ކުޑަކުދިންނަށް ދޭ ސިރަޕަކުން ނުރައްކާތެރި ކެމިކަލެއް ފެނިގެން ވަގުތީ ގޮތުން މަނާކޮށްފި

އެމްއެފްޑީއޭ: ކުޑަކުދިންނަށް ދޭ ސިރަޕެއްގައި ނުރައްކާތެރި ދެ ކެމިކަލެއް ފެނިގެން އެ ބޭސް ބޭނުންކުރުން ވަނީ މަނާ ކޮށްފައި --- ފޮޓޯ/މިހާރު

އާސިމާ ނިޒާރު، މިހާރު

26 ނޮވެމްބަރ 2024 - 13:27

6 comments

ތަދުކަނޑުވަން ކުޑަކުދިންނަށް ދޭ ސިރަޕެއްގައި ނުރައްކާތެރި ދެ ކެމިކަލެއް ހުރުމުން އެ ބޭސް ބޭނުން ކުރުން ވަގުތީގޮތުން މަނާކޮށްފި އެވެ.

މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު ނެރުނު އެލާޓުގައި ބުނީ ރާއްޖޭގެ މާކެޓުގައި ހުންނަ ބޭހުގެ ފެންވަރު ބެލުމަށް ސްކްރީން ކުރިއިރު، ތަދުކަނޑުވަން ބޭނުންކުރާ ދެ ބޭހެއް ޑައިތީލައިން ގްލައިކޯލް އަދި އިތައިލީން ގްލައިކޯލް ފެނިފައިވާ ކަމަށެވެ.

އެ ކެމިކަލް ފެނިފައިވަނީ ޕާކިސްތާނުގެ އެފްރޯޒާ ކެމިކަލް އިންޑަސްޓްރީގައި އުފައްދާ މެފްނެކް ސަސްޕެންޝަން ސިރަޕާއި އަދި މެލޭޝިޔާގެ ކޮޓްރާ ފާމާގެ އެކްސެލް މެފެނެމިކް އެސިޑް ސަސްޕެންޝަން ސިރަޕުންނެވެ.

އެ އިދާރާއިން ބުނީ އެ ދެ ބޭހުގެ ތަހުލީލުތައް އިތުރަށް ޔަގީން ކުރުމަށް ޓެސްޓު ހެދުމަށް ރާއްޖެއިން ބޭރަށް ފޮނުވުމުގެ މަސައްކަތް ކުރަމުން އަންނަ ކަމަށެވެ. އެހެންވެ، ވަކި ގޮތެއް އަންގަންދެން އެ ދެ ބޭހުގެ އެއްވެސް ބެޗެއް އެތެރެ ކުރުމާއި ވިއްކުމާއި ބޭނުންކުރުން ވަނީ މަނާކޮށްފަ އެވެ.

ބޭސް ފިހާރަތަކާއި ބޭސް ގުދަންތަކުގައި ހުރި އެ ދެ ބޭސް، އެހެން ބޭސްތަކާ ވަކިކޮށް ބެހެއްޓުމަށް ވެސް ވަނީ އަންގައިފަ އެވެ.

Beyhugai zaharu, Mifaharu salaamaiyvee naseebakun!

The most trusted news source in the Maldives

Mihaaru

ޑައިއީތައިލިން ގްލައިކޯލް އަދި އިތައިލީން ގްލައިކޯލް އަކީ އިންޑަސްޓްރިއަލް ކެމިކަލެކެވެ. މި ދެ ކެމިކަލް ހުރި ބޭސް ބޮއެގެން އިންޑޮނީޝިއާގައި 368 ކުދިން އަދި ގެމްބިއާގައި 70 ކުދިން މަރުވި އެވެ. އެއާ އެކު ދުނިޔޭގެ ސިއްހަތު ޖަމިއްޔާގެ ސަމާލުކަމަށް މިކަން އައިސް، މިދިޔަ އަހަރު ތަހުގީގުތައް ފެށި އެވެ.

އެ ކެމިކަލްތައް ހުރި ބޭސް ރާއްޖެއިން ވެސް އޭރު ފެނުނެވެ. އޮސްޓްރޭލިއާއަށް ފޮނުވައިގެން ހެދި ޓެސްޓުން ވަނީ ފާމިކްސް ލެބޯޓްރީސްގައި އުފައްދާ އެލާގޯ ބްރޭންޑުގެ ސިޓްރިޒެން ސިރަޕުގައި އެ ދެ ކެމިކަލް ހުރިކަން ޔަގީން ކުރެވިފަ އެވެ.

ހޮޑު މަނާކުރާ ސިރަޕްގައި ވެސް ޑައިއެތިލީން ގްލައިކޯލް އަދި އެތިލީން ގްލައިކޯލް ހުރިކަން ޔަގީންވުމުން، ޕާކިސްތާނުގެ ޑްރަގް ރެގިއުލޭޓްރީ އޮތޯރިޓީން ވަނީ އެ ގައުމުގައި ސިރަޕް އުފައްދާ ފެކްޓްރީ ބަންދުކުރަން އޭރު އަންގައިފަ އެވެ.

އެކަމާ ގުޅިގެން އޭރު ޑަބްލިއުއެޗްއޯއިން ނެރުނު ބަޔާނުގައިވަނީ ތަޣައްޔަރުވެފައިވާ މާއްދާތައް ދެނެގަތް ފުރަތަމަ ގައުމަކަށް ރާއްޖެ ވެގެން ދިޔައީ ވަސީލަތްތައް މަދު ލެބޯޓްރީތަކަށް ވެސް ސްކްރީން ކުރެވޭނެ ގޮތަށް އުފެއްދި އާ ސްކްރީނިން މެތަޑެއް ބޭނުންކޮށްގެން ކަމަށެވެ.