"މިހާރު" އަށް ދެއްވި ހާއްސަ އިންޓަވިއުގައި ޝަފީގު ވާހަކަދައްކަވަނީ. ޑޮލަރުގެ މައްސަލަ ހައްލު ކުރުމަށްޓަކާއި ބޭންކިން ނިޒާމުގެ ތެރެއިން ވިޔަފާރިތަކަށް މުއާމަލާތްތައް ހިންގޭނެ ގޮތްތަކެއް ފަހިކޮށްދޭން މަސައްކަތްތަކެއް ކުރަމުން އަންނަ ކަމަށް އޭނާ ވިދާޅުވި-- ފޮޓޯ: ފަޔާޒް މޫސާ / މިހާރު
25 އެޕްރީލް 2024 - 10:52
64 comments
ޑޮލަރަށް ބަރޯސާވާ ވަރު ކުޑަ ކުރުމަށާއި ޑޮލަރުގެ މައްސަލަ ހައްލު ކުރުމަށް މުހިއްމު ފިޔަވަޅުތަކެއް އަޅާނެ ކަމަށް ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެއްޖެ އެވެ.
"މިހާރު" އަށް ދެއްވި އިންޓަވިއުއެއްގައި ޝަފީގު ވިދާޅުވީ، ޑޮލަރުގެ މައްސަލަ ހައްލު ކުރުމަށް މަރުކަޒީ ބޭންކް އެމްއެމްއޭއާ އެކު ވަރަށް ގާތުން މަސައްކަތް ކުރަމުން އަންނަ ކަމަށެވެ.
އެ މައްސަލަ ހައްލު ކުރުމަށްޓަކައި މިހާރަށް ވުރެ ބޮޑަށް މޮނިޓަރިން ނިޒާމެއް އެކުލަވައިލާނެ ކަމަށް އޭނާ ވިދާޅުވި އެވެ.
"ރިސޯޓުތަކާއި ކުންފުނިތަކަށް ވެސް ބޭންކާ މެދު ޔަގީން ކަމެއް އެބަ އޮންނަން ޖެހޭ."
ޝަފީގު ވިދާޅުވީ، އެތައް ދުވަހެއް ވެފައިވާ މި މައްސަލަ ހައްލުކުރަން ދުވަސްތަކެއް ނަގާނެ ކަމަށާއި އެހެން ނަމަވެސް، މިހާރު އަޅަން ނިންމާފައިވާ ފިޔަވަޅުތަކުން ވެސް މުޅި ނިޒާމަށް ހެޔޮ ބަދަލުތަކެއް ގެނެވޭނެ ކަމަށެވެ.
ަވޮލެޓަކުން ޑޮލަރު ނަގަނީ. ރާއްޖޭގައި ބޭނުން ކުރަނީ ފެގް ރޭޓެއް--ފޮޓޯ: ނިޝާން އަލީ/މިހާރު
އެގޮތުން ކުދި ވިޔަފާރިތަކާއި ބޮޑެތި ވިޔަފާރިތަކުން ކަޅު ބާޒާރުން ފައިސާ މުއާމާލާތްތައް ހިންގާ ހިންގުން ހުއްޓޭނެ ގޮތްތައް ބަލަމުން އަންނަ ކަމަށް އޭނާ ވިދާޅުވި އެވެ. އެކަން ކުރާނީ ރާއްޖޭގައި ޑޮލަރު ހިފެެހެއްޓިގެން ކަމަށް އޭނާ ވިދާޅުވި އެވެ.
ރާއްޖޭގައި ޑޮލަރުގެ ރަސްމީ އަގު 15.42ރ. ގައި ހުރި ނަމަވެސް ކަޅު ބާޒާރުގައި 17ރ. އަށް ވުރެ މަތީގައި އުޅޭތާ ހަތަރު ވަރަކަށް އަހަރުވެއްޖެ އެވެ. މިކަމަށް ހައްލެއް ހޯދަން ކުރީ ސަރުކާރުން މަސައްކަތްތަކެއް ކުރި ނަމަވެސް އެކަމަށް އެކަށީގެންވާ ހައްލެއް ހޯދިފައެއް ނުވެ އެވެ.
"ވަޒީފާ ދީފައި ރަޖިސްޓާޑް މީހުންނާއި ރަޖިސްޓާ ނުކުރާ މީހުން ވެސް ބޮޑު އަދަދުތަކުން އެބަ ޑޮލަރު ބޭރުކުރޭ. އަދި ޓެކްސް ސިސްޓަމުގެ ތެރެއިން ރާއްޖެ އަށް މި ލިބޭ އަދަދު، ވިޔަފާރީގެ ނިސްބަތުން ކުރާ މުއާމަލާތްތަކަކީ ހަމަ ލިބެން ޖެހޭ އަދަދުތައްތޯ، ވިތްހޯލްޑިންގެ ގޮތުގައި ވެސް ކިހާވަރެއް އިތުރަށް ހޯދިދާނެތޯ،" އޭނާ ވިދާޅުވި އެވެ.
މި މައްސަލަ ހައްލު ކުރުމަށް އޮތް އަނެއް ހުރަހަކީ ބޭންކިން ސިސްޓަމުގެ ތެރެއިން ޑޮލަރުގެ މުއާމަލާތްތައް ހިންގުން މަދުވުން ކަމަށާއި ބޭންކިން ނިޒާމުގެ ތެރެއިން ފަސޭހަތައް ހަމަޖައްސައިފި ނަމަ، ބޭންކްތަކުގައި ޑޮލަރު ބަހައްޓާ ވަރު އިތުރުވާނެ ކަމަށް އޭނާ ވިދާޅުވި އެވެ. އަދި ބޭންކުގައި ބޭރު ފައިސާ ބަހައްޓައިގެން ވިޔަފާރިތަކަށް އެކަމުގެ ފައިދާތައް ވާ ނަމަ އެކަންކަން ވިޔަފާރިތަކުން ވެސް ކުރާނެ ކަމަށް އޭނާ ވިދާޅުވި އެވެ.
"ސަރުކާރުން އަޅުގަނޑުމެން ކޮށްދެން ބޭނުންވާ ކަމަކީ ރައްޔިތުންނަށް ވިޔަފާރިތަކަށް، ރާއްޖޭގެ މާހައުލަކީ ވިޔަފާރިވެރިންނަށް ރައްކާތެރި މާހައުލެއް ހޯދައިދިނުން. ބޭންކް ސިސްޓަމުގެ ތެރެއިން އެ ކުރާ މުއާމަލާތްތަކުގެ ޔަގީންކަން އިތުރު ކުރުން،" އޭނާ ވިދާޅުވި އެވެ.
ޝަފީގު ވިދާޅުވީ، ޑޮލަރުގެ މައްސަލަ ހައްލު ކުރުމަށް ސަރުކާރުގެ ތެރެއިން ފަހިކޮށްދޭން ޖެހޭ ކަންކަން ބަލައި ދެނެގަންނަމުން އަންނަ ކަމަށެވެ.
ޑޮލަރުގެ މައްސަލައަށް ހައްލެއް ހޯދުމަށް، ރާއްޖެއަށް އެންމެ ގިނައިން މުދާ އެތެރެ ކުރާ އިންޑިއާ އާއި ޗައިނާ އިން ގެންނަ މުދަލަށް ދިވެހި ރުފިޔާ އިން ފައިސާ ދެއްކޭ ގޮތް ހަދަން ވެސް މަޝްވަރާތައް އަންނަނީ ކުރަމުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޢޯކޭ
26 April 2024
ފަސްއަހަރު އޯކޭތަ
ދިވެހިން ދިވެހިންގެ ގޮތުގައި.
26 April 2024
ތިޔައްވުރެ ރަނގަޅުތާ, ހުރިހާ ކުދި ފިހާރަތަށް މިހާރު ހިންގަނީ ބޭރުމީހުން, އެމީހުން ބުނަނީ, އަހަރެން މައްސަލަނެތީ, ފިޔާރަ ހައުސް ބޮސް މައްސަލަނެތީ, ސަރުކާރު މައްސަލަނެތީ, ދެން ކަލޭ ކޮންމައްސަލަ ހުންނަނީ. !!! މީ ޖޯކެއްނޫން ހަގީގަތް, ދިވެހިން އެތިބެނީ ވެމްކޯ ކުނި އުފުލަން ބޭރުމީހުން ހިންގަނީ އަމިއްލަނފިހާރަ,
ބަލާށޭ
26 April 2024
ޑޮލަރު މައްސަލަ ހައްލުކުރަން ރިސޯރޓް ތަކުން މުސާރަދޭ މުވައްޒަފުންގެ މުސާރަ ޑޮލަރުން ޖަމާކުރަން ޖެހޭނީ ބޭންކް އޮފް މޯލްޑިވެސް ކަމަށް ހަދާ އެސްބީއައި އާއި ބީއޯސީ އަށް އެއްވެސް ރިސޯރޓަކުން މުވައްޒަފުންގެ މުސާރަ ޖަމާކޮށްގެން ނުވާނޭ ކަމަށް ރައީސްގެ ގަރާރަކުން ނިންމާ އެއިރުން ޑޮލަރު ތިޔާގިވާނެ އަދި ރާއްޖޭން ބޭރުގެ ސަޕްލަޔަރުންނަށްދޭ ކޮންޓްރެކްޓް ތައް ދިވެހި ކުންފުނި ތަކަށްދޭންވީ ފެނަކައިން ހުރިހާ އެއްޗެއް ދެނީ ލަންކާ އިންޑިއާ ކޮންޓްރެކްޓަރުންނަށޭ
ހަމީދުއަލި
26 April 2024
ރިސޯޓުތަކަށް ވަންނަ ޑޮލަރު ރާއްޖޭގެ ބޭންކުތަކަށް ޖަމާކުރަން ލާޒިމްކުރަންވީ //ހުރިހާ ލަމެއް ހައްލު ވީ އޭރުން..މިހާރި މިލިއަނުން ހަމާކުރަނޫ ބޭރުބޭންކްތަކަށް. ރިޒޯޓްތަކުންލިބޭޑޮލަރުގެ މަދުއެއްޗެއް ދިވެހިބޭންކައްވަންނަނީ!
ކަން ކުރޭ
26 April 2024
ބޭކާރު ވާހަކަ ނުދައްކާ ކަންކިރޭ. މަޖިލިސްވެސް ދީފަ މިތިބީ ބަލަން
ޑޮލަރު
25 April 2024
ބިދޭސީންގެ މައްސަލަ ހައްލުކޮށް، ދިވެހިންނަށް ވަޒީފާތައް އިތުރުކޮށްދެއްވާ. ބިދޭސީން ސުމާރެއް ނެތްވަރަށް ޑޮލަރު ބޭރުކުރޭ. ޢަދި ރިސޯޓުތަކަށް ވަންނަ ޑޮލަރު ރާއްޖޭގެ ބޭންކުތަކަށް ޖަމާކުރަން ލާޒިމްކުރަންވީ. ފުނިޖަހާފައި ރާއްޖެއަށް ވަންނަ ޑޮލަރު ބޭރު ގައުމުތަކުގެ ރުޒޯޓު އޯނަރުން އެހެން ގައުމުތަކުގެ ބޭންކުތަކުގައި ޖަމާކުރަނީ. ޑޮލަރުގެ މައްސަލަ ހައްލުކުރެވޭނީ މިކަމާއި ގުޅިފައިވާ އެހެން މައްސަލަތައްވެސް ހައްލުކޮށްގެން.
ލަތީފާ
25 April 2024
“އަޅާނެ ފިޔަވަޅުތަކެއް އެކުލަވާލަނީ” ފޮޑިތަޅާބަލަ!
މމމމމމމމމމމމމމމމމމއ
25 April 2024
ޑޮލަރު ކަޅުބާޒާރެއް އޮންނަނީ ބެންކުތަކުން ޑޮލަރުތައް ކާލާތީ. ބީއެމް އެލް އިން ޑޮލަރު ގަނޭ އެކަމަކު ނުވިއްކާ. ބެންކުން ވިއްކާ ނަމަ މީހުން ކަޅު ބްލެކް މާރކެޓުން ޑޮލަރު ގަންނަން ޖެހޭ ސަބަބެއް ނުފެނޭ.
ގަސްކުޑޭ
26 April 2024
ތިހެން ނުބުނެ އެމްއެމްއޭ އިން ބޭންކަށް ގަންނަ ޑޮލަރު ބްލެކް މާކެޓަށް ނެރެގެން ވިއްކަނީއޭ ބުނީމަ ރަގަޅުވާނެ.
ގުދުގުދާބެއްޔާ
25 April 2024
ކޮންބޭކާރު ވާހަކައެއް ދައްކާކައް! ޑޮލަރ އެމްއެމްއޭ އިން ބޭންކްތަކަށްދީ 15.42 ގެ ރޭޓުން ބޭނުން ވަރަކަށް ގަނެވޭގޮތް ހަދާބަލަ! އަނެއްކާވެސް ތިޔަ އުޅެނީ ޑޮލަރ ބޭންކް ރޭޓައްވުރެން ބޮޑުކޮއް ވިއްކާ މީހުންގެ ފައިގަ އަނދަގޮނޑި ޖަހަން! އޭރުން އަހަރުމެން ކުރާވިޔަފާރި އަށް ޑޮލަރވެސް ދެން ނުލިބި 26ރ ޑޮލަރ ގަންނަން ޖެހޭހިސާބައްދާނެ!ކެރުންޏާ ރިސޯޓްތަކުގެ އެއްވެސް ޓްރާންސެކްސަނެއް ރާޢްޖޭގެއެކައުންޓް މެދުވެރިކޮއް ނުހެދޭގޮތް ހަދާބަލަ!
ރަންނަ
25 April 2024
އިންޕޯޓާ އެކްސްޕޯޓް ބެލެންސް ނުކޮށް ތިކަން ކުރާވާކަ ދެއްކުމަކީ ވާނުވާނޭނގުން. ރާއްޖޭގެ އުފެއްދުންތެރިކަން އިތުރުކޮށް މަސްވެރިކަމާ ދަނޑުވެރިކަމުން އިގްތިސާދަށް ބޭނުންވާ ކަނާ އިތުރުކޮށް އެދާއިރާތަކުގެ އިންޕޯޓް ކޮންޓްރޯލްނުކޮށް ޑޮލަރެއް ގައުމަކު ނުހިފެހެއްޓޭނެ. މިހާރުވެސް ފިހާރަތަކުގަ އެބަހުރި އިންޕޯޓް ކޮށްގެން ވިއްކާ ޓޫނާކޭން. ތަރުކާރީގެ 99 ޕަސެންޓް ކުރަނީ އިންޕޯޓް
ހުސްބުޅިކެޔޮޅު
25 April 2024
ތިޔަ ވިދާޅުވާ ފިޔަވަޅު ތަކުގެ އިތުރަށް، ރަސްމީ ރޭޓްގައި ނޫންގޮތަކަށް ޑޮލަރު ގަނެ ވިއްކުން މަނާކުރާ ގަވާއިދު ހަރުކަށިކޮށް ތަންފީޒް ކޮށް، ވަކި މީހަކު ތަފާތުނުކޮށް، މުއާމަލާތް ކުރާ ފަރާތްތަކަށް ޑޮލަރު ވިއްކައިގެން ލިބޭ ފައިދާއަށް ވުރެ ބޮޑު އަދަދަކުން ޖޫރިމަނާ ކުރަން ކެރިއްޖެއްޔާ ވަރަށް އަވަހަށް މައްސަލަ ހައްލުވާނެ. ބާރުގަދަ ގިނަ ބަޔަކު ރުޅިއަންނާނެ އެކަމަކު ދެން އަންނަ ރިޔާސީ އިންތިޚާބްއަށް ވޯޓް ހޯދަން ވާއިރަށް ޑޮލަރު އޮންނާނީ ތިޔާގިވެފައި.