އިޒްރޭލު ސިފައިންގެ ޖީޕެއްގެ ބޮނެޓް މަތީގައި ފަލަސްތީނު މީހަކު އައްސާފައި ބާއްވައިގެން ދުއްވަނީ. -- ފޮޓޯ: ރޮއިޓާސް
23 ޖޫން 2024 - 06:37
5 comments
ފަލަސްތީނުގެ ހުޅަނގު އައްސޭރީގައި އިޒްރޭލު ސިފައިން ހިންގި އޮޕަރޭޝަނެއްގައި ހައްޔަރުކުރި ފަލަސްތީނު މީހަކު ޒަހަމްވެފައި އޮއްވައި ސިފައިންގެ ޖީޕްގެ ބޮނެޓް މަތީގައި ބަނދެފައި ބާއްވައިގެން ދުއްވައިފި އެވެ.
މި މަންޒަރު ފެންނަ ވީޑިއޯ އާންމުވުމާ އެކު އިޒްރޭލު ސިފައިން ނެރުނު ބަޔާނެއްގައި ބުނީ މިއީ ހިނގާފައިވާ ހާދިސާއެއް ކަމަށާއި އެކަން ކުރި މީހުން ޕްރޮޓޮކޯލްތަކާ ހިލާފް ވެފައިވާ ކަމަށެވެ.
ބަޔާނުގައި ބުނި ގޮތުގައި ވެހިކަލްގައި އައްސާފައި އޮތް މީހާ އަކީ ތުހުމަތުކުރެވޭ މީހުންގެ ތެރެއިން ސިފައިންގެ ރެއިޑްގައި ހައްޔަރުކުރި މީހެއް ކަމަށެވެ. އެ މީހާ ޒަހަމްވެފައި އޮތީ ދެ ފަރާތުން ބަދަލުކުރި ހަމަލާތަކުގައި ކަމަށް ވެސް ބުންޏެވެ.
ވީޑިއޯއިން ފެންނަ މީހާގެ އާއިލާއިން ބުނީ އެ މީހާ ޒަހަމްވުމުން އެމްބިއުލާންސްގައި ހޮސްޕިޓަލަށް ގެންދަން އެދުމުން ސިފައިން އޭނާ ގެންގޮސް ވެހިކަލްގައި އެގޮތަށް އެއްސީ ކަމަށެވެ. ނަމަވެސް ފަހުން އޭނާ ވަނީ ރެޑް ކްރެސެންޓުގެ ޓްރީޓްމަންޓް ފެސިލިޓީއަކަށް ގެންގޮސްފަ އެވެ.
ޣައްޒާ އާއި ހުޅަނގު އައްސޭރީގައި ކެނޑިނޭޅި ދެމުން ގެންދާ ހަމަލާތަކުގައި ލާއިންސާނީ އެތައް އަމަލެއް ހިންގަމުން އަންނަ އިޒްރޭލުން ބުނީ މި ހާދިސާ ތަހުގީގުކުރާނެ ކަމަށެވެ.
"މި ވީޑިއޯގައި ސިފައިން އަމަލުކުރާތީ ފެންނަ ގޮތަކީ ސިފައިން ގަބޫލުކުރާ ހަމަތަކާއި އުސޫލު ސާބިތުކޮށްދޭ ކަމެއް ނޫން. މި ހާދިސާ ތަހުގީގުކޮށް އަޅަންޖެހޭ ފިޔަވަޅުތައް އަޅާނަން،" ބަޔާނުގައިވެ އެވެ.
އިޒްރޭލުން މިދިޔަ އަހަރުގެ އޮކްޓޫބަރު 7 ގައި ޣައްޒާއަށް ހަމަލާދޭން ފެށި ފަހުން ހުޅަނގު އައްސޭރީގައި ދޭ ހަމަލާތައް ވެސް ވަނީ އިތުރުވެފަ އެވެ. ހުޅަނގު އައްސޭރި އާއި އިރުމަތީ ގުދުސް އިން ވެސް މިފަދަ ހަމަލާތަކާއި ރެއިޑްތަކުގައި ފަލަސްތީނުގެ 480 އަށް ވުރެ ގިނަ މީހުންގެ ފުރާނަ ގެއްލިފައިވާ ކަމަށް އދ. އިން ބުނެފައިވެ އެވެ. ޣައްޒާގެ ހަމަލާތައް ފެށި ފަހުން މިހާތަނަށް ފަލަސްތީނުގެ 37،000 އަށް ވުރެ ގިނަ މީހުން ވަނީ ޝަހީދުކޮށްލައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ސީތާ
23 June 2024
ނުބައިނުލަފާވެގެންވާ ބައެއް އިޒްރޭލުގެ ޔަހޫދީންނަކީ. އަދި ކިބުރުވެރިކަމާޢި ބޮޑާކަމުގެވެސް އިންތިހާ. އެމީހުންގެ ނަޒަރުގައި މުސްލިމުންނަކީ އެމީހުންގެ ޚިދުމަތުގައި ލައްވާފައިވާ އަޅުންތަކެއް. މުސްލިމުންނަކީ އިންސާނިއްޔަތުގެ ދަރަޖަ ދޭންޖެހޭބައެއްކަމަށް އިޒްރޭލުގެ ޔަހޫދީން ޤަބޫލެއްނުކުރޭ. އެމީހުންނަކީ އުޑުންފައިބައިގެންއުޅޭ ބައެއްކަމަށް އެމީހުންދެކެނީ. އެހާވެސް ސިކު ކުއްތާތަކެއްފަދަ ބައެއް އެއީ.
އިހްސާސް
23 June 2024
އދ ކިޔާތަނެއް ހަދައިގެން މިވެރިން ގަންނަ ގަނޑު ތިފެންނަނީ. ހިތާމަޔަކީ ދިވެހި ދައުލަތްވެސް އދ ގެ މެމްބަރަކަށް ވެގެން ތިބޭކަން. މާތްﷲ އަށްވުރެ ބާރުގަދަ އެއްވެސް ފަރާތެއް ނުވޭ. އިޒުރޭލުގެ އަނިޔާވެރިން ބޭނުންގޮތެއް މުސްލިމު ކުޑަކުދިންނާ މައިންނާ ބަފައިންނަށް ހަދަމުންދާއިރު އދ އަށް މިކަންހުއްޓުވަން މިއަދާހަމައަށް ކުރެވުނީ ކީއް؟ ވަކިބަޔެއްގެ ސިޔާސީ މަންފާއަށް ހަދާފަ އޮތްތަނެއް ވީމާ ވާނެގޮތް މިފެންނަނީ.
ގުޓުރޭ
23 June 2024
ކޮބާތަ އޯ.އައި..ސީ
ޖަލީލީ
23 June 2024
މި ޔަހޫދީ ޒަޔަނިސްޓުންގެ ލާއިންސާނީ ޖަރީމާތަކަށް ދުނިޔެ ޓޮލަރޭޓް ކުރާނީ ކިހާވަރެއް ވަންދެންތޯ. އެމެރިކާއާއި ޔޫރަޕްގެ މަދަދާއި އެކު ޔަހޫދީންދަނީ ޖަރީމާތަށް ހިންގާ ފޮރުވަން މަސައްކަތް ކުރަމުން. އެކަމަކު ފަލަސްތީނާއި އުންމަތުގެ ހަގީގީ ލޯބިހުރި މުސްލިމުންގެ ހިތްތަކުން އެ ފާރުތަށް ފަސޭހަވާނެތޯ. ފިރުއައުނުގެ އަނިޔާވެރިކަން ވެސް ތާ އަބަދަށް ދެމިގެން ނުދޭ، ދާދި އަވަހަށް އިޒްރޭލްގެ ނުހަލާލް ދައުލަތް ފަނާކުރައްވާށި.އާމީން
ތުނޑުހަސަނު
23 June 2024
އދ އަކީ އިޒްރޭލުން މަރާ ފަލަސްޠީން މީހުންގެ އަދަދު ބަލަން ތިބޭ ބައެއްތަ!. ތިޔަ ޖަރީމާތައް ހުއްޓުވަން އދ އިން ކުރަނީ ކޮންކަމެއް. ފެއިލް ވެފައި އޮތް ޖަމާއަތެއް އދ އަކީ. އދ އިން ހަމައެކަނި ކުރާކަމަކީ އެމެރިކާ ބޭނުންވާ ކަންކަން ޙާސިލުކުރަން މަސައްކަތްކުރުން. އެމެރިކާ ރުހޭ މީހާ ކުރާކަމެއް އދ އަށްވެސް ނުފެނޭ. ނުރުހޭ މީހާ ސާފުވައިގެ ތެރެއަށް ނޭވާ ލިޔަސް އޮބިއަޅާނެ. މިއީތަ އިންސާފަކީ.