޑް ގޭމްސްގެ އޮގަނައިޒިން ކޮމިޓީ (ސީއައިޖޭ) ގެ ނައިބުރައީސަކަށް ރާއްޖޭގެ އޮލިމްޕިކް ކޮމިޓީގެ ރައީސް މުހައްމަދު އަބްދު ސައްތާރު (ޗަމްޕީ) ދެވަނަ ދައުރަކަށް އިންތިހާބުކޮށްފި އެވެ.

އިންޑިއާ ކަނޑުގެ ޖަޒީރާ ގައުމުތަކުގެ ކުޅިވަރު ފެޑެރޭޝަންގެ ނައިބުރައީސްގެ މަގާމަށް، ސައްތާރު އެންމެ ފުރަތަމަ އިންތިހާބު ކުރީ 2020 ގަ އެވެ.

ސްވިމިން އެސޯސިއޭޝަންގެ ރައީސްގެ މަގާމު ވެސް އަދާކުރައްވަމުން އަންނަ ސައްތާރު ވަނީ ސީއައިޖޭގެ އެގްޒެކެޓިވް ކޮމިޓީ ނައިބު ރައީސްގެ މަގާމަށް އިންތިހާބުވުމުގެ ކުރިން ވެސް އެ ކޮމިޓީގެ މެންބަރުންނާ އެކު މަސައްކަތް ކުރައްވައިފަ އެވެ.

ރާއްޖޭން 2023 ގެ ގޭމްސް އަށް ބިޑް ކުރަން ހުށަހެޅުމުން ރާއްޖޭގެ ހާލަތު ބެލުމަށް ވަޑައިގެންނެވި ސީއައިޖޭގެ މެންބަރުން މާލެ ވަޑައިގެން ސަރުކާރުގެ މުއައްސަސާތަކާ ބައްދަލު ކުރެއްވި އިރު އޮލިމްޕިކް ކޮމިޓީގެ ނައިބު ރައީސްގެ މަގާމުގައި އޭރު ހުންނެވި ސައްތާރު ވަނީ އެ ބައްދަލުވުންތަކުގައި ވެސް ބައިވެރިވެ ވަޑައިގަތެވެ.

އެމްއޯސީގެ ރައީސްކަމަށް ވަޑައިގަތުމުގެ ކުރިން ނައިބުރައީސްކަން ދެ ދައުރުގައި އޭނާ ކުރެއްވި އެވެ. މަޝްހޫރު ވިޔަފާރިވެރިޔާ ޗެމްޕާ މުހައްމަދު މޫސާގެ ކޮއްކޮ ސައްތާރު އޮލިމްޕިކް ކޮމިޓީގެ ރައީސްކަމަށް ވަޑައިގެންނެވީ 2021 ގައި ބޭއްވި އިންތިހާބުގަ އެވެ.

ސީއައިޖޭގެ ކޮންގްރެސް އިއްޔެ ކުރިއަށް ގެންދިޔައީ، 2027 ގެ އިންޑިއަން އޯޝަން އައިލެންޑް ގޭމްސް ބާއްވާަން ހަމަޖެހިފައިވާ ކޮމޮރޯސްގެ ވެރިރަށް މޮރޯނީގަ އެވެ. އެ ކޮންގްރެސްގައި އެމްއޯސީގެ ސެކްރެޓަހީ ޖެނަރަލް ތަމޫހް އަހްމަދު ސައީދާއި ސީޑަބްލިއުޖީގެ އޮފިސަރު އިބްރާހިމް އީމާން ބައިވެރިވި އެވެ.