ގާތިލު ފަޅާއެރީ 27 އަހަރު ފަހުން

އެއީ މޭ 26، 1990 އެވެ. މާލީން ވޮރެން އިނީ ދަރިފުޅު ޖޯއީ އާއި ދަރިފުޅުގެ އެކުވެރި ކުދިބަޔަކާއެކު ހެނދުނުގެ ނާސްތާ ކުރާށެވެ. ކުއްލިއަކަށް އެމީހުންގެ ގޭގެ ކައިރިއަށް އައިސް މަޑުކޮށްލީ ކާރެކެވެ. އޭ ކާރުން ފޭބީ ކްލޯން އެއްގެ ގޮތެއް ހެދުން އަޅައިގެން ހުރި މީހެކެވެ. އޮރެންޖް ކުލައިގެ ވިގެއް އަޅާފައި ހުރި މީހާގެ މޫނުގައި ހުރީ ހުދުކުލަ ލައިފަ އެވެ. ނޭފަތުގައި ރަތްކުލަ އެވެ. އަތަށް ހުރީ އަންގި ލައްވައިފަ އެވެ. ފުއްޕާފައި އޮތް ދެ ހަމާއި މާބޮނޑިއެއް އަތުގައި އޮތެވެ.

އޭނާ ކާރުން ފައިބައިގެން ގޮސް މާލީންގެ ގޭގެ ދޮރުގެ ރަނގަބީލު ޖެހި އެވެ. މާލީން، 40، ދޮރު ހުޅުވާލުމުން އަތުގައި އޮތް މާބޮނޑި އޭނާއަށް ދިއްކޮށްލި އެވެ. ދުރުގައި އެ މަންޒަރު ބަލަން ހުރި ޖޯއީ އަށް މިއަދުވެސް އެ ހާދިސާ އިއްޔެ ވީ ކަމެއްހެން ހަނދާން އެބަހުއްޓެވެ. އެމީހާ މާބޮނޑި ދިއްކޮށްލުމުން އޭނަގެ މަންމަ މާބޮނޑީގައި ހިފަމުން "ހާދަ ރީއްޗޭ" ބުނެލި އަޑު އޭނާއަށް އިވުނެވެ.

ކުއްލިއަކަށް ދެން ފެނުނީ އެމީހާ މާލީންގެ މޫނާ ދިމާލަށް ފިސްތޯލައެއް ދިއްކޮށް މޫނުގައި ޖައްސާފައި ފިސްތޯލަ ޖެހިތަނެވެ. ޖޯއި އަށާއި އެކުވެރިންނަށް ހަރަކާތެއް ވެސް ކުރަން ނޭނގިފައި ތިއްބާ މާލީން ގަޔަށް ބަޑި ޖެހުމަށްފަހު މަޑުމަޑުން އެނބުރި ގޮސް ކާރަށް އަރައިގެން އެމީހާ ދިޔައީ އެވެ.

އެ ދުވަސްވަރު ނެރުނު ނޫހެއްގައި ޖަހާފައިވާ މާލީން މަރާލި ޚަބަރު

އެމެރިކާގެ ފްލޮރިޑާގެ ވެލިންޓަންގައި މި ހާދިސާ ހިނގިތާ ދެ ވަނަ ދުވަހު މާލީން މަރުވީ އެވެ. ފްލޮރިޑާ ފުލުހުންނަށް މި މަރުގެ ހަގީގަތް ހޯދަން ކުރި މަސައްކަތް ކާމިޔާބުނުވެ ތިރީހަކަށް އަހަރު ފާއިތުވި ފަހުން ފުލުހުންނަށް އަނެއްކާވެސް މި މަރުގެ ހަގީގަތް ހޯދަން ކުރިޔަށް ދާނެ މަގެއް ފެނުނެވެ.

މާލީންގެ މަރާ ގުޅިގެން އެންމެ ފުރަތަމަ ޝައްކު ކުރެވުނީ އޭނާގެ ފިރިމީހާ މައިކަލް ވޮރެންގެ މައްޗަށެވެ. އެ ދެ މީހުންގެ ކައިވެނީގައި މައްސަލަތައް ޖެހި ފިރިމީހާ ކައިރިން ވަރިވާން މާލީން އޭރުު ދިޔައީ ވިސްނަމުންނެވެ.

މި ދެމަފިރިންގެ އެއް މިލިއަން މިލްކިއްޔާތެއް ހުއްޓެވެ. އެ ހުރިހާ އެއްޗެއް ހުރީ މާލީންގެ ނަމުގަ އެވެ.

މާލީން މަރާލުމުގައި އޭނާގެ ފިރިމީހާގެ އަތެއް ނުވާ ކަމަށް މި މައްސަލަ ތަހުގީގުކުރި ފުލުހުންނަށް ގަބޫލުކުރެވުނެވެ. ނަމަވެސް މައިކަލް އާއި މި މަރާ ކޮންމެވެސް ގޮތަކުން ގުޅުމެއް ވާކަމަށް އެމީހުންނަށް ޝައްކެވެ.

މާލީން މަރާލިތާ ހަތަރު މަސް ފަހުން އަނެއްކާވެސް ފުލުހުންނަށް ވަރަށް ޚާއްސަ މައުލޫމާތެއް ލިބުނެވެ. އެއީ މާލީންގެ ފިރިމީހާ އާއި ޝީލާ ކީން ނަމަކަށް ކިޔާ އަންހެނަކާ ރައްޓެހިވެގެން އުޅޭ ކަމެވެ. އެހާ ހިސާބުން ތަހުގީގު ޓީމުގެ ސަމާލުކަން ޝީލާ އަށް ހުއްޓެވެ.

މާލީންގެ ގާތިލު ޝީލާ އަތުލައިގަނެވުނީ 27 އަހަރު ފަހުން

ޝީލާއާ އޭރު ވަކިން ދިރިއުޅެމުންދިޔަ އޭނާގެ ފިރިމީހާ ޔަގީންކޮށްދިން ގޮތުގައި ޝީލާ އާއި މައިކަލް އުޅެނީ ލޯބީގެ ގޮތުން އޭރުވެސް ގުޅިގެންނެވެ. އަދި ޝީލާގެ ގެއަށް މައިކަލް ވަރަށް ގިނައިން ގޮސް އުޅޭތަން ފެންނާތީ އެހިސާބުގަނޑުގައި ދިރިއުޅޭ އަވަށްޓެރިން ވެސް، ޝީލާ އުޅެނީ މައިކަލްއާ ކައިވެނި ކޮށްގެން ކަމަށް ހީކުރާ ކަމަށް އޭނާގެ ފިރިމީހާ ބުނެފައިވެ އެވެ.

ޝީލާ ދިރިއުޅޭ ހިސާބުގައި ހުންނަ ކޮސްޓިއުމް ފިހާރައެއްގައި ފުއްޕާހަން ވިއްކަން ހުރެ އެވެ. އަދި މާލީން މަރާލި މީހާ ހިފައިގެން ހުރި ކަހަލަ ފުއްޕާހަން ވެސް އެ ފިހާރައިގައި ވިއްކަން ހުއްޓެވެ. އަދި މާލީން މަރާލި ދުވަހުގެ ދެ ދުވަހެއް ކުރިން މީހަކު ކްލޯނެއްގެ ކޮސްޓިއުމެއް ގަތް ކަމަށް ވެސް އެ ފިހާރައިގައި ތިބި މުވައްޒަފުން ބުންޏެވެ.

އިތުރު ވަރަށް ވަރުގަދަ ހެކިތައް ވެސް ލިބުނަސް މިއީ ހާލަތަށް ރިއާޔަތްކުރާއިރު މި މީހުން ކުށްވެރިންގެ ގޮތުގައި ސާބިތު ކުރެވޭ ވަރުގެ ހެއްކަކަށް ނުފުދެ އެވެ.

ނަމަވެސް ޑީއެންއޭ ހެކިތަކުން މައިކަލް އާއި ޝީލާއާ ދެކޮޅަށް މާ ރަނގަޅު ކޯޓު ކޭހެއް ތައްޔާރު ކުރެވޭ ގޮތެއް ނުވި އެވެ.

މާލީން މަރާލިތާ 24 އަހަރު ފާއިތުވީއިރު ވެސް އެ ގަތުލުގެ ސިއްރު އޮތީ ނޭނގުމެއްގެ ތެރޭގަ އެވެ. އެއަށްފަހު 2014 ގައި އަނެއްކާވެސް މި ކޭސް އަލުން ބަލަން ފަށަން ފުލުހުން ނިންމި އެވެ. އަދި ޝީލާ އާއި މައިކަލްއާ ގުޅޭ ގޮތުން އެންމެ ކުރިންސުރެ ލިބުނު ހެކިތައް އަލުން ބަލުން ދިރާސާކޮށް ބަލަން ފެށި އެވެ. މި ބެލުމުން 1990 ގައި ކާރު ވިޔަފާރީގައި ކޮށްފައިވާ ވައްކަމާއި މަކަރުުގެ މައްސަލަތަކެއް ފަޅާ އަރައި މައިކަލް ޖަލަށް ލާފައިވާކަން އެނގުނެވެ. އަދި 1997 ގައި އޭނާ ޖަލުން ސަލާމަތްވުމަށް ފަހު ލޯބިވެރިޔާއާއެކު ފިލައިގެން ގޮސްފައިވާ ކަން ވެސް އެނގުނެވެ.

އަދި ފަހުން ބެލި ބެލުމުން 2002 ގައި ޝީލާ އޭނާގެ ފުރަތަމަ ފިރިމީހާ ކައިރިން ވަރިވެގެން މައިކަލްއާ ކައިވެނި ކޮށްފައިވާ ކަމާއި ދެ މީހުން އެކުގައި ޓެނެސީގައި ރެސްޓޯރެންޓް ވިޔަފާރިއެއް ކުރާކަން ވެސް އެނގުނެވެ.

މާލީން މަރާލިތާ 27 އަހަރު ފަހުން މިދިޔަ މަހުު ފްލޮރިޑާ ކޯޓުން ވަނީ ޝީލާ އަކީ މާލީންގެ ގާތިލުކަން ކަނޑައަޅައި އުމުރަށް ޖަލަށް ލާން ހުކުމް ކޮށްފަ އެވެ. މާލީން މަރާލީ ޝީލާ ކަން ސާބިތުކުރެވުމުގައި ޑީއެންއޭ އެނަލިސިސް އަށް އައިސްފައިވާ ކުރިއެރުން ވަރަށް މުހިއްމު ދައުރެއް ކުޅުނެވެ.

މިހާރު 54 އަހަރު ވެފައިވާ ޝީލާ ހޯދަން ފުލުހުން ކުރި މަސައްކަތުން މިދިޔަ އަންގާރަ ދުވަހު އޭނާ އަތުލައިގަނެވުނީ ވާޖީނިއާގެ ވޮޝިންޓަން ކައުންޓީގައި ދިރިއުޅެނިކޮށެވެ. އެއީ 27 އަހަރު ކުރިން މާލީން އަށް ހަމަލާ ދިން ގެއާ 800 މޭލު ދުރުގައި ހުރި ތަނެކެވެ.