މެޒޯ: ދާނޭހޭ ތިހަނދާން ފިލާ

ދިވެހި މިއުޒިކްގެ ލެޖެންޑު، މުހައްމަދު މާޖިދު (މެޒޯ މޯޑް) ގެ ކުއްލި ވަކިވުމުން ގިނަ ބަޔަކަށް ލިބުނީ ސިހުމެކެވެ. ހަނދާނަށް އައީ އޭނާ ކިޔާފައިވާ "ދާނޭހޭ ތި ހަނދާންފިލާ" އާއި މި ކަހަލަ ރީތި، އެތައް ލަވައެކެވެ. އޭނާ ކިޔާފައި ވަނީ ހަނދާނުން ފިލައިގެން ނުދާހެނާ ރީތި ލަވަތަކެވެ.

އުމުރުން 59 އަހަރުގައި މެޒޯ މިއަދު ނިޔާވީ ހާޓް އެޓޭކެއް ޖެހިގެންނެވެ.

މީގެ ގާތްގަނޑަކަށް ތިން ވަރަކަށް މަސް ދުވަސް ކުރިން މެޒޯ "މިހާރު"ގެ ޕޮޑްކާސްޓް "މިވާހަކަ" އަށް ހާއްސަ އިންޓަވިއުއެއް ދިނެވެ.

ގަލޮޅު އުތުރު ދާއިރާގެ މަޖިލިސް މެމްބަރު މުހައްމަދު އިބްރާހިމް (ކުޑޫ) ހޮސްޓު ކުރައްވާ އެ ޕޮޑްކާސްޓުގައި މެޒޯ ވަނީ އޭނާ މިއުޒިކީ ހަޔާތާއި އަމިއްލަ ދިރިއުޅުމުގެ ބައެއް ވާހަކަތައް ހިއްސާ ކޮށްފަ އެވެ. ގައުމާއި ސިޔާސީ ކަންކަމުގައި އޭނާގެ ވިސްނުމާއި ޝުއޫރު ފާޅުކުރި އެވެ.

މެޒޯ ބުނި ގޮތުގައި، ލަވަކިޔުމާއި މިއުޒިކް ކުޅުމަކީ އޭނާ އުފަންވީ އިރު ވެސް ހުރި ހުނަރެކެވެ. އެކަމުގެ ތެރޭގައި ނޫޅޭ އިރެއް އޭނާގެ ހަނދާނަކު ނެތެވެ. އާއިލާގެ ތެރެއިން އުފެދުނު އެ ޝައުގުވެރިކަމުގައި އަބަދުވެސް ދެމިހުރީ އެވެ.

މިއުޒިކީ ދުނިޔެއަށް މެޒޯ ތައާރަފުކޮށްދިނީ އޭނާގެ ބޭބެ އަދި ކުރީގެ މަޝްހޫރު ލަވަކިޔުންތެރިޔާ ކުޑަދޮން އަބްދުއްސައްތާރެވެ. އޭނާގެ ހިންގެވި މަޝްހޫރު މިއުޒިކް ގްރޫޕެއް ކަމުގައިވީ ކްލަބް ކޯބްރާޒް އަކީ މެޒޯގެ ފެށުމެވެ. އޭރު އޭނާގެ އުމުރުން އެންމެ ނުވަ އަހަރެވެ. އެ ގްރޫޕާ އެކު އޭނާ މިއުޒިކް ކުޅެން ފުރަތަމަ ދިޔައީ ރިސޯޓުތަކަށެވެ.

"މަގު މައްޗަށް އީދަށް ނުކުމެވިފައި ހުންނާނީ އުމުރުން ހަތް އަހަރުގައި، އޭރު ވެސް ގިޓާގައި ކޯޑު އަޅަން އެނގޭ. ބެރުގައި ހަމައަށް ޖަހަން އެނގޭ، ދެން އޭރަށް ވާ ވަރަށް. ޕިކަޕެއް ނޫން، ދަމާގާޑިޔަލުގައި އީދުގައި މަގުމައްޗަށް ނުކުނަން،" މެޒޯގެ އޭރުގެ ހަނދާންތައް "މިހާރު" ޕޮޑްކާސްޓަށް ކިޔައިދެމުން ބުނެފައި ވެ އެވެ.

އޭރު އެ މީހުން ޝޯތައް ދީ އުޅުނީ ދަމާގާޑިޔަލުގަ އެވެ. ދަމާގާޑިޔަލަށް ސައުންޑް ސިސްޓަމު އަރުވައިގެން ފަހަރަކު ގެއަކަށް މަޑުކޮށް 15 ރުފިޔާގެ މަގުން ޝޯތައް ކުޅެމުން ގެންދިޔައީ އެވެ.

އޭނާގެ 48 އަހަރުވީ ދިގު ކެރިއަރުގައި ހަތަރު އަލްބަމަކާ އެކު 40 އަށް ވުރެ ގިނަ އަމިއްލަ ރާގުގެ ލަވަތައް އުފެއްދި އެވެ.

ނުވަދިހައިގެ އަހަރުތަކުގައި ދިވެހިންގެ މެދުގައި ބޮޑު މަގުބޫލު ކަމެއް ހޯދި "މެޒޯ" ބޭންޑާ އެކު ނުކުތުމުގެ ކުރިން ކްލަބް ކޯބްރާޒް އާއި ކްރީމް އޮފް އެސިޑް އަދި އޭރުގެ މަޝްހޫރު ކުއިކް ސޭންޑާއި ޓުވެންޓިއަތު ސެންޗުރީ ބީސީ އަށް ވެސް މެޒޯ މިއުޒިކް ކުޅުނެވެ.

"އަސްލު މުޅި މިއުޒިކީ ކެރިއާއަށް މަ ފަހުރުވެރިވަން،" މެޒޯ ބުންޏެވެ.

އޭނާގެ ލަވަތަކުން އެންމެ ހާއްސަ ލަވަޔަކީ ކޮބައިތޯ އެހުމުން ޖަވާބުގައި މެޒޯ ބުނީ އެހެން ވަކި ލަވައެއް ބުނަން ދަތި ކަމަށެވެ. ހުރިހާ ލަވައެއް ވެސް އޭނާ އަށް ހާއްސަ އެވެ.

"ހަމަ ހުވާ ދޮގެއް ނުހަދާ މި ބުނީ، އެއް ލަވައެއްގެ ނަން ހިތަށް ވެސް ނާދޭ،" އޭނާ ބުންޏެވެ.

"ވިސްނާ، ވިސްނާ އެއީ ހަގީގަތުގައި ވެސް މަގޭ ބޮޑު ވިސްނުންގަނޑެއް. އޭރު އަހަރެން ހަމަ ހިތަށް އަރާ ވާހަކައެއް އެއީ،

"ސުވާލެއް ހީވޭ އޮއްސެނީއޭ ހަނދާއި ތަރިތަކާއި އިރާ ވެސް އެކު، ހުރިހާ އެއްޗެއް އޮއްސެނީއޭ. ހީވޭ ހުއްޓިފައިވާހެން ކާއިނާތުގެ ހިނގުން، ހީވޭ ކޮސް ގޮވޭހެން. މަށަށް މަ މީ މޮޔައެކޭ ވެސް ހިތަށް އަރައޭ، އެންމެ މި ތިބީ މޮޔަވެފައޭ، އެންމެ ނަށާހެން ވެސް މަށަށް ހީވެޔޭ. އެއީ ހަމަ މަގޭ ޑައިރެކްޓު އިހުސާސް."

ރިސޯޓް މިއުޒިކްގައި ދިވެހި މިއުޒީޝަނުންނަށް އޮތް ފުރުސަތުތައް ހަނިވާތީ، އެކަން ބަދަލުކުރަން އެންމެ ގިނައިން ވަކާލާތު ކޮށްދިން އެކަކީ ވެސް މެޒޯ އެވެ. ލިބުނު ކޮންމެ ފުރުސަތެއްގައި އެ ވާހަކަ ދެއްކި އެވެ.

"ދިވެހިންނަށް އޮންނަ ފުރުސަތު ކުޑަވެ، ބޭރުގެ މީހާ އަތްމައްޗަށް ދަނީ،" އޭނާ ބުންޏެވެ.

އެންމެ ބޮޑު އެއް ޗެލެންޖަކީ އޭނާ ބުނެފައިވާ ގޮތުގައި، ލިބޭ އާމްދަނީގެ ފަރަގެވެ. ބޭރުގެ މިއުޒީޝަނަކާއި ދިވެހި މިއުޒީޝަކަށް ދޭން ޖެހޭ އާމްދަނީ ހާސްބައި ތަފާތެވެ. ރިސޯޓުތަކުން ގިނަ ފަހަރަށް އަގުހެޔޮ ދިމާލަށް ދިއުމުން ދިވެހި މިއުޒީޝަނުންނަށް އޮންނަ ފުރުސަތު ގެއްލެނީ އެވެ.

"ދެ ފަރާތުގެ ވެސް އޮންނާނެ، ރިސޯޓު ހިންގާ ފަރާތުގެ ވެސް އޮންނާނެ ވެލިޑް، ހަގީގަތުގައި ވެސް އަޑުއަހަން ޖެހޭ ވާހަކަތަކެއް. އެ މީހުންގެ އެންޓަޓެއިންމަންޓަކީ އެ މީހުނަށް މަސްޓެއް ވެސް މެ. އެކަން ވެސް އަމާންކޮށް، ސްމޫތުކޮށް ދާން ޖެހޭނެ. އަހަރެމެންގެ ދަތުރުފަތުރު މި ހުރި ގޮތާއި އަހަރެމެންގެ ދިރިއުޅުމުގެ ވައްޓަފާޅި އާއި ރިސޯޓު އޯނަރު ބޭނުންވާ ގޮތް މުޅިން ދެގޮތަކަށް ވެދާނެ،" މިހާރުގެ ޕޮޑްކާސްޓުގައި މެޒޯ ބުނެފައިވެ އެވެ.

"ވަކި ކޮޅެއް ބަދުނާމުކޮށް، ބުނަނީއެއް ނޫން ނަމަވެސް، ފުރުސަތު ވަރަށް ބޮޑަށް ގެއްލިފައި މި އޮތީ ދިވެހި މިއުޒީޝަނުންނަށް."

ލަވަ އާއި މިއުޒިކްގެ އިތުރުން މެޒޯ އަކީ ގައުމުގައި ހިނގި ސިޔާސީ ބޮޑެތި ކަންކަމުގައި ވެސް، އިސްލާހަށް މަސައްކަތްކުރި އެކިއެކި ބޭފުޅުންނާ އެކު މަސައްކަތްކުރި މީހެކެވެ. މެޒޯ އަމިއްލަ އަށް ވެސް ބުނި ގޮތުގައި، އޭނާ އަކީ ވަރަށް ގައުމީ މީހެކެވެ. އެހެންވެ، މިއަދު މި ވަކިވީ މިއުޒިކީ ލެޖެންޑެއްގެ އިތުރުން ގައުމު ދެކެ ވަރަށް ލޯބިވި ދަރިއެކެވެ.

މެޒޯގެ "މާކަނޑުގެ މެދުތެރެއިން" އަޑުއަހާލުމުން މި ވަތަނީ އިހުސާސް އެންމެންނަށް ވެސް ކުރެވޭނެ އެވެ.