ސްޕޯޓްސް ޓޫރިޒަމް ފަހިކުރަން ޔުވެންޓަސްގެ މަންދޫބުންނާ އެކު މިނިސްޓަރު ފައިސަލް މަޝްވަރާ ކުރައްވައިފި

ކުޅިވަރާއި ފަތުރުވެރިކަން ގުޅުވައިގެން ރާއްޖެ އަށް ހޯދޭން ފުރުސަތުތަކާ ބެހޭގޮތުން އިޓަލީގެ ފުޓްބޯޅައިގެ ގަދަބާރު ޔުވެންޓަސްއާ އެކު ޓޫރިޒަމް މިނިސްޓަރު އިބްރާހިމް ފައިސަލް މަޝްވަރާ ކުރައްވައިފި އެވެ.

ޔުވެންޓަސްގެ އޮފިޝަލުންތަކެއް މި ހަފުތާގައި ރާއްޖޭގައި ހޭދަ ކުރި އެވެ. އެ ވަފުދާ އެކު ފައިސަލް ވަނީ ބައްދަލުވުމެއް ބާއްވައިފަ އެވެ.

ސޯޝަލް މީޑިއާގައި މިނިސްޓަރު ފައިސަލް ވިދާޅުވީ ކުޅިވަރާއި ފަތުރުވެރިކަން ގުޅުވައިގެން ރާއްޖެއަށް ހޯދޭން ފުރުސަތުތަކާ ބެހޭގޮތުން މަޝްވަރާ ކުރެއްވި ކަމަށެވެ.

" ޔުވެންޓަސް ފުޓްބޯލް ކްލަބުގެ މަންދޫބުންނާ އެކު މިއަދު [އިއްޔެ' ވަނީ ކުޅިވަރާއި ފަތުރުވެރިކަން ގުޅުވައިގެން އިތުރު ފުރުސަތުތަކެއް ހޯދުމަށް ކާމިޔާބު ބައްދަލުވުމެއް ބާއްވައިފަ،" ސޯޝަލް މީޑިއާގައި ފައިސަލް ވިދާޅުވެފައި ވެއެވެ.

ޔުވެންޓަސް އަށް 127 އަހަރު ފުރުން ފާހަގަ ކުރުމަށް ހިންގާ ހަރަކާތްތައް ރާއްޖޭގައި ކުރިއަށް ގެންދިއުމަށް އެ ކްލަބުން ވަނީ ނިންމައިފަ އެވެ. އދ. މަހިބަދޫގައި އޮންނަ ޕެލޭ ފުޓްބޯޅަ ދަނޑުގައި އެ ހަރަކާތްތައް ކުރިއަށް ގެންދިއުމަށް ވަނީ ނިންމައިފަ އެވެ.