ބައިޓަނުގެ މިޔަރު މަސް ވަގަށް ބޭރުކުރަން އުޅުނު ކުންފުނީގެ ނަން އެންމެފަހުން އާންމުކޮށްފި

ރާއްޖެ އިން ބައި ޓަނުގެ މިޔަރު މަސް ވަގަށް ބޭރުކުރަން އުޅުނު ކުންފުނީގެ ނަން ސިއްރުކުރަން ނިންމި ނިންމުން ކަސްޓަމްސް އިން އެންމެ ފަހުން ބަދަލުކޮށް، އެ ކުންފުނީގެ ނަން މިރޭ އާންމުކޮށްފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު" އިން ފޮނުވި ސުވާލުތަކާ ގުޅިގެން ކަސްޓަމްސް އިން ފުރަތަމަ ބުނީ ރާއްޖެ އިން 582 ކިލޯގެ މިޔަރު މަހާއި މަޑިމަސް ބޭރުކުރަން އުޅުނު ކުންފުނީގެ ނަން ސިއްރުކުރީ އެއީ މި ވަގުތު ތަހުގީގު ކުރަމުންދާ މައްސަލައަކަށް ވާތީ ކަމަށެވެ.

އެކަމަކު، އެ މައްސަލާގައި މިރޭ ކަސްޓަމްސް އިން ބުނީ މިދިޔަ އަހަރުގެ ނޮވެމްބަރު މަހު އެ އިދާރާ އިން ބަލައި ފާސްކުރި މުދާ ޝިޕްމެންޓެއްގެ ތެރެއިން މިޔަރު މަހާއި މަޑިމަސް ހުރި 45 ފޮށިގަނޑު ފެނިފައިވާ މައްސަލައެއް ތަހުގީގު ކުރަމުން އަންނަ ކަމަށެވެ.

އެ ޝިޕްމެންޓް ކަސްޓަމްސް އަށް ޑިކްލެއާ ކޮށްފައިވަނީ "ދަ ކްރިސްޓަލް ކޮމްޕެނީ ޕްރައިވެޓް ލިމިޓެޑް" ނަމަކަށް ކިޔާ ކުންފުންޏަކުން ކަމަށް ވެސް ބުންޏެވެ. އިކޮނޮމިކް މިނިސްޓްރީގެ ބިޒްނަސް ރަޖިސްޓަރީ ޕޯޓަލް އިން ދައްކާ ގޮތުން އެ ކުންފުނީގެ ހިއްސާދާރުންނަކީ މަޝްހޫރު ފިލްމީތަރި ފާތިމަތު ނަހުލާ އާއި އޭނާގެ ފިރިމީހާ ހުސައިން ސިނާނެވެ. ދަ ކްރިސްޓަލް ކޮމްޕެނީ ޕްރައިވެޓް ލިމިޓެޑް ރަޖިސްޓަރީ ކޮށްފައި ވަނީ 2005 ގަ އެވެ.

މި މައްސަލައާ ގުޅިގެން ކަސްޓަމްސް އާއި ކަމާބެހޭ އެހެން އިދާރާތަކުން ބަލަންޖެހޭ ބެލުންތައް ބަލައި އަދި ފުރިހަމަ ކުރަންޖެހޭ އިޖުރާއަތުތައް ފުރިހަމަ ކުރުމަށް ފަހު މިދިޔަ އަހަރުގެ ޑިސެމްބަރު މަހުގެ 22 ވަނަ ދުވަހު އެ ތަކެތި ނައްތާލާފައިވާ ކަމަށް އެ އިދާރާ އިން ބުންޏެވެ.

ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރި ކޮންޓްރޯލް ކުރުމުގެ ގާނޫނުގެ ދަށުން، މިޔަރަކީ ރާއްޖެއިން ބޭރުކުރުން މަނާތަކެތީގެ ތެރޭގައި ހިމެނޭ އެއްޗެކެެވެ.

Vagah bai tanuge miyaru beyrukuran ulhunu company nan sirru

The most trusted news source in the Maldives

Mihaaru

ކަސްޓަމްސް އިން ކުރިން ބުނެފައިވަނީ އެ ތަކެތި ބޭރުކުރަން އުޅުނީ ލޮނު މަހުގެ ގޮތުގައި ކަމަށެވެ. އެކަމަކު، މެރިން ރިސާޗް ސެންޓަރުން އިތުރަށް ޓެސްޓު ހެދުމަށް ފަހު، އެއީ މިޔަރު މަހާއި މަޑި މަސް ކަމަށް ކަށަވަރުކޮށް ދީފައިވާ ކަމަށް ކަސްޓަމްސް އިން ބުންޏެވެ.

މިޔަރާއި މަޑީގެ ބާވަތްތަކަކީ ރާއްޖޭގެ މަސްވެރިކަމުގެ އާއްމު ގަވާއިދުގެ ދަށުން ހިފުމާއި ބޭނުން ކުރުމާއި ރާއްޖެއިން ބޭރަށް އެކްސްޕޯޓް ކުރުން ވެސް މަނާ ބާވަތްތަކެވެ.