ވެރިކަމާ ހަވާލުވާން މި އަށް ވުރެ ކުޑަތަންކޮޅެއް ލަސްވި ނަމަވެސް މި ގައުމު ހަލާކުވީސް: ސަލީމް

ރައީސް ޑރ. މުހައްމަދު މުއިއްޒަށް ވެރިކަން ލިބިވަޑައިނުގަނެ ކުޑަތަންކޮޅެއް ލަސްވި ނަމަވެސް ގައުމު "ހަލާކުވެގެން ދިޔައީސް" ކަމަށް އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) މިރޭ ވިދާޅުވެއްޖެ އެވެ.

އޭނާ އެހެން ވިދާޅުވީ، ރައީސް މުއިއްޒު ބ. އަތޮޅުގެ 13 ރަށަކަށް މިއަދު ހެނދުނު ފެއްޓެވި ދަތުރުފުޅުގައި އޭދަފުއްޓަށް ވަޑައިގެން ބޭއްވެވި ޖަލްސާގަ އެވެ.

ސަލީމް ވިދާޅުވީ ރާއްޖޭގެ ހުރިހާ ދާއިރާއެއް ވެސް އޮތީ ވަރަށް ނާޒުކު ހާލަތުގައި ކަމަށާއި ހާއްސަކޮށް ރާއްޖޭގެ ދަރަނީގެ ހާލަތުގެ ވާހަކަތައް ރައްޔިތުންނަށް ދޭތެރެދޭތެރެއިން ހަނދާން ކޮށްދޭން ޖެހޭ ކަމަށެވެ.

އޭދަފުށީގައި މިރޭ ބޭއްވި ޖަލްސާ އަށް ރައީސް މުއިއްޒު ވަޑައިގަތުމުން މަރުހަބާ ދަންނަވަނީ.---ފޮޓޯ: ރައީސް އޮފީސް

"އެއީ އަޅުގަނޑުމެންނާ ހަވާލުވިއިރު، ރާއްޖޭގެ ދަރަނި އޮތީ ނުބައްދަލު ހިސާބަށް ގޮސް. ގައުމު އޮތީ ހަވާލުވިއިރު ވެސް ކުންފުނިތައް އޮތީ އެތައް ބިލިއަނަކުން ދަރާފައި. ދިވެހި ދައުލަތް އޮތީ އެތައް ބިލިއަނަކުން ދަރާފައި. މި ހާލަތުގައި އޮތް ގައުމެއްގައި އަޅުގަނޑުމެން މިހާރު މި އުޅެނީ،" ރައްޔިތުންގެ މަޖިލިހުގައި ވެސް އިގުތިސާދާ ބެހޭ ކޮމިޓީތަކުގައި އިސްވެ ހަރަކާތްތެރިވެވަޑައިގަންނަވާ ސަލީމް ވިދާޅުވި އެވެ.

"އަޅުގަނޑުމެންގެ އެންމެ މާތް މަގުސަދަކަށް ވާނީ ގައުމު ސަލާމަތް ކުރުން. އަޅުގަނޑުމެން މި އަށް ވުރެ ލަސްވިނަމަ [ވެރިކަމާ ހަވާލުވާން] މި ގައުމު ހަލާކުވީސް. ގައުމުގެ އިގްތިސާދީ ހާލަތެއް ނޫން، އިޖްތިމާއީ ހާލަތެއް ނޫން، ހުރިހާ ހާލަތެއް ވެސް އޮތީ އެ ހާލަތުގައި."

އޭގެ މިސާލެއްގެ ގޮތުން ސަލީމް ދެއްކެވީ އަންނަ އަހަރު އެއް ބިލިއަން ރުފިޔާގެ ދަރަނި ދައްކަން ޖެހިފައި ވުމެވެ. އެއީ މިހާރުގެ ޑޮލަރު ރޭޓުން ބަލާ ނަމަ 20 ބިލިއަން ރުފިޔާ ކަމަށް އޭނާ ވިދާޅުވި އެވެ.

"ދައުލަތުގެ 20 ބިލިއަން ރުފިޔާ ލޯނު ދައްކާފައި މުސާރަ އަށް 14 ބިލިއަން ހަރަދު ކުރީމާ އެ ދިޔައީ 34 ބިލިއަން ރުފިޔާ. ދައުލަތުގެ އާމްދަނީއަކީ ހަގީގަތުގައި ގާތްގަނޑަކަށް 34-35 ބިލިއަނެއްހާ ރުފިޔާ. އޭގެ މާނައަކީ ހަމައެކަނި ލޯނު ދައްކާށާއި މުވައްޒަފުންގެ މުސާރަ އަށް މި ދިޔައީ މުޅި ދައުލަތް ހުސްވެގެން،" ސަލީމް ވިދާޅުވި އެވެ.

"ދެން ތިޔަބޭފުޅުން ބައްލަވާ ކޮބައިތޯ އޮފީސްތައް ހިންގުން. ކޮބައިތޯ އެހެން ކަންކަން، އިޖުތިމާއީ ކަންކަމަށް ހަރަދު ކުރުން. ތަރައްގީގެ މަޝްރޫއުތަކަށް ކޮންތާކުންތޯ ހަރަދު ކުރާނީ؟ މި ހާލަތުގައި އޮތް ގައުމެއްގައި އަޅުގަނޑުމެން މަސައްކަތް ކުރަމުން މިހާރު މިދަނީ."

އޭދަފުށީގައި މިރޭ ބޭއްވި ޖަލްސާ އަށް ރައީސް މުއިއްޒު ބައިވެރިވެވަޑައިގަންނަވަނީ.---ފޮޓޯ: ރައީސް އޮފީސް

މަޝްރޫއުތައް ކުރިއަށް ދާން ޖެހޭ އެންމެ ބާރު ސްޕީޑުގައި ކުރިއަށް ނުދާކަން ގަބޫލު ކުރައްވާ ކަމަށާއި އެކަމަށް ހުރަސް ތަކެއް ހުރި ކަމަށް ސަލީމް ވިދާޅުވި އެވެ. ނަމަވެސް ރައީސް މުއިއްޒު ގެންދަވަނީ އެއްވެސް ޖެހިލުމެއް ނެތި ހުރިހާ މަސައްކަތެއް ކުރައްވަމުން ކަމަށް ސަލީމް ވިދާޅުވި އެވެ.

މިރޭގެ ޖަލްސާގައި ރައީސް ވިދާޅުވީ މި ސަރުކާރުން ހަވާލުވިއިރު އިގްތިސޯދު އޮތީ ވަރަށް ނާޒުކު ހާލަތުގައި ކަމަށެވެ. އޭރު ރައްޔިތުންގެ މަޖިލީހުގައި ތިއްބެވި އިދިކޮޅު މެމްބަރުން ބަޖެޓު ފާސްކޮށްދިނީ ވެސް މި ސަރުކާރުން ބޭނުންވި ކަންކަން ނުހިމަނައި ކަމަށް އެ މަނިކުފާނު ވިދާޅުވި އެވެ.