ޓްރަމްޕުގެ ޕްލޭން ޣައްޒާގައި ތަންފީޒުކުރާނަން: ނަތަންޔާހޫ

ފަލަސްތީނުގެ ޣައްޒާއިން އާންމުން ނެރެލަން އެމެރިކާގެ ރައީސް ޑޮނަލްޑް ޓްރަމްޕް ގެންގުޅޭ ޕްލޭނަށް ފުރިހަމައަށް ތާއީދުކުރާ ކަމަށާއި އެ ޕްލޭން ތަންފީޒުކުރަން އިޒްރޭލު އޮތީ ތައްޔާރަށް ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފި އެވެ.

ނަތަންޔާހޫ އެމެރިކާއަށް ކުރި ދަތުރު ނިންމާލައި ހޮނިހިރު ދުވަހުގެ ރޭ ފޮކްސް ނިއުސްއަށް ދިން އިންޓަވިއުއެއްގައި ޓްރަމްޕްގެ ހުށަހެޅުން ވަރަށް ބޮޑަށް ދިފާއުކުރި އެވެ. އެކަމަކު މެދުއިރުމައްޗާއި މުޅި ދުނިޔެއިން ވަނީ ޓްރަމްޕުގެ ވާހަކަތައް ވަރަށް ބޮޑަށް ކުށްވެރިކޮށްފަ އެވެ.

ރައީސް ޓްރަމްޕްގެ ހުށަހެޅުމަކީ ފާއިތުވި އަހަރުތަކުގެ ތެރޭގައި ގެނައި ފުރަތަމަ އާ ވިސްނުން. އެއީ ޣައްޒާގެ ހުރިހާ ކަމެއް ބަދަލުކުރުމުގެ ގާބިލުކަން ލިބިފައިވާ ޕްލޭނެއް. އެއީ ފަލަސްތީނުގެ ބިމުގެ މުސްތަގުބަލަށް ރަނގަޅު ވިސްނުމެއް،" ނަތަންޔާހޫ ބުންޏެވެ.

"ޓްރަމްޕް އެ ވިދާޅުވަނީ ވަގުތީ ގޮތުން މީހުން ނެރެ މި ހުޅުވާލަދެނީ އުމްރާނީ ގޮތުން އަލުން އާރާސްތުކޮށްދިނުމަށް ފަހު އާ ފުރުސަތެކޭ."

އޭނާ ބުނީ ޓްރަމްޕް ޣައްޒާއަށް އެމެރިކާ ސިފައިން ފޮނުވައިގެން އެކަން ކުރާ ވާހަކަ ނުބުނާ ކަމަށާއި "އެކަން ކުރާނީ އިޒްރޭލުން" ކަމަށެވެ.

އިޒްރޭލުން 1967 ވަނަ އަހަރު ޣައްޒާ ހިފައި، 2005 ވަނަ އަހަރާ ހަމައަށް އެ ސަރަހައްދުގައި އަސްކަރީ ބާރުތައް ދަމަހައްޓަމުން ގެންދިޔަ އެވެ. އެކަމަކު 2005 ވަނަ އަހަރު ޔަހޫދީ ވަޒަންވެރިންނާއި އިޒްރޭލު ސިފައިން އެތަނުން ފޭބި އެވެ. އޭގެ ފަހުން ހަމާސްގެ ވެރިކަންކުރާ އެ ސަރަހައްދު އެއްކޮށް ހިސާރުކުރި އެވެ. އަދި 2023 ވަނަ އަހަރުގެ އޮކްޓޫބަރު މަހު ހަނގުރާމަ ފެށުމަށް ފަހު އިތުރަށް ދަތިކުރި އެވެ.