އޭއައި ޓެކްނޮލޮޖީ ވައިގައި ހިފާފައި ވަނިކޮށް ދިވެހިރާއްޖެއަށް އޭއައި ޑިގްރީއެއް!

މި މަހުގެ 15 ވަނަ ދުވަހު މިއާންޒް ކޮލެޖުގެ އަހަރީ ދުވަސް ފާހަގަ ކުރުމަށް ބޭއްވި ހާއްސަ ޖަލްސާގައި އެ ކޮލެޖުން ވަނީ ރާއްޖޭގެ ފުރަތަމަ އާޓިފިޝަލް އިންޓެލިޖެންސް އެންޑް މެޝިން ލާނިންއަށް ހާއްސަ ބެޗެލާސް ޑިގްރީއެއް ތައާރަފުކޮށްފަ އެވެ.

ދުނިޔޭގެ ހުރިހާ ތަނެއްގައި ވެސް އާންމު ދިރިއުޅުމާއި މަސައްކަތުގެ ބަޔަކަށް އާޓިފިޝަލް އިންޓެލިޖެންސް (އޭއައި) ވަމުން ދާއިރު، މިއީ ރާއްޖޭގައި ވެސް އެ ދާއިރާގެ މާހިރުން ތަމްރީން ކުރުމަށް ލިބޭ ފުރުސަތެކެވެ. ތިން އަހަރުގެ ބީއެސްސީ (ބެޗެލާ އޮފް ސައިންސް) ގެ އެ ޕްރޮގްރާމުގައި ކޮމްޕިއުޓާ ސައިންސްގެ އަސާސީ މައުލޫމާތާއި ޒަމާނީ އޭއައި މައުލޫތަކާއި ކެޕްސްޓޯން ޕްރޮޖެކްޓެއް ހިމެނެއެވެ. މިއާންޒް ކޮލެޖުން ވަނީ މިކޯހުގައި ކްލާސްރޫމްގައި އަދި އޮންލައިންކޮށް ވެސް ކިޔެވުމުގެ ފުރުސަތު ވެސް ހުޅުވާލައިފަ އެވެ.

ފާއިތުވި ދެއަހަރު ތެރޭގައި އޭއައި ބޭނުންކުރާ މިންވަރު ވަނީ އިންތިހާއަށް އިތުރުވެފަ އެވެ. މެކިންސީ ގްލޯބަލް ސާވޭއިން ދައްކާގޮތުން 2024 ވަނަ އަހަރު ނިމުނުއިރު 78 ޕަސެންޓު ކުންފުނިތަކުން ޖެނެރަޓިވް އޭއައި ވަނީ ބޭނުންކޮށްފަ އެވެ. މިއީ އެ އަހަރުގެ ކުރީކޮޅާއި ބަލާއިރު 65 ޕަސެންޓުގެ އިތުރުވުމެކެވެ. ވިޔަފާރިތަކުން އޭއައި ބޭނުން ކުރަމުންދާ ބައެއް ދާއިރާތަކުގެ ތެރޭގައި މާކެޓިން އާއި ސޮފްޓްވެއާ އިންޖިނިއަރިން އާއި އޮޕަރޭޝަންސް އަދި ޕްރޮޑަކްޓް ޑިވެލޮޕްމެންޓް ވެސް ހިމެނެ އެވެ.

އޭއައިގެ ސަބަބުން ވަޒީފާގެ ބާޒާރަށް ނުރައްކަލެއް؟

ހަލުވި ދުވެއްޔެއްގައި އޭއައި ތައާރަފްވެ ތަރައްގީވަމުން ދާއިރު، އޭއައިގެ ސަބަބުން ވަޒީފާތަކާއި އުފެއްދުންތެރިކަމަށް ހުރި ނުރައްކަލުގެ ބަހުސްތަކެއް ދަނީ ކުރެވެމުންނެވެ. އޯއީސީޑީގެ ދިރާސާއަކުން ދައްކާގޮތުން ގާތްގަނޑަކަށް 25 ޕަސެންޓު މަސައްކަތްތެރިން ކުރާ މަސައްކަތްތަކުގެ ތެރެއިން މަދުވެގެން ފަސްބައި ކުޅަ އެއްބައި މަސައްކަތްތައް އޭއައި ބޭނުންކޮށްގެން އަވަސް ކުރެވޭނެ އެވެ. މީގެ އަސަރު އެކި ސިނާޔަތްތަކަށް އަދި އެކި ވަޒީފާތަކަށް އެކި މިންވަރަށް ކުރާނެ އެވެ.

ކޮންމެ ގޮތެއްވިޔަސް، މިއީ މިހާރު ހުއްޓުވޭނޭ އެއްޗެއް ނޫނެވެ. އާދައިގެ މަސައްކަތްތަކުގައި އުޅޭ މުވައްޒަފުންގެ ވަޒީފާތައް އޭއައި އިން ކުރެވެން ހުރިނަމަ، އޭއައި ޕްރޮގްރާމްތައް ލިޔެ، ތައްޔާރުކޮށް އަދި ބަލަހައްޓާނެ މީހުންނަށް ވަޒީފާތަކެއް އުފެދިގެންދާނެ އެވެ. އޭއައި ދާއިރާގެ އިންސާނީ ވަސީލަތް ބިނާކުރުން މުހިންމު ވަނީ އެހެންވެ، އެވެ.

މިއާންޒް ކޮލެޖުގެ އާޓިފިޝަލް އިންޓެލިޖެންސް އެންޑް މެޝިން ލާނިން ބީއެސްސީ ޑިގްރީގައި ހިމެނެނީ ހަ ސެމެސްޓަރުގެ މައްޗަށް ބެހިފައިވާ 360 ކްރެޑިޓެވެ. އެ ކޯހުގައި ފުރަތަމަ ފަށާނީ ޕްރޮގްރާމިން (ޕައިތަން އަދި ސީ++) އާއި ޑޭޓާ ސްޓްރަކްޗާސް އާއި ޑޭޓާބޭސްތައް އާއި ޑިސްކްރީޓް މެތެމެޓިކްސް އާއި ކެލްކިއުލަސް އަދި ސްޓެޓިސްޓިކްސްއިންނެވެ. އެއަށްފަހު ކުރިއަށްދާނީ މެޝިން ލާނިން އާއި ޑީޕް ލާނިން އާއި ކޮމްޕިއުޓާ ވިޝަން އާއި ނެޗުރަލް ލޭންގުއެޖް ޕްރޮސެސިން އާއި ބިގް ޑޭޓާ އެނަލިޓިކްސް އަދި އެޑްވާންސްޑް އެލްގޮރިދަމްސް އެވެ. އަދި މި ޕްރޮގުރާމް ނިންމާލާނީ 30 ކްރެޑިޓްގެ ކެޕްސްޓޯން ޕްރޮޖެކްޓަކުންނެވެ. ރިސާޗް މެތަޑްސް އަދި "ވޯކް ސްކިލްސް އެންޑް އެމްޕްލޯޔަބިލިޓީ" މޮޑިއުލްތަކުގެ މަގްސަދަކީ ގްރެޖުއޭޓުން އަމަލީ މަސައްކަތްތަކަށް ތައްޔާރު ކުރުމެވެ. މި ކޯސް ފަރުމާކުރެވިފައިވަނީ ކްލާސްރޫމްގައި ކިޔަވައިދިނުމާއި އީ-ލާރނިން އެއްކޮށްލައިގެންނެވެ. އެއީ އަތޮޅުތަކުގައި ދިރިއުޅޭ ދަރިވަރުންނަށް ވެސް މި ކޯހުގައި ބައިވެރިވުމުގެ ފުރުސަތު ފަހިކޮށްދިނުމަށެވެ.

އެ ޕްރޮގްރާމުގެ ސަބަބުން ރާއްޖޭގައި އޭއައި ދާއިރާއަށް ބޭނުންވާ ހުނަރުވެރި މީހުން އުފެއްދުމަށް މަގުފަހިވެގެންދާނެ އެވެ. މިއީ ރާއްޖޭގެ ޓެކްނޮލޮޖީ ދާއިރާއަށް ލިބޭ ވަރަށް މުހިންމު ކުރިއެރުމެކެވެ. މި ކޯހުން ގްރެޖުއޭޓްވާ ދަރިވަރުންނަށް ރާއްޖޭގެ އެކި ދާއިރާތަކުގައި އޭއައި ޓެކްނޮލޮޖީ ތައާރަފުކޮށް، ތަރައްގީ ކުރުމުގައި މުހިންމު ދައުރެއް އަދާކުރެވޭނެ އެވެ.

އެ ކޯހާއި ބެހޭގޮތުން ވާހަކަ ދައްކަވަމުން މިއާންޒް ކޮލެޖުގެ ވައިސް ރެކްޓާ ޑރ. ފާތުމަތު ޝަހީމާ ވަނީ އެ ކޯސް ތައާރަފް ކުރުމަށް މަސައްކަތް ކުރާތާ ދެ އަހަރު ވެފައިވާކަން ފާހަގަ ކުރައްވައިފަ އެވެ.

"މިކަމުގެ އަމާޒަކީ ދިވެހީންނަކީ ހަމައެކަނި އޭއައި ބޭނުންކުރާ ބަޔަކަށް ނުވެ، އޭއައި އުފައްދާ ބަޔަކަށް ވުން. ބޮޑުތަކުރުފާނު ވިދާޅުވެފައިވާ ފަދައިން މީހުން މީހުންނަށް ވާނީ، މީހުން މީހުންނަށް ހެދީމަ." އޭނާ ވިދާޅުވި އެވެ.

އަޅުގަނޑުމެންގެ ރާއްޖެ ފަދަ ކުޑަ ސާވިސް އިކޮނޮމީއެއް އޮންނަ ގައުމެއްގައި އޭއައި ދާއިރާގެ ހުނަރުވެރިން ތަމްރީން ކުރުމުގެ ގާބިލްކަން ލިބުމުން ބޭރު ގައުމުތަކަށް ބަރޯސާވާ މިންވަރު ކުޑަވެ، ރާއްޖޭގެ އިދާރާތަކަށް ޒިންމާދާރު ގޮތެއްގައި އޭއައި ބޭނުންކުރުމަށް މަގުފަހިވެގެންދާނެ އެވެ. މިއީ އޭއައި ގަވާނަންސް އަދި ލިޓަރަސީ ބިނާކުރުމަށް ދުނިޔޭގެ ފެންވަރުގައި ކުރެވޭ މަސައްކަތްތަކާ އެއްގޮތްވާ ކަމެކެވެ. އޭއައި ކުރިއެރުމާއެކު ލިޔުމުގެ އެހީތެރިކަމާއި ތަރުޖަމާ ކުރުމާއި ފޮޓޯ އުފެއްދުން އަދި ސޮފްޓްވެއާ ކޯޕައިލެޓުން ފަދަ ކަންކަމުގައި އާންމުވަމުން ދާއިރު، ގިނަ ގައުމުތަކުގައި މިހާރު އުފެދޭ ސުވާލަކީ އޭއައި ކިޔަވައިދޭންވީތޯ ނުވަތަ ނޫންތޯއެއް ނޫނެވެ. އޭގެ ބަދަލުގައި އުފެދޭ ސުވާލަކީ އެންމެ ރަނގަޅަށް އޭއައި ކިޔަވައިދޭނީ ކިހިނެއްތޯ އެވެ.

އެޑިޓަރުގެ ނޯޓް: މިއީ މިއާންޒް ކޮލެޖުގެ އެޑްވަޓޯރިއަލް އާޓިކަލްއެކެވެ.