އާއްމު ސިއްހަތަށް ނުރައްކާވާ ގޮތަށް މާލޭގައި ކާބޯތަކެތީގެ ވިޔަފާރި ހިންގި ތަނަކުން 13 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
އިމިގްރޭޝަނުން ބުނީ ވިޔަފާރި ހިންގަމުން ދިޔަ ތަނަކުން އެ ބިދޭސީން އިއްޔެ އަތުލައިގަތީ ހިންގި ރެއިޑް އޮޕަރޭޝަނެއްގައި ކަމަށެވެ. އެތަނުގައި ގަވާއިދާ ޚިލާފަށް އުޅެމުން ދިޔަ އަދި ވިޔަފާރިކުރި މީހުން ހުއްޓުވާފައިވާ ކަމަށް އިމިގްރޭޝަނުން ބުންޏެވެ.
އެ އޮޕަރޭޝަނަށް ފަހު އާއްމުކުރި ވީޑިއޯ އިން ފެންނަ ގޮތުގައި ކުޑަ ތަންކޮޅެއްގެ ތެރޭގައި ވަރަށް މުޑުދާރުކޮށް ގިނަ އަދަދެއްގެ ކާބޯތަކެތި ދިޔައީ ތައްޔާރުކުރަމުންނެވެ. ކެއްކުމަށް ބޭނުންކުރާ ބައެއް ސާމާނު ބިންމަތީގައި އެއްވެސް ސާފުތާހިރު ކަމެއް ނެތި ބަހައްޓާފައި ހުއްޓެވެ.
ބައެއް ބިދޭސީން ނިދަން އެތަނުގެ ތެރޭގައި ހުރީ ބަރިބަރިއަށް އެނދުތައް ވެސް އަތުރައިފަ އެވެ.
ބިދޭސީން ރާއްޖޭގައި ވިޔަފާރި ހިންގުމަކީ މަނާކަމެކެވެ. އެކަމަކު ފުޅާދާއިރާއެއްގައި ބިދޭސީން ވިޔަފާރި ހިންގަތީ އެ ތަންތަނަށް ވަދެ އިމިގްރޭޝަނުން އަންނަނީ ފިޔަވަޅު އަޅަމުންނެވެ.
މިފަދަ ބިދޭސީން ހޯދަން އިމިގްރޭޝަނުން ހިންގާ އޮޕަރޭޝަނަށް އެހީވެ، މައްސަލަތައް ރިޕޯޓް ކުރަން މިދިޔަ އަހަރު ޖުލައި މަހުގައި "އިމިގްރޭޝަން ވޮޗް" ޕޯޓަލްއެއް ވެސް ވަނީ ތައާރަފްކޮށްފަ އެވެ.
އެ ޕޯޓަލްއަށް ހަތަރު މަސް ތެރޭގައި ހާހަކަށް ވުރެ ގިނަ މައްސަލަ ހުށަހެޅި ކަމަށް އިމިގްރޭޝަނުން ވަނީ ބުނެފަ އެވެ.
އިމިގްރޭޝަންގެ އޮޕަރޭޝަނުގައި ވޭތުވެދިޔަ އަހަރެއްހާ ދުވަހުގެ ތެރޭގައި 5،000 އަށް ވުރެ ގިނަ ބިދޭސީން ވަނީ ޑީޕޯޓްކޮށްފަ އެވެ.