ބީއެމްއެލްގެ ހެޑް އޮފީސް: މިދިޔަ ކުއާޓަރުގައި ވެސް އެ ބޭންކަށް ރަނގަޅު ފައިދާއެއް ލިބުނު.
24 ޖުލައި 2017 - 11:16
8 comments
ބޭންކް އޮފް މޯލްޑިވްސް (ބީއެމްއެލް) އަށް މި އަހަރުގެ ދެވަނަ ކުއާޓަރު ނިމުނުއިރު ސާފު ފައިދާގެ ގޮތުގައި 183.4 މިލިއަން ރުފިޔާ ލިބިއްޖެ އެވެ.
ރާއްޖޭގެ އެންމެ ބޮޑު ބޭންކުން މިއަދު އާއްމުކުރި މިދިޔަ ކުއާޓަރުގެ މާލީ ހިސާބުތައް ދައްކާ ގޮތުން އެ ބޭންކަށް އާމްދަނީގެ ގޮތުގައި 561.4 މިލިއަން ރުފިޔާ ލިބިފައިވެ އެވެ. އެގޮތުން އިންޓަރެސްޓާއި އެފަދަ އެހެން އާމްދަނީގެ ގޮތުގައި އެ ބޭންކަށް 358.9 މިލިއަން ރުފިޔާ ލިބިފައިވާއިރު ފީތަކާއި އެހެނިހެން ކޮމިޝަނުން އާމްދަނީގެ ގޮތުގައި 174.3 މިލިއަން ރުފިޔާ ލިބިފައިވާ ކަމަށް އެ ހިސާބުތަކުން ދައްކަ އެވެ.
ބީއެމްއެލްއިން އާއްމުކުރި ހިސާބުތައް ދައްކާ ގޮތުން ހިންގުމުގެ ފައިދާގެ ގޮތުގައި އެ ބޭންކަށް މިދިޔަ ކުއާޓަރުގައި 483.7 މިލިއަން ރުފިޔާ ލިބިފައިވެ އެވެ. އަދި ހިންގުމުގެ ހަރަދުގެ ގޮތުގައި 114.5 މިލިއަން ރުފިޔާ ހޭދަކޮށްފައިވާ ކަމަށް ވެސް އެ ހިސާބުތަކުން ދައްކަ އެވެ. އޭގެ އިތުރުން ދޫކޮށްފައިވާ ލޯނުތަކުގެ ތެރެއިން އަނބުރާ ނުލިބޭނެ ކަމަށް ބަލައި 123.1 މިލިއަން ރުފިޔާ އުނިކޮށްފައިވެ އެވެ.
އެ ބޭންކުގެ މިދިޔަ ކުއާޓަރުގެ ހިސާބުތައް ދައްކާ ގޮތުން ހިއްސާއަކަށް 136ރ. ފައިދާގެ ގޮތުގައި ޖެހިފައިވެ އެވެ.
އެ ބޭންކުން ނެރުނު ނޫސްބަޔާނެއްގައި ބުނެފައި ވަނީ ކުރިން ލިބޭނެ ކަމަށް ލަފާކުރި މާލީ ނަތީޖާ އަށް ވުރެ ރަނގަޅު މާލީ ނަތީޖާއެއް މި އަހަރުގެ ދެވަނަ ކުއާޓަރުގެ އިތުރުން އަހަރުގެ މިހާތަަނަށް ވެސް ހޯދާފައިވާ ކަމަށެވެ.
ބީއެމްއެލް އިން ބުނީ ހިންގުމަށް ބޮޑު ހަރަދެއް ކުރަމުން އަދި އިންވެސްޓްމަންޓްތައް ކުރިޔަށް ގެންދަމުން ވެސް އެ ބޭންކުން މިދިޔަ ކުއާޓަރުގައި ވިޔަފާރީގެ މައިގަނޑު ހުރިހާ ދާއިރާއަކުން ވެސް ހަރުދަނާ ކުރިއެރުންތަކެއް ހޯދާފައިވާ ކަމަށެވެ. އަދި ލޯނު ދޫކުރި ނިސްބަތް ހަރުދަނާ މިންވަރެއްގައި ދެމެހެއްޓެމުންދާއިރު، ބޭންކުގެ ރައުސުލްމާލާއި ލިކުއިޑިޓީ ރޭޝިއޯ ވަނީ ރަނގަޅު މިންވަރެއްގައި ހިފެހެއްޓިފައިވާ ކަމަށެވެ.
"މިދިޔަ އަހަރުގެ ރެކޯޑް ފައިދާ އަކަށް ފަހު ބީއެމްއެލްއިން ފަށާފައިވާ ފުޅާ އިންވެސްޓްމަންޓް ޕްރޮގްރާމާއެކު ހިންގުމުގެ ހަރަދު އިތުރުވެފައިވުމާއި ފައިދާގެ ރޭޓްތައް ކުޑަކޮށްފައިވާތީވެ، 2017 ވަނަ އަހަރު ފައިދާ އަށް އަސަރުކޮށްފާނެ ކަމަށް ބީއެމްއެލްއިން ވަނީ ލަފާކޮށްފައި. މިއަދު ހާމަކުރި ނަތީޖާތައް ދައްކާ ގޮތުން މި އަހަރުގެ ފުރަތަމަ ހަ މަސްދުވަހުގެ ޓެކްސް އަށް ނުކަނޑައި ފައިދާގެ ގޮތުގައި ބީއެމްއެލް އަށް 592 މިލިއަން ރުފިޔާ ވަނީ ލިބިފައި،" އެ ބޭންކުން ބުންޏެވެ.
ބީއެމްއެލް އިން ބުނީ މިދިޔަ ކުއާޓަރުގައި ލިބުނު ފައިދާއަކީ މިދިޔަ އަހަރުގެ ފުރަތަމަ ހަ މަސްދުވަހާ އަޅާބަލާއިރު 17 ޕަސެންޓްގެ ކުރިއެރުމެއް ކަމަށެވެ. އަދި އެއީ ލަފާކުރި މިންވަރަށްވުރެ މަތީ އަދަދެއް ކަމަށް ވެސް އެ ބޭންކުން ބުންޏެވެ.
ދެވަނަ ކުއާޓަރުގައި ލިބުނު ނަތީޖާއާ ބެހޭ ގޮތުން އެ ބޭންކުގެ ސީއީއޯ އެންޑްރޫ ހީލީ ވިދާޅުވީ މި އަހަރުގެ ފުރަތަމަ ހަ މަސްދުވަހުގެ ތެރޭގައި ލިބުނު ރަނގަޅު ނަތީޖާއާ މެދު ވަރަށް ހިތްހަމަޖެހިވަޑައިގަންނަވާ ކަމަށެވެ. އަދި ކުރިން ލަފާކުރި މިންވަރަށްވުރެ ރަނގަޅު ނަތީޖާއެއް ހޯދިފައި ވަނީ ބޭންކްގެ ޕްރޮޑަކްޓްތަކަށް އަދި ހިދުމަތްތަކަށް ކަސްޓަމަރުންގެ ފަރާތުން ލިބެމުން އަންނަ ބޮޑު ތަރުހީބުގެ ސަބަބުން ކަމަށް ވެސް އޭނާ ވިދާޅުވެފައިވެ އެވެ.
"ވަރަށް ބުރަ ދުވަސްވަރެއް ނަމަވެސް އަޅުގަނޑުމެންގެ މުވައްޒަފުން ދަނީ ހީވާގިކަމުގެ ލާމަސީލު ނަމޫނާއެއް ދައްކަމުން. ހާއްސަކޮށް މުޖުތަމަޢުތަކާ ބޭންކާ ދެމެދު އޮތް ގުޅުން އިތުރަށް ބަދަހި ކުރުމަށް ހިންގުނު 'އަހަރެންގެ ބޭންކް' ކޮމިއުނިޓީ ކެމްޕޭންގެ ތެރެއިން ފެނުނު ގިނަ އަދަދެއްގެ އިވެންޓްތަކާއި ހަރަކާތްތައް ފާހަގަކޮށްލެވޭ. މި ކާމިޔާބީ ދެމެހެއްޓުމަށްޓަކައި މި އަހަރުގެ ބާކީ އޮތް ދުވަސްތަކުގައި ވެސް އަޅުގަނޑުމެން ބުރަކޮށް މަސައްކަތްކުރަމުން ދާނަން،" އެންޑްރޫ ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ތުއްތު
25 July 2017
ބޭންކުން ފައިނޭންޝަލް އިންކްލޫޝަންއަށް ޓާގެޓުކޮށްގެން، ކުރާ މަސައްކަތަށް ވަރަށް ތާއީދު.
ހާމަ333
24 July 2017
ބީއެމްއެލް ބިލިއަނުން ފައިދާވާއިރު އެކަށީގެންވާވަރަށް ރައްޔިތުނަށް އޭގެ ފައިދާނުކުރާކަމީ ހިތާމަކުރާކަމެއް...އާންމު ބޭނުންތަކުގައި ނަގާ ކުދިލޯނުތަކުގެ އިންޓްރަސްޓް ރޭޓް ދަށްކޮށްދިނުމަށް ބޭންކުގެ ފަރާތުން އެދެން
ސަލާމް
24 July 2017
ބެންކުން ދެމުންދާ ޚިދުމަތްތަކާ މެދު ހިތްހަމަޖެހޭ. ހާއްސަކޮށް ރަށްރަށަށް އެހެން ބެންކުތަކުން ހިދުމަތް ނެދޭއިރު ބީއެމްއެލް އިން ޚިދުމަތް ދޭތީ ވަރަށް ބޮޑަށް އުފާވޭ
ސައި
24 July 2017
މިއަހަރު ތެރޭ ބޭންކުން މަދަނީ ޖމިއްޔާތަކަށް ބޮޑު ހޭދައެއް ކޮށްފައިވޭ. މިފައިސާއިން ރައްޔިތުންނަށް ވީ ފައިދާތައް ބެލުން މުހިންމު
ހެނބަދޫގައި އަލީ މައުރޫފް އެޅި އިންޖީނުގޭން
24 July 2017
ތިޔަ ކަމުން ކެނދިކުޅުދޫ ދާއިރާގެ ރައްޔިތުންނަށް އޮތީ ކޮން ފައި ދާއެއް. މި ހާރުވެސް ބެންކުގެ ހިދުމަތް އަނެއް 3 ދާއިރާއަށް ލިބޭއިރު އަޅުގަނޑު ލައްވާ ނަމޫނާ ދާއިރާއޭ ކިޔައިގެން ކެންޕޭނުކޮށް ވީ އެއްކަމެއްވެސް ނެއް. ލަދުންބޯހަލާކު
1245
24 July 2017
ދިވެހި ރާއްޖޭގެ ވަރަށް ގިނަ ކުންފުނިތަކުން މާލެއަށް ޚިދުމަތްތައް ޖަމާކޮށްގެން އުޅެން ވިސްނިޔަސް އެކަމުން ފައިދާ ނުވާކަމުގެ ހެކި މި ފެންނަނީ. މިއަހަރު ބީއެމްއެލްއިން އެންމެ އިސްކަމެއް ދީގެން ކޮށްފައި އޮތް ކަމަކީ ރާއްޖެތެރެއަށް ޚިދުމަތްތައް ފުޅާކުރުން. މިކަމުގެ ފައިދާ އެބަ ފެނޭ. ރާއްޖޭގައި ވިޔަފާރިއަކުން ފައިދާ ހޯދަން ބޭނުންކަމުގައިވާނަމަ އަވަހަށް ރަށްރަށަށް ޚިދުމަތް ފުޅާކުރަންވީ. މަސްވެރިން ދަނޑުވެރިން އަދި އެހެނިހެން މަސައްކަތް ތެރިންނަށް ފަސޭހަކަމާއެކު ޑިޕޮސިޓް ކުރެވޭނެ ނިޒާމުތަކެއް ހޯދައިދިނުމަކީ ވަރަށް ވިސްނުންތެރި ނިންމުމެއް
ފައިހާ
24 July 2017
މިދިޔަ ފަސް އަހަރެއްހާ ދުވަހުގެ ތެރޭގައި ބީއެމްއެލްއިން ފަސްނުބަލާ ތިޔަ ދަނީ ކުރިޔަށް. ހިއްސާދާރުންނަށް އުފާވެރި ޚަބަރުތަކެއް.
އަލީޝާކިރު
24 July 2017
ހިއްސާދާރުންނަށް ކޮން އުފާވެރި ޚަބަރެއްތޯ. މިދިޔައަހަރުގެ ސާފު ފައިދާގެ ގޮތުގައި ވެސް ބިލިޔަނަރަކަށްވުރެ ގިނަ ރުފިޔާ ލިބުުނުވާހަކަ އަޑުއެހިން އެކަމަކުވެސް ފައިދާގެ ތެރެއިން ހިއްސާޔަކަށް ބަހަން ނިންމީ 20 ރުފިޔާ. އެހެންވީމަ މިދިޔަ ކުއާޓަރުގަ ހިއްސާޔަކަށް 136 ރުފިޔާ ޖެހުނަސް ހިއްސާދާރުންނަށް މާބޮޑު އެއްޗެއް ދޭނެކަމަކަށް ލަފައެއް ނުކުރެވޭ. މިދިޔަ ކުއާޓަރުގަ ހިންގުމުގެ ޚަރަދަށް 114.5 މިލިޔަން ރުފިޔާ ޚަރަދުކުރީމަ އަހަރު ނިމޭއިރު އެއްޗެއް އޮންނާނެބާއޭ ހިތައްއަރާ.