ގުރައިދޫ ޓީމުގެ މި ދެބަފައިން؛ ފުޓްބޯޅައިގެ މާޒީ އާއި ކުރިމަގު!

ނައިންޓީ ޕްލަސް ގޯލްޑް ކަޕުގައި ވާދަކުރާ ގުރައިދޫ ޓީމުގެ އަހުމަދު ވަދީއު އަކީ، ރާއްޖޭގެ ފުޓްބޯޅައިގައި މަގޫބޫލު ނަމެކެވެ. އުމުރުން 42 އަހަރުގައި ވެސް ގުރައިދޫގެ ޖޯޒީގައި ގަލޮޅު ދަނޑަށް ނުކުތުމުން، އޭނާގެ ކުރީގެ ހަނދާންތައް އާ ވާކަމަށް ވަދީއު ބުންޏެވެ.

ނިއު ރޭޑިއަންޓާއި ވެލެންސިއާގެ ސަޕޯޓަރުންނަށް ވަދީއުގެ ނަން އަލެއް ނުވާނެ އެވެ. ކުރިން ބޭއްވި ކަޕް ވިނާސް ކަޕްގެ 2007 ގައި ނިއު ރޭޑިއަންޓް ބަލިކޮށް ވެލެންސިއާ އަށް ތަށި ހޯދައި ދިނުމުގައި ވަދީއު މުހިންމު ދައުރެއް އަދާކުރި އެވެ. އެ މެޗުގައި ވެލެންސިއާ އަށް ލީޑު ނަގައިދީ މޮޅު ކުޅުމެއް އޭނާ ދެއްކި އެވެ. އެ އަހަރުގެ ދިވެހި ލީގުގައި ހަތް މެޗެއްގައި ލަނޑު ޖަހައި ފަސް މެޗެއްގެ މޮޅު ކުޅުންތެރިޔާގެ މަގާމު ހޯދި އެވެ.

އެއީ އަހަރުތަކެއް ކުރި އެވެ. އެ އަހަރަށް ފަހު އޭނާ ކުޅުން ހުއްޓާލީ ކަކުލުގެ ލިގަމެންޓަށް ލިބުނު އަނިޔާއަކާ ގުޅިގެންނެވެ. އެހެންނަމަވެސް ފުޓްބޯޅައާ އޭނާ ވަތްކެއް ނުވި އެވެ.

އޭނާގެ ލެގަސީ ހިފައިގެން ނުކުތީ ދަރިފުޅު މުހައްމަދު އަހްޒަމް އަހުމަދު ވަދީއު އެވެ. އުމުރުން 16 އަހަރުގެ އަހްޒަމް އަކީ ގުރައިދޫ ޓީމުގެ މުހިންމު އެއް ކުޅުންތެރިޔާ އެވެ. ގޯލްޑް ކަޕްގެ ގުރޫޕް ސްޓޭޖްގައި އެ ޓީމުން ކުޅުނު ތިން މެޗުގެ ތެރެއިން ދެ މެޗުގައި އޭނާ ކުޅުނެވެ. ވަދީއު ކުޅުނީ ކަނާތު ވިންގް ފޯވާޑަށެވެ. ދަރިފުޅު އަހްޒަމް އަކީ ކަނާތު ބެކެވެ. އެކަމަކު ވިންގް ފޯވާޑެއްގެ ގޮތުގައި ކުރިއަށް އަރައިގެން ވެސް އޭނާ އަށް ކުޅެވެ އެވެ. އޭނާ ބުނީ ދަރިފުޅަށް ފުޓްބޯޅައިގައި ގައިޑްކޮށްދޭން އެއް ޓީމެއްގައި ކުޅެން ލިބުމަކީ ބޮޑު ހިތްހަމަޖެހުމެއް ކަމަށެވެ.

"ދަރިފުޅާ އެކު އެއް ޓީމަކަށް ކުޅެލަން ލިބޭނެ ކަމަކަށް ހީއެއް ނުކުރަން،" ހިތްހަމަޖެހިފައި ހުރެ ވަދީއު ބުންޏެވެ.

ގުރައިދޫ ސްކޮޑަށް ލައްވާލާނެކަމުގެ އުއްމީދެއް ވަދީއުގެ ނެތެވެ. އެހެންވެ އޭނާ ބޭނުންވީ ޓީމުގެ އޮފިޝަލެއްގެ ގޮތުގައި ގުރައިދޫ ޓީމުގައި ބައިވެރިވާށެވެ.

"ކައުންސިލުގަ އެ ވާހަކަ ދެއްކީމަ އަޅުގަނޑު ކައިރީ ބުނީ ޓީމުގެ އޮފިޝަލުންނަށް ވެސް ފުރުސަތު ދޭނީ ޕްރެކްޓިހުގައި ގަވާއިދުން ބައިވެރިވާ މީހުންނަށޭ. އެހެން ބުނީމަ ޕްރެކްޓިހަށް ނުކުންނަން ފެށީ،" ވަދީއު ބުންޏެވެ.

"ޕްރެކްޓިހަށް ނުކުންނަން ފެށީމަ ފޮޓޯ ކޯޗު [އަހްމަދު ނިސާމް] ސަބްސިޓިއުޓް ކުޅުންތެރިއެއްގެ ގޮތުގައި ޓީމުގައި އަޅުގަނޑުގެ ނަން ޖެހީ،"

ގޯލްޑް ކަޕްގެ ފުރަތަމަ ބުރުގައި ގުރައިދޫ ކުޅުނު ފަހު މެޗުގެ އެންމެ ފަހު 10 މިނެޓްގައި ވަދީއު ކުޅެން ނުކުތެވެ. އެއީ އަހަރުތަކެއްގެ މެދުކެނޑުމަކަށް ފަހު ރަށުގެ ޖޯޒީގައި ގަލޮޅު ދަނޑަށް އޭނާ ކުޅެން ނުކުތް ފުރަތަމަ މެޗެވެ.

ދަރިފުޅު، އަހްޒަމް ފުޓްބޯޅައިން ކުރިއަށްދާތަން ފެނުމަކީ ވަދީއުގެ އުއްމީދެކެވެ. އެފްއޭއެމުން މި އަހަރު ބޭއްވި 19 އަހަރުންދަށުގެ ޔޫތު މުބާރާތުގައި ސުޕަ ޔުނައިޓެޑް ސްޕޯޓްސް (ސަސް) ޓީމުގައި އަހްޒަމް ވަނީ މޮޅު ކުޅުމެއް ދައްކައިފަ އެވެ. މިހާރު ކުރިއަށްދާ ޔޫތު ލީގުގައި ވެސް ސަސްގެ ސްކޮޑްގައި އަހްޒަމް ވަނީ ހިމަނައިފަ އެވެ.

ވަދީއު ބުނީ އަހްޒަމްގެ ކުރިއެރުމުގައި ގިނަ ކޯޗުންގެ އެހީތެރިކަން ލިބުމަކީ ބޮޑު ހިތްހަމަޖެހުމެއް ކަމަށެވެ.

"ފަރީދު [ސަސްގެ އެކަޑަމީ ކޯޗު] ނަން ފާހަގަކޮށްލަން ބޭނުން،" ވަދީއު ބުންޏެވެ.

ރާއްޖޭގެ ފުޓްބޯޅައިގެ މަތީ ފެންވަރުގައި އަހްޒަމް ކުޅޭތަން ފެންނަ ދުވަސް ވާނީ، ވަދީއު ބުނި ގޮތުގައި އޭނާ އަށް ލިބޭނެ އެންމެ ބޮޑު އުފަލެވެ. "ވަރަށް ދެކެން ބޭނުން ސީނިއާ ގައުމީ ޓީމަށް އޭނަ ކުޅޭތަން ދެކެން،" ކުރިން 23 އަހަރުންދަށުގެ ގައުމީ ޓީމަށް ކުޅުނު ވަދީއު ބުންޏެވެ.

ފަރީދު ބުނީ، އަހްޒަމްއަކީ ރާއްޖޭގެ ފުޓްބޯޅައިގައި ކުރިމަގު އޮތް ކުޅުންތެރިޔެއް ކަމަށެވެ.

"އަޅުގަނޑުމެންގެ އެކަޑަމީގެ 14 އަހަރުންދަށުގެ ޓީމަށް ވެސް ކުޅުނު މިހާރު 16 އަހަރުންދަށުގެ ޓީމުގައި ވެސް އިންނާނެ. ވަރަށް ޕޮޓެންޝިއަލް އޮތް ކުޅުންތެރިޔެއް އެއީ،" ފަރީދު ބުންޏެވެ.