ދީމާގެ ރެކޯޑަށް ނިމުން ގެނެސް ރަފާ ގައުމީ ތަށި ކާމިޔާބު ކޮށްފި

ވިދިވިދިގެން ހަ ވަނަ ފަހަރަށް މުބާރާތް ކާމިޔާބު ކުރަން ނުކުތް، ފާތިމަތު ދީމާ އަލީ ބަލިކޮށް، ގައުމީ ޓީޓީ ޗެމްޕިއަންކަން އާއިޝަތު ރަފާ ނާޒިމު ހޯދައިފި އެވެ.

މީގެ ކުރިން ރަފާ، ވަނީ ގައުމީ ތަށި ދެ ފަހަރު ހޯދައިފަ އެވެ. ގައުމީ ތަށި މިލްކު ކުރަން ރާފާ 2019 ގައި ނުކުތުމުން ތައްޓަށް ހުރަސް އެޅީ ދީމާ އެވެ.

އޭގެ ފަހުން މިދިޔަ ފަސް ފަހަރު ވެސް ގައުމީ ތަށި ދީމާ ކާމިޔާބު ކުރީ ފައިނަލުގައި ރަފާ ބަލި ކުރުމަށް ފަހު އެވެ. ކޮވިޑް-19 ގެ ސަބަބުން 2020 ގައި މުބާރާތް ބާއްވާފައެއް ނުވެ އެވެ.

މިފަހަރުގެ ފައިނަލުގައި ރަފާ ކާމިޔާބު ހޯދީ ހަތަރު ގޭމުންނެވެ.

މިއި ވާދަވެރި މެޗެއްގައި ރަފާ އަތުން ދީމާ ބަލިވި ފުރަތަމަ ފަހަރެވެ.

ދީމާ ވަނީ 19 އަހަރުންދަށުގެ ތަށި އަދި އަންހެން ޑަބަލްސް ކެޓަގަރީގެ ތަށި ހޯދައިފަ އެވެ.

ނަވާރަ އަހަރުންދަށުގެ ތަށި އޭނާ ހޯދީ ފައިނަލުގައި މިޝްކާ މުހައްމަދު އިބްރާހިމް ބަލި ކުރުމަށްފަހު އެވެ. މިކްސްޑް ޑަބަލްސްގައި މިޝްކާ އާއި ދީމާގެ ޕެއާއިން ވަނީ ރަފާ އާއި މިންހާ މަހްޖޫބް ޝުޖާއުގެ ޕެއާ ބަލިކޮށްފަ އެވެ.

މިކްސް ޑަބަލްސްގައި ރަފާ ވަނީ މޫސާ މުންސިފް އަހްމަދާ، ޕެއާވެ ޗެމްޕިއަންކަން ހޯދައިފަ އެވެ. ފައިނަލުގައި އެ ދެ ކުޅުންތެރިންނާ ދެކޮޅަށް ނުކުތީ ދީމާ އާއި މުހައްމަދު ޝައްފާން އިސްމާއީލްގެ ޕެއާ އެވެ.