މުސާރަ ކުޑަ ކުރާއިރު، ޕްރޮފެޝަނަލް މުވައްޒަފުން އިސްތިސްނާވާނެ: ޒަމީރު

އަންނަ އަހަރު ސަރުކާރުގެ ސިޔާސީ މުވައްޒަފުންނާއި ދައުލަތުގެ އިސްވެރިންނާއި ކުންފުނިތަކުގެ މުވައްޒަފުންގެ މުސާރައިން 10 ޕަސެންޓު އުނިކުރަން ނިންމި ނަމަވެސް، ޕްރޮފެޝަނަލް ކެޓަގަރީގެ މުވައްޒަފުންގެ މުސާރައިން އުނި ނުކުރާނެ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.

ސަރުކާރުގެ އިގްތިސާދީ އިސްލާހީ އެޖެންޑާގެ ދަށުން ދައުލަތް ހިންގުމުގެ ހަރަދުތައް ކުޑަކުރުމުގެ ސިޔާސަތުގެ ދަށުން، ރައީސް ޑރ. މުހައްމަދު މުއިއްޒު ވަނީ ސިޔާސީ މުވައްޒަފުންނާއި ދައުލަތުގެ ތިން ބާރުގެ އިސް ބޭފުޅުންނާއި މިނިވަން މުއައްސަސާތަކުގެ ވެރިންނާއި ރައްޔިތުންގެ މަޖިލީހުގެ މެމްބަރުންނާއި ސަރުކާރު ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް ދެ އަހަރު ދުވަހުގެ މުއްދަތަށް އުނިކުރުމަށް ނިންމަވައިފަ އެވެ.

މި އަހަރުގެ ދައުލަތުގެ ބަޖެޓް ސަޕްލިމަންޓާ ގުޅޭގޮތުން މަޖިލީހުގެ މާލިއްޔަތު ކޮމިޓީގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ޒަމީރު ވިދާޅުވި ގޮތުގައި، މުސާރައިން 10 ޕަސެންޓު އުނިކުރާ މުވައްޒަފުންގެ ތެރޭގައި ޕްރޮފެޝަނަލް ކެޓަގަރީގެ މުވައްޒަފުން ނުހިމެނޭނެ އެވެ.

މަޖިލީހުގެ މާލިއްޔަތު ކޮމިޓީގެ މިއަދުގެ ބައްދަލުވުން. --ފޮޓޯ: ނިޝާން އަލީ | މިހާރު

"ޕްރޮފެޝަނަލް ކެޓަގަރީސްތައް އިސްތިސްނާ ވާނެ. އެއީ އަޅުގަނޑުމެން އެކްރޮސް ދަ ބޯޑު ނެގި ކަމުގައި ވިޔަސް ބައެއް ކަހަލަ އިންޖިނިއަރުންނާއި ބައެއް ކަހަލަ މީހުންނަކީ އެއީ އަޅުގަނޑުމެންނަށް، މިސާލަކަށް ސެލަރީ ދަށްކޮށްފި ކަމަށް ވެއްޖެއްޔާ، އެ މީހުންނަށް އެެއަށް ވުރެ ބެޓާ އޮޕްޝަންސް އޮވެއްޖެއްޔާ، ގޮސްފި ކަމަށް ވެއްޖެއްޔާ އެ ކުންފުނިތައް ހިންގަން އުނދަގޫވާނެ،" އޭނާ ވިދާޅުވި އެވެ.

ޒަމީރު މިގޮތަށް ވިދާޅުވެފައިވަނީ މުސާރައިން 10 ޕަސެންޓް އުނިކުރާތީ ބައެއް ޕައިލެޓުންނާއި އިންޖިނިއަރުން ސޯޝަލް މީޑިޔާގައި ކަންބޮޑުވުން ފާޅު ކުރަމުން ދަނިކޮށެވެ.

މުސާރައިން އުނިކުރާ މުއައްސަސާތައް

• ސިޔާސީ ހުރިހާ މުވައްޒަފުންގެ މުސާރައިން 10 ޕަސެންޓް އުނިކުރުން.

• ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް އުނިކުރުން. އަދި ކުންފުނިތަކުގެ ވެރިންނަށް އެންމެ ބޮޑުކޮށް ދެވޭނީ 90،000ރ. ކަމަށް ކަނޑައެޅުން.

• މިނިވަން މުއައްސަސާތަކުގެ އިސްވެރިންގެ މުސާރައިން 10 ޕަސެންޓް އުނިކުރަން ހުށަހެޅުން.

• ޝަރުއީ ދާއިރާގެ އިސްވެރިން އަދި މަޖިލީހުގެ މެމްބަރުންގެ މުސާރައިން 10 ޕަސެންޓް އުނިކުރަން ހުށަހެޅުން. އެކަމަކު މި ފިޔަވަޅުތައް އެޅުމުގައި 12،000ރ. އަށް ވުރެ ދަށުން މުސާރަ އާއި އިނާޔަތްތައް ލިބޭ މުވައްޒަފުން އިސްތިސްނާ ވާނެ އެވެ.

މި ނިންމުމާ އެކު، ރައީސް މުއިއްޒު ވަނީ އެ މަނިކުފާނުގެ މުސާރައިން ވެސް 50 ޕަސަންޓް ނުނަންގަވަން ނިންމަވައިފަ އެވެ.

ދައުލަތުގެ ދަރަނި ބޮޑުވެ، ރާއްޖޭގެ އިގްތިސާދީ ހާލަތު ދަށަށް ގޮސްފައި ވާތީ ދައުލަތުގެ ހަރަދުތައް ކުޑަކުރުމުގެ ގޮތުން ގިނަ ފިޔަވަޅުތަކެއް އަޅަން ސަރުކާރުން ކުރިން އޮތީ ނިންމައިފަ އެވެ. ހަރަދުތައް ކުޑަކުރުމުގެ ސިޔާސަތުގެ ދަށުން، ސަރުކާރުގެ ސިޔާސީ މަގާމުތަކުގައި ތިބި 228 މުވައްޒަފަކު މަގާމުން ވަކިކުރަން ވެސް ރައީސް ވަނީ މިދިޔަ ހަފުތާގައި ނިންމަވައިފަ އެވެ. އެ ނިންމެވުމުގެ ސަބަބުން މަހަކު 5.7 މިލިއަން ރުފިޔާ ދައުލަތަށް ސަލާމަތް ކުރެވޭނެ ކަމަށް ރައީސް ވިދާޅުވެފައިވެ އެވެ.