ޝަރުއީ ދާއިރާއާއި މަޖިލީހުގެ މުސާރަ ކުޑަކުރަން ނުފެންނަ ކަމަށް ފާސްކޮށްފި

މިނިވަން މުއައްސަސާތަކާއި ޝަރުއީ ދާއިރާގެ މުވައްޒަފުންގެ އިތުރުން ރައްޔިތުންގެ މަޖިލީހުގެ މެންބަރުންގެ މުސާރަ އިން 10 ޕަސެންޓު ކުޑަކުރަން ނުފެންނަ ކަމަށް މަޖިލީހުން މިއަދު ފާސްކޮށްފި އެވެ.

ސަރުކާރުގެ އިގްތިސާދީ އިސްލާހީ އެޖެންޑާގެ ދަށުން ކުރިއަށް އޮތް ދެ އަހަރު ދުވަހަށް ސަރުކާރުން އަޅަން ނިންމި ފިޔަވަޅުތަކުގެ ތެރޭގައި މިނިވަން މުއައްސަސާތަކުގައި އަސާސީ މުސާރަ 12،000 އަށް ވުރެ މަތިން ލިބޭ ނަމަ 10 ޕަސެންޓު އުނި ކުރުމަށާއި މަޖިލީހަށް ފެންނަ ނަމަ ޝަރުއީ ދާއިރާ އާއި މަޖިލިހުގެ މެންބަރުންގެ މުސާރައިން ވެސް 10 ޕަސެންޓް ކުޑަ ކުރަން ބޭނުންފުޅުވާތީ މަޖިލިހުގެ ލަފައަކަށް ރައީސް ޑރ. މުހައްމަދު މުއިއްޒު އޮތީ އެދިވަޑައިގެންފަ އެވެ.

އެކަމަކު، އެ މައްސަލަ ދިރާސާކުރުމަށް ފަހު، މާލިއްޔަތު ކޮމިޓީން ނިންމި ނިންމުމުގައި ވަނީ މި އިދާރާތަކުގެ މުސާރަ ކުޑަކުރެވެން އޮތީ ގުޅުން ހުރި ގާނޫނުތަކަށް ބަދަލު ގެނެސްގެން ކަމަށެވެ.

އެއް ގިންތިއެއްގެ މަގާމުތަކުގެ މުސާރަ އެއް ހަމަކުރުމަކީ ކޮމިޓީގެ ޒިންމާއެއް ކަމަށް ވާއިރު، ގާނޫނަށް ބަދަލު ނުގެނެސް މުސާރަ ކުޑަކުރުމަކީ އިންސާފުވެރި ގޮތެއް ނޫން ކަމަށް އެ ކޮމިޓީން ނިންމި އެވެ.

އެހެންކަމުން، ރައްޔިތުންގެ މަޖިލިހުގެ މެންބަރުންނާއި ޝަރުއީ ދާއިރާގެ އިސްވެރިންނާއި މިނިވަން މުއައްސަސާތަކުގެ ވެރިން ހިމެނޭހެން މަޖިލީހުގެ މުސާރަ ކަނޑައަޅާ މަގާމުތަކުގެ މުސާރަ މިވަގުތަށް ކުޑަކުރަން ނުުފެންނަ ކޮމިޓީން ނިންމީ އެވެ.

Sharuee dhairaa ai minivan muassasaa thakuge musaara kuda kurevey kah neh kamah committee inn ninmaifi

The most trusted news source in the Maldives

Mihaaru

އެހެންވެ، ގުޅުން ހުރި ގާނޫނުތަކަށް ގެންނަން ޖެހޭ ބަދަލުތައް ގެނެވުމުން، އެ މައްސަލަ އަލުން މަޖިލީހަށް ހުށަހެޅުމަށް ރައީސް މުއިއްޒަށް ލަފާ އެރުވުމަށް ވެސް މާލިއްޔަތު ކޮމިޓީގެ ރިޕޯޓުގައިވެ އެވެ.

މިނިވަން މުއައްސަސާތަކުގެ ތެރޭގައި ހިމެނޭ މީޑިއާ ކައުންސިލާއި ބްރޯޑްކާސްޓިން ކޮމިޝަން ފަދަ އިދާރާތައް އެއްކޮށްލައިގެން މިހާރަށް ވުރެ ހަރުދަނާކަމާ އެކު، އިދާރާތައް ހިންގައި ހަރަދުތައް ކުޑަކުރެވޭނެ ކަމަށް ވެސް ކޮމިޓީން ނިންމި އެވެ. އަދި އެފަދަ ގޮތަކަށް އެއްކޮށްލައިގެން ހިންގޭނެ އިދާރާތައް ދަނެގަނެ، އެކަމާ ގުޅޭ ގޮތުން ގާނޫނީ ގޮތުން ކުރަން ޖެހޭ މަސައްކަތްތައް ކުރުން އަވަސް ކުރުމަށް ވެސް ކޮމިޓީން ނިންމާފައިވެ އެވެ.

ކޮމިޓީގެ ރިޕޯޓު މަޖިލީހުގެ މިއަދު ފާސްކުރީ ވޯޓުގައި ބައިވެރިވެވަޑައިގެންނެވި 44 މެންބަރުންގެ އިއްތިފާގުންނެވެ.

ދައުލަތުގެ ހަރަދުތައް ކުޑަކުރުމަށް ކުރާ މަސައްކަތުގެ ދަށުން މިދިޔަ އަހަރުގެ އޮކްޓޫބަރު މަހު ރައީސް މުއިއްޒު ވަނީ ސަރުކާރުގެ ކުންފުނިތަކުގެ އިތުރުން ސިޔާސީ މުވައްޒަފުންނާއި ދައުލަތުގެ ތިން ބާރުގެ އިސްބޭފުޅުންނާއި މިނިވަން މުއައްސަސާތަކުގެ ވެރިންނާއި މަޖިލީހުގެ މެމްބަރުންގެ މުސާރަ އިން 10 ޕަސެންޓް ދެ އަހަރު ދުވަހުގެ މުއްދަތަށް އުނިކުރުމަށް ވެސް ނިންމަަވައިފަ އެވެ.

އެ ނިންމެވުމަށް ފަހު، އެ މަނިކުފާނު ވެސް ވަނީ އަމިިއްލަފުޅު މުސާރަ އިން 50 ޕަސެންޓް ނުނެންގެވުމަށް ނިންމަވައިފަ އެވެ. އެއާ އެކު، ރައީސަށް ލިބިވަޑައިގަންނަވާނީ 50،000ރ. ގެ މުސާރައެކެވެ. ހަރަދު ކުޑަކުރުމުގެ ގޮތުން ޕީސީބީ އިން ވަނީ ކުންފުނިތަކުގެ ވެރިންގެ މުސާރަ ވެސް ލިމިޓު ކޮށްފަ އެވެ. ކުރިއަށް އޮތް ދެ އަހަރުގެ މުއްދަތަށް ސަރުކާރު ކުންފުނިތަކުގެ އިސްވެރިންގެ މުސާރަ އާއި އިނާޔަތްތަކުގެ ގޮތުގައި ގިނަވެގެން ދެވޭނީ 90،000ރ. ކަމަށް ކަނޑައަޅާފައި ވެ އެވެ.