19 މާޗް 2025 - 12:00
ހަ އަހަރުގެ ދަރިފުޅު ޒާހީ ޒަރީރު، އިނީ ފޯނަށް ގެއްލިފަ އެވެ. ސޯޅަ އަހަރުގެ ދަރިފުޅު ޒާރާ ޒަރީރު، އޮތީ ތަންކޮޅެއް ދުރުގައި އުނދޯންޏެއްގައި ފޯނަށް ގެއްލިފަ އެވެ. އެކަމަކު ދޭތެރެއަކުން ކޮށްފާނެ ކަމެއް ހިތަށް ވެސް އަރުވާލަން ނޭނގޭނެ އެވެ. ގައިގައި ބާރަށް ތަޅައިގެންފާނެ އެވެ. ވަކިއަޅައި އަނިޔާ ވެސް ކޮށްފާނެ އެވެ. ގޭތެރޭގައި ހުންނަ ކޮންމެވެސް އެއްޗަކަށް ވެސް ގެއްލުންދީފާނެ އެވެ. ރުޅިގަދަވާ ގަޑީގައި އެ ކުދިން ކޮންޓްރޯލް ނުކުރެވެނީ އެވެ. ދެތިން މީހަކު ހިފަހައްޓައިގެން ހުއްޓުވަން ޖެހޭ ފަހަރު ވެސް އާދެ އެވެ.
ފޯނު ދީގެން އަބަދު އުޅެން ޖެހެނީ އެ ކުދިންނަށް އަދި އެހެން މީހުންނަށް ގެއްލުމެއް ވެދާނެ ފަދަ ކަމެއް ކޮށްފާނެތީ އެވެ. ފޯނު ދީފި ނަމަ ގިނައިރު މަޑުން ތިބޭނެ އެވެ.
އޯޓިޒަމް ދެ ކުދިންގެ މަންމަ، ރަޝީދާ މުހައްމަދު ހުއްޓުން އަރާފައި އިނީ މި ވާހަކަތައް ފަށާނެ ގޮތެއް ނޭނގިގެންނެވެ. ކޮންމެ ދުވަހަކު އޭނާ ކުރިމަތިލާ ހިތްދަތިކަން ކިޔައިދިނުން ފަސޭހަ ކަމަކަށް ނުވީމަ އެވެ. ހިތްހަމަޖެހުމެއް ނުލިބި، ދަރިންނާ އެކު އޭނާގެ ދިރިއުޅުން "ޖަލެއްގައި" އުޅުން ފަދަ އެވެ.
މަންމަ އަށް ކިޔައިދޭން ފަސޭހަ ނުވި ވާހަކަތައް ފެށީ، މާމަ ރަމްލާ އަހުމަދެވެ.
"ކިޔައިދިނަސް އަސްލުގައި ނޭނގޭނެ ކޮންމެ ދުވަހަކު މިއުޅެން ޖެހޭ ހާލު."
ކުދިން އޮބިނޯވެ ބޭރަށް ނުކުންނާތީ، ގޭގެ ވަށާ ފާރު ހުރީ 11 ވަރަކަށް ފޫޓަށް ރާނައިފަ އެވެ. އެ ގޭގައި ލާފާއި ހުރި ދަގަނޑު ދޮރު 10 ވަރަކަށް ފޫޓަށް ހުއްޓެވެ. އެ ދޮރު ހުޅުވަން ތަޅެއް ލާފައެއް ނުހުރެ އެވެ. ދޮރުގައި ހުރީ ބޮޑު މީހަކު ކިރިޔާ އަތް ޖެހޭ ހިސާބުން ދެފަރާތުން އަތް ލެވޭ ގޮތަށް ގޮޅިއެއް ކަނޑައި ދޮރުގެ ދެފަޅީފައި ތަންޑެއް ލައިފަ އެވެ.
"ކިރިޔާ ވެސް ދޮރު ހުޅުވިފައި ހުރެއްޖެއްޔާ ހަމަ ނުކުމެގެން ދަނީ. މި ކުޑަދަރި ދާ ގޮތަށް މޫދަށް މިހާރު ދަނީ. ކުރިން މީހުންގެ ގޭގެ އަށް ވެސް ދަނީ. އެހެންވެ ކުދިން ނިކުންނާތީ އެގޮތަށް ތަޅުލާފައި އެ ހުރީ،" މާމަ ބުންޏެވެ.
މި ދެ ކުދިންގެ ހުންނަނީ އޯޓިޒަމްގެ ވައްތަރެއް ކަމަށްވާ އެސްޕެރްގާ ސިންޑްރޮމް ނުވަތަ ހައި ފަންކްޝަނިން އެވެ.
ދެ ކުދިންގެ ވާހަކަ މަންމަ ކިޔައިދެނީ. -- ފޮޓޯ: ފަޔާޒް މޫސާ | މިހާރު
މާމަ ކިޔައިދިން ގޮތުގައި ވިހޭއިރު ދެ ކުދިން ވެސް ރަނގަޅެވެ. އެގޮތަށް ދިމާވުމުގައި، ފަރުވާ ދިން ޑޮކްޓަރުންގެ އިހުމާލު އޮތް ކަމަށް އާއިލާ އިން ދެކެ އެވެ.
ދެ ކުދިން ވެސް ވިހެއީ އެ އަތޮޅު މަނަދޫ ހޮސްޕިޓަލަށެވެ. ބޮޑު ކުއްޖާ ޒާރާގެ ހުންނަނީ އޯޓިޒަމްގެ އިތުރުން ރަނގަޅަށް އަޑު ނީވުމާއި ނުފެނުމެވެ.
"މި ދަރިފުޅަކީ ހަމަ ރަނގަޅު ކުއްޖެކޭ ވިހޭއިރު، ސިކުނޑި ސަލާމަތުން ހުންނަ. ދައްތަ މި ކިޔަނީ [ހޮސްޕިޓަލުގައި އޮތް އިރު] ރީނދޫ ވަނީއޭ. ރުޅި އައިސްގެން އެއްޗެއް ބުނީމަ އެ މީހުން ބެލީދެން. ދައްތަ ވެސް މިއީ ލޭ މައްޗަށް ގޮސް، ތުރުތުރު އަޅާ މީހެއް،" ރަމްލާ ބުންޏެވެ.
"އެ މީހުން ގަބޫލު ނުކުރީމަ ކުއްޖާ ބަލަ ބަލަ ހުއްޓާ ރީނދޫވީ. ކުއްޖާގެ އަތެއް ފައެއްވޭ [އަތުން އިޝާރާތްކުރަމުން] މިވަރު. ވިހޭއިރު ހަތަރު ކިލޯ ހުރި. ދެން އެ ދުވަހު ދައްތައަށް އެންގީ ކުއްޖާ ގޮވައިގެން މާލެ ދާން. ދައްތަ ބުނިން މިތަނުން، މަނަދޫ ހޮސްޕިޓަލުން ޒިންމާ ނުނަގަނީހެއް ނުދާނަމޭ މާލެއަކަށް. ލޯންޗުގެ އެއްބައިގަ ހިފީމަ ދައްތަ މި ހުރީ ފުރައިގެން ދާށޭ މާލެއަށް. ކަލޭމެންގެ އިހުމާލުންނޭ މިގޮތަށް ކަންތައް މި ދިމާވީ. އެހެންވީމަ ނުދާނަމޭ."
ފޯނު ހިފަހައްޓައިގެން ކުޑަދަރިފުޅު މަންމަ ދައްކާ ވާހަކައަށް ސަމާލުކަން ދީގެން. -- ފޮޓޯ: ފަޔާޒް މޫސާ | މިހާރު
ޒާރާ މާލެއަށް ގެނެވުނު އިރު ހޮސްޕިޓަލުގައި ބާއްވާނެ އެނދެއް ނުލިބި ދިގުލައިގެން ދިޔަ އެވެ. އެހެންވެ އަނެއްކާ ވެސް މަޑުކުރަން ޖެހުނު ކަމަށާއި އޭރު އެ ދަރިފުޅުގެ ގަޔަށް އަޅަން ލޭ ހޯދަން ޖެހި ހަކުރު ވެސް ވަރަށް ބޮޑަށް ދަށް ވެފައިވާކަން ޑޮކްޓަރުންނާ ހަވާލާދީ މާމާ ކިޔައިދިނެވެ.
އޯޓިޒަމް ހުންނަ ކަން އެނގުނީ، ކުއްޖާ ހެދި ބޮޑުވުމުގައި ފާހަގަވި މައްސަލަތަކާ ގުޅިގެން އިންޑިއާ އަށް ގޮސް ޑޮކްޓަރަށް ދެއްކުމުންނެވެ.
"...ފޯނުގައި ލޯ ޖައްސައިގެން އެއްޗެހި ބަލާނީ ވެސް. ތިން އަހަރުގައި ބޭރަށް ގޮސްގެން އެނގުނީ އޯޓިޒަމް ކުއްޖެއްކަން. ޑޮކްޓަރުން ބުނަނީ ރީނދޫވެގެން ސިކުނޑިއަށް އަސަރުކޮށްފައޭ. ސިކުނޑި ބޮޑެއް ނުވޭ. އޭރު ވެސް ވާހަކައެއް ނުދައްކާ. މިހާރު ވަރަށް ބައިވަރު އެއްޗެހި ކިޔާ،" މަންމަ ރަޝީދާ ބުންޏެވެ.
ދެ ކުދިން ޖޯލީގައި: މި ދެ ކުދިން ސްޕީޗް ތެރަޕީން ރަނގަޅު ކުރެވޭނެ ކަަމަށް ޑޮކްޓަރުން ބުންޏަސް ނެތީ އެ ތަނަވަސްކަން. -- ފޮޓޯ: ފަޔާޒް މޫސާ | މިހާރު
އެ ފަހުން ދެ ފަހަރެއްގެ މަތިން ޒާރާ ގޮވައިގެން އިންޑިއާއަށް ދިޔަ ނަމަވެސް މިހާރު އެ ދަރިފުޅުގެ އުޅުމަށް އައިސްފައިވާ ބަދަލުތަކުގެ ސަބަބުން މީހުންނަށް ވަރަށް ބޮޑަށް އަނިޔާ ކުރާތީ އެކަކަށް ގޮވައިގެން ގޮސް ނޫޅެވޭ ކަމަށް މާމާ ކިޔައިދިނެވެ.
އެންމެ ފަހުން އިންޑިއާއަށް ދިޔަ ފަހަރު ދިން ބޭސްތައް ދޭން ފެށި ފަހުން ދަރިފުޅުގެ އުޅުމަށް ބޮޑު ބަދަލުތަކެއް އަންނަކަން އެންމެނަށް ފާހަގަވި އެވެ. މާ ބޮޑަށް ރުޅި ގަދަ ވުމާއި އެހެން މީހުންނަށް އަނިޔާ ކުރުމާއި އަމިއްލަ އަނިޔާ ދިނުންފަދަ ކަންކަން ކުރުން އިތުރުވި ކަމަށް މަންމަ ބުންޏެވެ.
"އެހެންވެ ދިޔައީ މާލެއަށް ގޮވައިގެން ޑޮކްޓަރަށް ދައްކަން. އިންޑިއާއިން ދީފައި ހުރި ބޭސްތައް ދެއްކީ ހަމަ އިންޑިއާ ޑޮކްޓަރަކަށް. ބުނީ އެ ބޭސް ހުއްޓާލަން. ބުނީ އެއީ ވަރަށް ސަކަރާތް ބޭހެކޭ. ޖަނަވާރުން ރުޅިގަދަކުރަން ދޭ ބޭހެކޭ ޒާރާ އަށް ދީފައި އެހުރީ. ބޮޑު ފޮށިގަނޑެއްގެ ބޭސް ހުރި، ދެ ފުޅި ދެވިފައި ހުރީ ހުއްޓާލަން ބުނިއިރު،" މަންމަ ބުންޏެވެ.
ކުޑަ ދަރިފުޅު ޒާނިއާ ވެސް ވިހެއީ މަނަދޫ ހޮސްޕިޓަލަށެވެ. އެ ދަރިފުޅު ވެސް ރީނދޫ ވުމުން މާލެ ގެންދަން ޖެހުނެވެ.
"ކުޑަ ދަރިފުޅު ވެސް ވާހަކަ ނުދައްކާތީ ޑޮކްޓަރަށް ދެއްކީ. ދެއްކީމަ އެނގުނީ އޯޓިޒަމް ކުއްޖެއްކަން ...އަދިވެސް ވާހަކަ ނުދައްކާ. ރޯގަޑީގަ މަންމަ ކިޔާނެ، ނޫނީ ބައްޕަ ކިޔާނެ،" މަންމަ ބުންޏެވެ.
"ކާ އެއްޗެއް ބޭނުން ވެއްޖެއްޔާ އަމިއްލައަށް ގޮސް ކާނެ. ފެން ވެސް ބޯނީ އަމިއްލައަށް، ވާހަކަ ނުދެއްކޭތީ ނުއެއް ބުނެވޭނު. ކުޑައިރު ވެސް ހަމަ އެގޮތަށް. ޑޮކްޓަރުން ވަރަށް ގިނައިން ބުނޭ އެ ދަރިފުޅު ރަނގަޅު ކުރެވޭނޭ ތެރަޕީ ދީގެން،" މާމަ ބުންޏެވެ.
އެއްޗެއް ބޭނުން ވިޔަސް ބުނެދޭކަށް ނޭނގެ އެވެ. އަމިއްލައަށް އެ ކަމެއް ކުރަނީ އެވެ.
ކޮޓަރީގައި ދޭތެރަކުން އަލިފާނުގެ ހާދިސާއެއް ހިނގައި މުޅިތަން އަނދައި ހުލުވި އެވެ. މިއީ ވެސް ކުދިން އެހެން އުޅުމުގެ ތެރޭގައި ދިމާވި ކަމެއް ކަމަށް ވުން ގާތް ކަމަށް ގަބޫލުކުރެވެ އެވެ. ނަސީބަކުން ދެ ކުދިންނަށް އަދި މީހަކަށް އެއްވެސް ގެއްލުމެއް ނުލިބި ސަލާމަތްވީ އެވެ.
އެކަމަކު ކުދިންނަށް އުޅެވޭވަރަށް ކޮޓަރި އަލުން ހަދަން ބޮޑު ހޭދައެއް ހިނގި އެވެ.
ހަގު ދަރިފުޅު މަންމައާ އެކު. -- ފޮޓޯ: ފަޔާޒް މޫސާ | މިހާރު
ފިޒިއޯ ތެރަޕީ އާއި ސްޕީޗް ތެރަޕީ ދެ ކުދިންނަށް ވެސް ބޭނުންވެ އެވެ. ދެ ކުދިންގެ މިޒާޖު ތަފާތު ވުމުން މާލެއަށް ނުވަތަ އިންޑިއާއަށް ދާއިރު ވެސް އެއްކޮށެއް ނުގެންދެވެ އެވެ. ދުވަސްކޮޅުކޮޅުން ދެ ކުދިން ވެސް ޑޮކްޓަރަށް ދައްކަން ޖެހޭ ނަމަވެސް އެ އާއިލާގައި އެހާ ތަނަވަސްކަންވެސް ނެތީ އެވެ.
"މާލެ ގޮސް ވެސް ތަނެއް ކުއްޔަށް ނުވަތަ މީހެއްގެ ކައިރީ ހުންނަން މި ޖެހެނީ. އެހާ ތަނަވަސް ކަމެއް ނެތް. މީހުން ކައިރީ ގޮސް ހުންނަން، ކުދިންގެ މިޒާޖު ހުންނަ ގޮތުން އެ މީހުން ވެސް ހިތްހަމަ ނުޖެހޭނެދޯ،" ކުދިންގެ މާމަ ބުންޏެވެ.
ސްކޫލަށް ގެންދިއުމުން ކުދިންނަށް އަނިޔާ ކުރާތީ ޓީޗަރަކު ގެ އަށް ކިޔަވައިދޭން އަންނަން ފެށި ނަމަވެސް އެ ޓީޗަރު ބަދަލުވުމުން ޒާރާ އެކަމާ ހިތްހަމަ ނުޖެހި ޓީޗަރަށް ވެސް އަނިޔާ ކުރަން ފެށި ކަމަށް މަންމަ ބުންޏެވެ.
ކޮންމެ މަންމައަކާއި ބައްޕައެއް ވެސް ދަރިންނަށް ރަނގަޅު ތައުލީމެއް ދީގެން ބަލައި ބޮޑުކުރަން ބޭނުންވާ ގޮތަށް ޒާރާ އާއި ޒާނިއާއަށް ވެސް އެ ފުރުސަތު ހޯދައިދޭން މަސައްކަތް ކުރެ އެވެ.
ދެ ކުދިންގެ ބައްޕަ ރިސޯޓުގައި ވަޒީފާ އަދާކޮށްގެން ލިބޭ މުސާރަ އިން ކުދިންގެ ހަރަދު ކިރިޔާ ދެކޮޅު ޖެހެނީ އެވެ. އަބަދު ނެޕީ ޖަހަން ޖެހޭތީ ކޮންމެ މަހަކު އެކަމަށް ވެސް ބޮޑު ހޭދައެއް ދެ އެވެ. އެއްވެސް ކަމަކު ބުނެދޭކަށެއް ނޭނގެ އެވެ. އިޝާރާތުން ވެސް ބުނާކަށް ނޭނގެ އެވެ.
"ދެ ކުދިންނަށް ވެސް ފަރުވާ ދޭން ފަށަން ބުނެފައި އިނީ ދެ އަހަރުވީ ތަނާ. އެކަމަކު ދެ ކުދިން ގޮވައިގެން ނުދެވޭ. އެއް ކުއްޖަކު އަބަދު ވެސް ގެންދެވެނީ. އެއްޗެއް އެއްވީމަ ދަނީ ގޮސް އެއް ކުއްޖަކު ދައްކާފައި އަންނަނީ. އަނެއްކާ ލާރިކޮޅެއް އެއްވީމަ އަނެއް ކުއްޖާ ގޮވައިގެން ދަނީ،" މާމަ ބުންޏެވެ.
"ހާއްސަ އެހީއަށް ބޭނުންވާ މީހުންގެ ފްލެޓްތަކަށް އިއުލާން ކުރިކަން ނޭނގުނީ. މިދިޔަ ސަރުކާރުގައި ވެސް އެދުނިން ފްލެޓެއް ބޭނުންވާ ވާހަކަ. މި ކުދިން ގޮވައިގެން މާލޭގައި ތިބެގެން ތެރަޕީތައް ދީގެން ރަނގަޅުވާނޭ ޑޮކްޓަރުން ބުނަނީ. މާލޭގައި ތިބެން ބޭނުން ވިޔަސް ދައްތަމެންނަށް އެވަރުގެ ތަނަވަސްކަމެއް ނެތިއްޔާ ނުތިބެވޭނު."
ދެ ކުދިން ބަލަމުން އަންނަ އުނދަގޫ ހާލަތު މާމަ ކިޔައިދެނީ. -- ފޮޓޯ: ފަޔާޒް މޫސާ | މިހާރު
އޯޓިޒަމް ހުންނަ ކުދިންތަކެއް ގޮވައިގެން ރަށުގައި ވެސް އުޅުން ދަތި އުނދަގޫ ކަމަކަށްވެފައިވާއިރު މާމަ އާއި މަންމަގެ ދުނިޔެ އެނބުރެނީ އެ ދެ ކުދިން ވަށައިގެންނެވެ. މީހަކާ ބައްދަލުކުރަން ގެއިން ނުނުކުމެވެ އެވެ. އެ ގޭގެ ހާލަތު ހުރި ގޮތުން މީހުންނަށް އެހާ ގިނައިން ވަދެ އުޅުން ވެސް ފަސޭހައެއް ނޫނެވެ.
ޒާރާގެ މިޒާޖު ހުންނަ ގޮތުން ބައެއް ފަހަރަށް އަނިޔާވެ އެވެ. ޖިސްމާނީ ގޮތުން ބޮޑެތި އަނިޔާތަކެއް އޭނާގެ ހަށިގަނޑަށް ވަނީ ލިބިފަ އެވެ.
"ޒާރާ ރުޅި ގަދަ ވެގެން ވިކާ ހަދާނެ، ރުޅި އައިއްސިއްޔާ ހެދުން، އެއްޗެހި ބާލާނެ. ވަކި އަޅާނެ ވަރަށް. ދަތް އަޅާނެ. ލޭ ގަނޑުވެފައި ހުންނަނެ މަންމަ ގައިގަ،" މާމަ ބުންޏެވެ.
"ވަރަށް ކެތްތެރިވާނެ މަންމަ. ރުޅި ނާންނަނެ އެ ކުދިން ކޮންމެ ކަމެއް ކުރިޔަސް. ވަރަށް މަޑުމައިތިވާނެ."
އޯޓިޒަމްގެ އެ ދެ ކުދިން ގޮވައިގެން އުޅެވެނީ އެ މަންމަގެ ކެތްތެރިކަމާއި ހިތްވަރުގަދަ ކަމުންނެވެ. އާއްމު މީހެއްގެ އެންމެ ދުވަހަކާ އޭނާގެ އެއް ދުވަސް އެ ދެ ކުދިންނާ އެކު ހާސްބައި ތަފާތެވެ. ކިޔައިދޭން އުނދަގޫވެފައި އިނީ އެ އިހްސާސްތަކެވެ.
މަންމަ އަދިވެސް އުއްމީދު ގެއްލުވައެއް ނުލަ އެވެ. ފަރުވާދެވޭނެ ދުވަހެއް އަދި އަންނާނެ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
މަށެއްނޫން
21 March 2025
އާންމުކޮށް ހަމަ ޖެނެޓިކްސް ގެ ސަބަބުން ދިމާވާ ކަމެއް. ދެކުދިން އޯޓިސްޓިކްވީމަ ޤަބޫލުކުރެވެނީ އެހެންކަމަށް.ބައެއް ޑޮކްޓަރުން މިފަދަ މަޢުލޫމާތު ނުދޭތީ ވަރަށް ދެރަވޭ. ދިނަސް ބައެއް ބޭފުޅުން "ރަނގަޅު" ދަރިއެއް ހޯދަންވެގެން ދެވަނަ ދަރިއެއް ހޯދާ ވަރަށް ބޮޑު ރިސްކް އެއް ނަގާ. މިހުރިހާ ވާހަކައެއް މި ދެކުދިން ކުރިމަތީގަ ދެއްކީމާ ވަރަށް ދެރަވެއްޖެ. ވާހަކަ ނުދެއްކުނަސް އެމީހުންގެވެސް އިހުސާސްތަކެއް ހުންނާނެ. އުފަންވުމަކީ އެކުދިންގެ ކުށެއް ނޫން ދޯ.
ޙުނަފާ
21 March 2025
ވަރަށްވެސް ދެރަވެއްޖެ.. މާތްﷲ މި އާއިލާއަށް ކެތްތެރިކަން ދެއްވާ، ހެޔޮގޮތް މެދުވެރި ކުރައްވާ، އަދި އިތުރު ތަނަވަސްކަން މިންވަރު ކޮށްދެއްވާންދޭ.. އާމީން
މަހާ
20 March 2025
މައުލޫމާތު ނުބައި. ތީ އެސްޕާގަރ ސިންޑްރަމް އަދި ހައި ފަންކްޝަނިން އޯޓިޒަމްއެއް ނޫން. އޯޓިޒަމްގައި ހައި ފަންކްޝަނިންގެ މާނަ އަކީ އެކުއްޖަކަށް އުމުރާ އެއް ލެވެލް އަށް ގިނަ ކަން ކަން މާ ބޮޑު އެހީއަކާ ނުލައި ކުރެވޭނެ އޭ.
އިނާޔަތް
19 March 2025
އިނާޔަތްދިނުންހައްގީ މިފަދަ ނިކަމެތީންނަށް. ނޮވެންބަރ 3 ގެށަހީދުވި ސިފައިންގެ އާއިލާއަކަށް ވުރެ ހާލުޖެހިފަތިބި މި ގައުމުގެ ނިކަމެތީންނަށް އިނާޔަތް ހައްގީ. ސަހަލު އެއްކަމެއްވެސް ކުރަންއެގޭ ބަޔަކު މިވެރިކަމުގަ ހަމަނެތީ.
ޞިބި
19 March 2025
ވަރަށް ދެރަ. މިފަދަ ކަންކަމަށް މައިންނާއި އާއިލާ ހޭލުންތެރިކުރުމަށް ކަންކަން ކުރުން ސިއްހީ މަރުކަޒުގެ މެންޑޭޓުގަ ނޯވޭބާ؟ ނެތްނަމަ ހިމަނަން ކައުންސިލުންވެސް މަޖިލީހާ ސަރުކާރަށް ޕްރެޝަރ ކުރަންވީނުތޯ؟ މިސާލަކަށް، ފޯނު ދިނުމުގެ ގެއްލުން، ވަގުތީ ގޮތުން އެކުދިން މަޑުވިޔަސް ދިގު މުއްދަތަށް ސިކުނޑީގެ ހެދިބޮޑުވުމަށް ކުރާނެ ގެއްލުން. ހުރިހާ ކަމެއް އަޅެ ފައިސާއާ ބާރަށް ނުކޮށް ހެޔޮކަމެއް ކޮށްލާނެ ސިޔާސީ މީހެއް މި ގައުމުގަ ނެތީތަ؟
މަބުނީ
20 March 2025
ސަރުކަރުން ސިޔާސީ މީހުންނަށް ކުރާ ބޭކާރު ޚަރަދުތަކާއި ބޭކާރު އެލެވެންސްތައް ދިނުން ހުއްޓާލާފަ، މިފަދަ ފަރާތްތަކަށް އެހީވުން މާ ހެޔޮވެފައި އައުލާކަން ބޮޑު..
މިސް
19 March 2025
މީހާދަހާ ވޭނެކޭ ހާދަ ހިތާމައެކޭ،މާތްކަލާކޯ.....އެންސްޕާއިން އަމިއްލައައް އިސްނަގައިގެންވިޔަސް އެހީވާންވީ މިކަހަލަ އާއިލާތަކައް..ދުނިޔޭގެ އެންމެ އަގުބޮޑު ހޮލިޑޭ ޑެސްޓިނޭށަނައް ނިސްބަތްވާ މީހެއްގެ ހައިސިއްޔަތުން ވަރައް އަންތަރީސްވެއްޖެއެވެ.
ޢަޖައިބު1
19 March 2025
މި ކުދިންނަށް ބޭނުމީ ހަމަ ބިހޭވިއަރަލް ތެރަޕީ. މި ގައުމުގައި އުޅޭ މުއްސަނދި މީހުން ރަނގަޅު ދޯ މި އާޢިލާއަށް އެހީތެރިވާން. ނޫނީ ސަރުކާރުން ރަނގަޅު ދޯ ރަށުގައި މިކަހަލަ ހިދުމަތް ދެވޭ ވަރު ކޮށްދޭން. ޥަރަށް ދެރަވެއްޖެ ތި އުޅޭ ހާލު ކިޔާފައި. މާތްﷲ މި އާއިލާއަށް ކެތްތެރިކަން ދެއްވާ، ތަނަވަސްކަން ދެއްވާންދޭ. އާމީން.
ބަކުރުު
19 March 2025
މިގައުމުގައި މުއްސަނދިން އެހީވަނީ ސަރުކާރަށް ރައްޔިތުންނަކަށްނޫން. އެންމެ މުއްސަނދި ކަމަށްކިޔާ އުއްޗު ކޮންމެރޯދަމަހަކު ކާއްޓާ ކަރަޔާ ރައްޔިތުންނަށް ބަހަޔޯ. އެކަމަކު މިރޯދަމަހު ހުބަހާ. އެއީ ސަރުކާރުން ބެންކަށް ވަކިއަދަދަކަށް ޑޮލަރުމާރުކުރަން ހަމަޖެއްސީމާ އެކަމާ ހިތްހަމަނުޖެހިގެން ކަމަށް މިބަލަނީ.
ޕްރެން
19 March 2025
މިކަހަލަ އެތައް ކަމެއް ރައްޔިތުންނެއް ހާލުގަ އުޅޭއިރު އަންނަ ސަރުކާރު ތަކުން ބޭކާރު ފައިދާއެއް ނުވާ ކޮންކްރީޓޫ ޕްރޮޖެކްޓުތައް ޖައްސާލެއް އަދިވެސް މާ ގިނަ. އެކަމަކ އެހެން ދޯ ވާނީ. ކަޓު ނެގޭނެ ކަންކަން ދޯ ކުރެވޭނީ.
އައިޝާ ފުޅު
19 March 2025
އަތޮޅު ހޮސްޕިޓަލް ތަކުން ތެރަޕީގެ ހިދުމަތް ލިބޭ ނަމަ މިފަދަ ޢައިލާ ތަކަށް ވެސް ފަސޭހަ ވެގެންދާނެ
ނާނީ12
19 March 2025
ވަރަށް ދެރަވެއްޖެ. އިދާރަކުރެއްވިއްޔާ ވަރަށް އަވަހަށް ހުރިހާ ކަމެއްވެސް ރަނގަޅުވާނެ