މަޖިލިހުގެ ޗުއްޓީއަށް ފަހު ކުރު ޖަލްސާއެއް، ބައިގަޑިއިރު ތެރޭގައި ނިންމާލައިފި

ދެ މަހަށް ވުރެ ގިނަ ދުވަހުގެ ޗުއްޓީއަކަށް ފަހު، މިއަދު ބޭއްވި ރައްޔިތުންގެ މަޖިލިހުގެ ތިންވަނަ ދައުރުގެ ފުރަތަމަ ޖަލްސާ އެންމެ ބައިގަޑިއިރުގެ ތެރޭގައި ނިންމާލައިފި އެވެ.

މި އަހަރުގެ ފަހު ދައުރުގެ ޖަލްސާތައް ފަށަން ހަމަޖެއްސި ތާރީހަށް ވުރެ އެއް ހަފުތާ ފަހުން ޖަލްސާތައް ފަށާފައިވާއިރު، މިއަދުގެ އެޖެންޑާގައި އޮތީ ރިޔާސަތުން ހުށަހެޅި ހަތަރު މައްސަލައެއް ކޮމިޓީ އަށް ފޮނުވުމާއި ތިން ބިލެއްގެ ފުރަތަމަ ކިޔުން އިއްވުމުގެ އިތުރުން ކޮމިޓީން ހުށަހެޅި ތިން ރިޕޯޓެއްގެ ވޯޓަށް އެހުމެވެ.

ރިޔާސަތުން ހުށަހެޅީ ވަޒީރުންގެ މަޖިލީހަށް ގެނައި ބަދަލަށް ރުހުން ހޯދުމުގެ މައްސަލަ އާއި އިލެކްޝަންސް ކޮމިޝަނަށް މެންބަރަކު އައްޔަން ކުރުމުގެ މައްސަލަ އާއި އިންޑިއާ ސަފީރަކަށް އާ ބޭފުޅަކު ހަމަޖެއްސުމުގެ މައްސަލައިގެ އިތުރުން އިންޓަނޭޝަނަލް އެޓޮމިކް އެނާޖީ އޭޖެންސީގައި ރާއްޖެ އިން ބައިވެރިވުމާ މެދު ރުހުން ހޯދުމުގެ މައްސަލަ އެވެ. މި ހަތަރު މައްސަލަ މިއަދު ވަނީ ކަމާ ގުޅޭ ކޮމިޓީތަކަށް ފޮނުވައިފަ އެވެ.

މާލިއްޔަތު ކޮމިޓީން ތިން ރިޕޯޓެއް ތަޅުމަށް މިއަދު ފޮނުވި ކަމަށް ވެސް އެޖެންޑާގައި ވެ އެވެ. އެއީ 2012-2017 އާ ހަމައަށް އެންވަޔަރަންމަޓަލް އަދި ޑިފެންސް މިނިސްޓްރީގެ އޮޑިޓް ރިޕޯޓު ދިރާސާކޮށް ހުށަހެޅި ދެ ރިޕޯޓުގެ އިތުރުން ނ. އަތޮޅު އަތޮޅު ކައުންސިލް އިދާރާ ހިންގާ ބިމުގައި ދެ ބުރީގެ އިމާރާތެއް އެޅުމަށް ކުރި ހަރަދުތަކާ ބެހޭ އެސެސްމެންޓާ ގުޅޭ ރިޕޯޓެކެވެ.

3 ministerunah ruhun dhinumuge massala committee ah

The most trusted news source in the Maldives

Mihaaru

މާލިއްޔަތު ކޮމިޓީގެ މުގައްރިރު ގާސިމް އިބްރާހިމް އެ ތިން ރިޕޯޓް ހުށަހެޅުއްވުމަށް ފަހު، ކޮންމެ ރިޕޯޓަކަށް އެއް ގަޑިއިރުގެ ބަހުސް ވަގުތު ދިން ނަމަވެސް، ބަހުސްގެ ފުރުސަތު ބޭނުން ކުރެއްވީ އެންމެ ދެ މެންބަރުންނެވެ. އެއީ ހުރާ ދާއިރާގެ މެންބަރު އަނާރާ ނައީމާއި މަނަދޫ ދާއިރާގެ މެންބަރު ހުސްނީ މުބާރަކް އެވެ.

އިތުރު މެންބަރަކު ބަހުސަށް އެދިވަޑައިގެންފައި ނުވާތީ އާއި އެޖެންޑާގެ ހުރިހާ ކަމެއް ނިމިފައިވާތީ، ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ނިންމެވީ ހެނދުނުގެ ދަންފަޅީގައި ވޯޓަށް އެހުމަށެވެ. މާލިއްޔަތު ކޮމިޓީގެ ތިން ރިޕޯޓު ވަކިވަކިން ފާސްކުރުމަށް ފަހު، މިއަދަށް ޖަލްސާ ނިންމަވައިލެއްވީ ޖަލްސާ ފެށިތާ ބައިގަޑިއިރުގެ ތެރޭގަ އެވެ.

އިތުރު މަސައްކަތެއް ނެތި ޖަލްސާ ނިންމާލާފައިވާއިރު، މިއަދު އެޖެންޑާކޮށްފައި އޮތީ އެންމެ ކޮމިޓީއެއްގެ މަސައްކަތެވެ. އެއީ ހެނދުނަށް ތާވަލްކުރި ސަލާމަތީ ހިދުމަތްތަކާ ބެހޭ (241) ކޮމިޓީގެ ބައްދަލުވުމެވެ. އެ ބައްދަލުވުން ވަނީ ސިއްރު ކޮށްފަ އެވެ.

މަޖިލީހުގެ ދެވަނަ ދައުރުގެ ޖަލްސާތައް ނިންމައި މަޖިލިސް ޗުއްޓީ އަށް ދިޔައީ ޖުލައި 17 ގަ އެވެ. މަޖިލީހުން ޗުއްޓީ އަށް ދިޔައީ ދައުރުގެ މަސައްކަތްތަކުގެ ތެރެއިން 82 ޕަސެންޓް މަސައްކަތްތައް ނިންމާފައި ކަމަށް ރިޔާސަތުން ބުނެފައިވެ އެވެ.