މަޖިލިސް އިންތިހާބުގައި ވޯޓުލާ ދުވަސް ބަންދު ކުރާނަން: ރައީސް

ރައްޔިތުންގެ މަޖިލީހުގެ އިންތިިހާބު ބާއްވަން އިލެކްޝަންސް ކޮމިޝަނުން މިހާރު ކަނޑައަޅާފައިވާ ތާރީހް، އާދީއްތަދުވަހަކާ ދިމާވާތީ، ސަރުކާރު ބަންދު ދުވަހެއްގެ ގޮތުގައި އެ ދުވަސް ހަމަޖައްސަވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރ. ދުވާފަރުގައި ވާހަކަފުޅު ދައްކަވަމުން ރައީސް ވިދާޅުވީ ރައްޔިތުންގެ މަޖިލީހުގެ އިންތިހާބު އޮންނަ ދުވަސް ރަސްމީ ބަންދު ނޫން ދުވަހަކާ ދިމާވީ އެމަނިކުފާނު ނުފޫޒު ފޯރުވައިގެން ކަމަށް އިދިކޮޅުން ތުހުމަތު ކުރިޔަސް، އެކަން ވީ އެހެން ނޫން ކަމަށެވެ.

ރައީސް ވިދާޅުވި ގޮތުގައި އިންތިހާބު އާދިއްތަ ދުވަހެއްގައި ބާއްވަން ޖެހުނީ ރައްޔިތުންގެ މަޖިލީހުން ފާސްކުރި އިންތިހާބުތަކާ ބެހޭ ގާނޫނަށް ގެނައި އިސްލާހުގެ ސަބަބުންނެވެ. އެ ދުވަސް ބަންދު ދުވަހެއްގެ ގޮތުގައި ކަނޑައަޅައިދޭން އިލެކްޝަން ކޮމިޝަނުން އެދިފައިވާއިރު ރައީސް ވިދާޅުވީ އޭޕްރީލް 21 ވަނަ ދުވަސް ބަންދު ކުރާނެ ކަމަށެވެ.

"އަޅުގަނޑަށް ވެސް ފެނުނީ ނޫހުން އާދިއްތަ ދުވަސް އިންތިހާބު ބާއްވަން ކަނޑައަޅައިފި ކަމަށް. އަޅުގަނޑު ވެސް ހިތަށް އެރި ކީއްވެބާއޭ އާދިއްތަ ދުވަސް މި ހެދީ. ދެން އަޅުގަނޑު އެހީމަ ބުނީ ގާނޫނު ފާސްކުރި ގޮތުން ބޭއްވެން އޮތް ދުވަހަކީ އެއީ،" ރައީސް ވިދާޅުވި އެވެ.

"އެ ބޭފުޅުން އާދިއްތަ ދުވަހަށް ހެދީ ގާނޫނުގައި އޮތް ގޮތްވީމަ، އަޅުގަނޑާ މަޝްވަރާ ކުރުމަށްފަހުއެއް ނޫން. ދެން އަޅުގަނޑު ދަންނަވާފައި އޮންނާނީ އެ ދުވަސް ބަންދު ކުރާނަމޭ."

ދުވާފަރުގައި ވާހަކަފުޅު ދައްކަވަމުން ރައީސް ވަނީ އެމްޑީޕީގެ އެޑްވައިޒަރު ކުރީގެ ރައީސް އިބްރާހިމް މުހައްމަދު ސޯލިހުގެ ނަން ނުގެންނަވައި، އެމަނިކުފާނަށް ފާޑުވިދާޅުވެފަ އެވެ.

ރައީސް ވިދާޅުވީ ރައްޔިތުން ވޯޓުލުން މަދު ކުރުވަން ވެގެން އާދިއްތަ ދުވަހު އިންތިހާބު ބާއްވާ ގޮތަށް ހަދައި އެ ދުވަސް ބަންދު ނުކުރަން ނިންމާފައިވާ ކަމަށް ވިދާޅުވެ ހެއްދެވީ މުޅިން ދޮގު ކަމަށެވެ.

ރައީސް ދުވާފަރަށް ވަޑައިގެންނެވުމުން މަރުހަބާ ކިޔަނީ: އިންތިހާބު އޮންނަ ދުވަަހަކީ ރަސްމީ ބަންދު ދުވަހެއްގެ ގޮތުގައި ހަމަޖައްސަވާނެ ކަމަށް ވިދާޅުވި.

އިންތިހާބާ ބެހޭ ގާނުނަށް އެމްޑީޕީން ގެނައި އިސްލާހުގައި ބުނާ ގޮތުން އިންތިހާބު ރޯދަ މަހާ ދިމާވެއްޖެ ނަމަ ބާއްވަން ޖެހޭނީ ރޯދަ މަސް ނިމޭތާ 10 ދުވަސް ފަހުންނެވެ. އެ މުއްދަތު އޭޕްރިލް 20 ވާ ހޮނިހިރު ދުވަހަށް ހަމަވެ އެވެ. އެހެންކަމުން ގާނޫނަށް ގެނައި އިސްލާހުގައިވާ ތާރީހުތަކުން ގުނާ ނަމަ، އިންތިހާބު ބޭއްވެން އޮތީ އެޕްރީލް 21 ގައި ކަމަށް އިލެކްޝަން ކޮމިޝަނުން ބުނެ އެވެ.

އެ ދުވަހު އިންތިހާބު ބާއްވަން ނިންމުމުން ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވީ، ރަސްމީ ބަންދު ދުވަސްތަކުގައި އިންތިހާބުތައް ބާއްވަނީ ގާނޫނުއަސާސީން ލިބިދޭ އަސާސީ ހައްގެއްގެ ފުރުސަތު ގިނަ ބަޔަކަށް ހޯދައިދޭން ކަމަށެވެ.

މަޖިލިސް އިންތިހާބު ރޯދަމަހާ ދިމާވާތީ، އެ އިންތިހާބު ރޯދަމަސް ނިމޭތާ 10 ދުވަސް ފަހުން ބޭއްވުމުގެ ބިލް ރައީސް މުއިއްޒު ތަސްދީގު ކުރެއްވި ނަމަވެސް އިބޫ ވިދާޅުވި ގޮތުގައި އިލެކްޝަންސް ކޮމިޝަނަށް ސަރުކާރުން "ބާރު ފޯރުވައި" އަދިވެސް ގެންދަނީ ސަރުކާރުގެ ރަސްމީ ދުވަހެއްގައި ވޯޓުލުން ބާއްވަން މަސައްކަތް ކުރަމުންނެވެ.