ޣައްޒާއިން 25 އަހަރަށް ފަހު ޕޯލިއޯ ފެނިއްޖެ

ފަލަސްތީނުގެ ޣައްޒާގައި ކުޑަކުދިންތަކެއް ކާނާ އާއި ފެން ހޯދަން ހިނގަނީ: އިޒްރޭލުގެ ހަމަލާތަކާ ހެދި އަސާސީ ހުރިހާ ކަމެއް ހުއްޓުމަކަށް އައިސްފައިވާ ޣައްޒާއިން ޕޯލިއޯ ވައިރަސް ފެނުނީ ސާފުތާހިރުކަން ގެއްލި ކުދިންނަށް ވެކްސިން ދެވޭނެ ގޮތެއް ނެތިފައި ވަނިކޮށް. -- ފޮޓޯ: އޭއެފްޕީ

18 އޯގަސްޓް 2024 - 05:18

1 comments

އިޒްރޭލުގެ އަނިޔާވެރި ހަމަލާތަކުގެ ތެރޭގައި ހާލުގައި ޖެހިފައިވާ ފަލަސްތީނުގެ ޣައްޒާއިން 25 އަހަރު ތެރޭ ފުރަތަމަ ފަހަރަށް ޕޯލިއޯގެ ކޭސްއެއް ފެނިއްޖެ އެވެ.

ފަލަސްތީނުގެ ހެލްތު މިނިސްޓްރީން ބުނީ ޖޯޑަން އަށް ފޮނުވައިގެން ހެދި ޓެސްޓްތަކުން މި ބަލި ކަށަވަރު ވެފައިވާ ކަމަށާއި ބަލި ޖެހިފައިވަނީ ޕޯލިއޯ ވެކްސިންގެ އެންމެ ޑޯޒެއް ވެސް އަދި މިހާތަނަށް ދީފައިނުވާ 10 މަހުގެ ކުއްޖަކަށް ކަމަށެވެ.

އެ ކުއްޖާ އަކީ އިޒްރޭލުގެ ހަމަލާތައް ވަރުގަދަ ޣައްޒާގެ މެދުތެރޭ ހިސާބެއްގެ ކުއްޖެކެވެ.

އދ. ގެ މައުލޫމާތުތަކުގައިވާ ގޮތުން މިދިޔަ 25 އަހަރު ތެރޭ ޣައްޒާއިން ޕޯލިއޯގެ އެންމެ ކޭހެއް ވެސް ފެނިފައެއް ނުވެ އެވެ. އެކަމަކު މީގެ ދުވަސްކޮޅެއް ކުރިން ޣައްޒާގެ އެކި ހިސާބުތަކުގެ ނަޖިސް ފެނުން ނެގި ސާމްޕަލްތަކަކުން ވަނީ ޕޯލިއޯ ވައިރަސް ފެނިފަ އެވެ.

Gaza ah polio vaccine ge 1 million dose fonuvanee

The most trusted news source in the Maldives

Mihaaru

ޣައްޒާގެ ކުއްޖަކަށް ޕޯލިއޯ ޖެހުނުކަން އިއުލާނުކޮށްފައި މި ވަނީ ޣައްޒާގެ އާންމު ތަންތަނުގައި ޕޯލިއޯގެ ވައިރަސް ހުރުމުން، ކުޑަކުދިންނަށް އަވަހަށް ވެކްސިން ދޭން ފެށުމަށް އދ. އިން މަސައްކަތް ފަށާފައި ވަނިކޮށެވެ. އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވަނީ ކުޑަކުދިންނަށް ވެކްސިން ދިނުމުގެ ކަންކަން ކުރެވޭނެ މަގު ތަނަވަސްކޮށްދިނުމަށް ޣައްޒާގައި ހަމަލާތައް މެދުކަނޑާލަންޖެހޭ ކަމަށް ކުރިން ވެސް ވިދާޅުވެފަ އެވެ.

ޕޯލިއޯ ވައިރަސް އެންމެ އާންމުކޮށް ފެތުރެނީ ނަޖިސް ފެނާއި ސާފުތާހިރުކަން ކުޑަ ފެނުގެ ޒަރިއްޔާއިންނެވެ. މިއީ ވަރަށް ފަސޭހައިން ގައިންގަޔަށް އަރާ ބައްޔެކެވެ. މިއީ ހަށިގަނޑުގެ ގުނަވަންތައް އައިބުވެ އަދި ވާގިނެތުމާއި ބައެއް ހާލަތުގައި މަރާ ވެސް ކުރިމަތިކުރުވާ ނުރައްކާތެރި ބައްޔެކެވެ. -- އޭއެފްޕީ