ފާއިތުވި އަހަރުތަކުގައި ސަޕްލިމަންޓްރީ ބަޖެޓުން ހަރަދުކޮށްފައިވަނީ ގާނޫނުއަސާސީ އާ ހިލާފަށް ރައްޔިތުންގެ މަޖިލީހުން ފާސްކުރުމުގެ ކުރިން ކަމަށް ވިދާޅުވެ، ފިޔަވަޅު އަޅާނެކަމުގެ އިންޒާރު ބަންޑާރަ ނައިބު އަހުމަދު އުޝާމް މިއަދު ދެއްވައިފި އެވެ.
ފިނޭންސް މިނިސްޓަރު މޫސާ ޒަމީރު އާ އެކު ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އުޝާމް ވިދާޅުވީ، ދައުލަތުގެ ބަޖެޓުން އެއްވެސް ހަރަދެއް ކުރަންވާނީ މަޖިލީހުން ފާސްކޮށްގެން ކަމަށް ގާނޫނުއަސާސީގެ އިތުރުން މާލިއްޔަތު ގާނޫނުގައި ސާފުކޮށް ބަޔާންކޮށްފައިވާ ކަމަށެވެ.
މިގޮތުން، ސަޕްލިމަންޓްރީ ބަޖެޓުގެ ގޮތުގައި ބޭނުންވާ ފައިސާ ވެސް، ބޭނުންކުރުމުގެ އެއް މަސް ދުވަހުގެ ކުރިން މަޖިލީހަށް ހުށަހަޅައިގެން ފާސްކުރަންޖެހޭ ކަން ބަންޑާރަ ނައިބު ފާހަގަކުރެއްވި އެވެ.
ނަމަވެސް، އުޝާމް ވިދާޅުވި ގޮތުގައި، ފާއިތުވި ހަތަރު އަހަރެއްހާ ދުވަހު ސަޕްލިމަންޓްރީ ބަޖެޓުން ހަރަދުކޮށްފައިވަނީ ގާނޫނުއަސާސީ އާ ހިލާފަށް، މަޖިލީހުން ފާސްކުރުމުގެ ކުރިންނެވެ.
"ގާނޫނުއަސާސީ އަދި މާލިއްޔަތު ގާނޫނުގައި އެ ބުނާގޮތަށް ސަޕްލިމެންޓަރީ ބަޖެޓެއް ހުށަހަޅައިގެން ފާސްކޮށްގެން ހަރަދުކޮށްފައެއް ނޫން ހުރީކީ. ގާނޫނުއަސާސީއާ ހިލާފަށް އަދި މާލިއްޔަތު ގާނޫނާ ވެސް ހިލާފަށް އެކަން ކޮށްފައި އޮތީ،" އޭނާ ވިދާޅުވި އެވެ.
ކުރީގެ ސަރުކާރުން އެގޮތަށް އަމަލުކުރުމުގެ މައްސަލަ އޭރުގެ މަޖިލީހުގެ ރިޔާސަތުންނާއި އިދިކޮޅު މެމްބަރުން ތަކުރާރުކޮށް ފާހަގަކޮށް، ކަންބޮޑުވުންފާޅުކުރިކަން، އޭރު މަޖިލީހުގެ ވިލިމާލެ ދާއިރާގެ މެމްބަރުކަމުގައި ހުންނެވި އުޝާމް ފާހަގަކުރެއްވި އެވެ.
އެހެންކަމުން، މި މައްސަލަ ބެލުމަށްފަހު ޒިންމާވާންޖެހޭ ފަރާތްތަކާމެދު އަޅަންޖެހޭ ފިޔަވަޅެއް އަޅުއްވާނެ ކަމަށް ވެސް ބަންޑާރަނައިބު ވިދާޅުވި އެވެ.
ފާއިތުވި އަހަރުތަކުގައި މަޖިލީހުން ފާސްކުރާ ދައުލަތުގެ ބަޖެޓުން ދެކޮޅު ނުޖެހިގެން، ސަޕްލިމަންޓްރީ ބަޖެޓެއް ހުށަހަޅަ އެވެ. އެމްޑީޕީ ސަރުކާރުގެ ފަހު އަހަރު 6.5 ބިލިއަން ރުފިޔާގެ ސަޕްލިމަންޓްރީ ބަޖެޓެއް މަޖިލީހުން ފާސްކުރި އެވެ. އެކަމަކު އެ ބަޖެޓު ސަޕްލިމަންޓް މަޖިލީހަށް ހުށަހެޅިއިރުވެސް، މަޖިލީހުން ފާސްކޮށްދިން އަހަރުގެ ބަޖެޓަށް ވުރެ އިތުރަށް ހަރަދުކޮށްފައިވާ ކަމުގެ ތުހުމަތު އޭރުގެ އިދިކޮޅު މެމްބަރުން އިސްވެ ކުރި އެވެ. ނަމަވެސް، އޭރުގެ ސަރުކާރުން ވަނީ އެ ތުހުމަތު ދޮގުކޮށްފަ އެވެ.
މިއަދުގެ ނޫސްވެރިންގެ ބައްދަލުވުމުގައި ފިނޭންސް މިނިސްޓަރު ޒަމީރު ވަނީ، މި އަހަރު ވެސް ސަޕްލިމަންޓްރީ ބަޖެޓެއް ހުށަހަޅަން ތައްޔާރުވަމުންދާ ކަން ހާމަކުރައްވައިފަ އެވެ.
އެގޮތުން، ސަޕްލިމަންޓް ބަޖެޓުގެ ގޮތުގައި ފަސް ބިލިއަނެއްހާ ރުފިޔާ ހުށަހަޅަންޖެހޭނެކަމަށް ލަފާކުރެއްވޭ ކަމަށާއި، އެކަމަކު ސީދާ އަދަދެއް ނިންމާނީ ވަޒީރުންގެ މަޖިލީހުގެ މަޝްވަރާއަށްފަހު ކަމަށް އޭނާ ވިދާޅުވި އެވެ.
މި އަހަރު ރައްޔިތުންގެ މަޖިލީހުން ފާސްކޮށްފައިވަނީ 49.8 ބިލިއަން ރުފިޔާގެ ރެކޯޑު ބަޖެޓެކެވެ.