ޔޫރަޕިއަން ޕާލަމެންޓަށް ހުށަހެޅި ގަރާރު އޮތީ ވަކިކޮޅަކަށް ބުރަވެފައި: ސަރުކާރު

ރާއްޖެއާ ދެކޮޅަށް ޔޫރަޕިއަން ޕާލަމެންޓަށް ހުށަހެޅި ގަރާރު އޮތީ ވަކިކޮޅަކަށް ބުރަވެފައި ކަމަށާއި އެ ގަރާރުގައި ހަގީގަތާ ޚިލާފު ވާހަކަތަކެއް އެބަހުރި ކަމަށް ދިވެހި ސަރުކާރުން މިރޭ ބުނެފި އެވެ.

ޔޫރަޕިއަން ޕާލަމެންޓުގެ މެމްބަރުން ރައީސް އަބްދުﷲ ޔާމީންގެ ސަރުކާރާ ދެކޮޅަށް ބޮޑެތި ފާޑުކިޔުންތަކެއް އަމާޒު ކުރައްވާފައިވަނިކޮށް، ފޮރިން މިނިސްޓްރީން ނެރުނު ބަޔާނެއްގައި ބުނީ ޔޫރަޕިއަން ޕާލަމަންޓަށް ހުށަހެޅި ގަރާރުގައި ހުރީ ސައްހަ މައުލޫމާތުތަކެއް ނޫން ކަމަށެވެ.

Raajje ah fiyavalhu elhun las vejje: EU Memberun

The most trusted news source in the Maldives

Mihaaru

ދިވެހި ސަރުކާރުން ބުނީ ގަރާރު ބަލައި ނުގަންނަ ކަމަށާއި އެއީ ރާއްޖޭގެ ގާނޫނުއަސާސީގެ ބާރު ކަނޑުވާލަން ހުށަހެޅި ގަރާރެއް ކަމަށެވެ.

ފޮރިން މިނިސްޓްރީން ބުނި ގޮތުގައި ރާއްޖޭގެ ހާލަތު ބެލުމަށް އަންނަ ޔޫރަޕިއަން ޔޫނިއަން (އީޔޫ) ގެ ވަފްދަށް ދިވެހި ސަރުކާރުން މަރުހަބާ ކިޔާނެ އެވެ. އީޔޫގެ ވަފުދުން ހޭދަކުރާ ދުވަސްތަކުގައި ރާއްޖޭގެ ހާލަތު ބެލުމުގެ ފުރުސަތު އޮންނާނެ ކަމަށް ބަޔާނުގައި ވެ އެވެ.

"ސަރުކާރުން އީޔޫއާއެކު ވަރަށް ކައިރިން މަސައްކަތް ކުރާނަން. ހާއްސަކޮށް ޔޫރަޕިއަން ކޮމިޝަނާއެކު،" ޔޫރަޕިއަން ޕާލަމެންޓްގެ މެމްބަރުން ދެއްކެވި ވާހަކަތައް ދޮގުކޮށް ފޮރިން މިނިސްޓްރީން ނެރުނު ބަޔާނުގައި ވެ އެވެ.

ދިވެހި ސަރުކާރުން ފާއިތުވި އަހަރުތަކުގައި އިގުތިސާދީ ގޮތުންނާއި އިޖުތިމާއީ ގޮތުން، އަދި ޑިމޮކްރެސީ އާއި ގާނޫނުގެ ވެރިކަން ނެގެހެއްޓުމުގައި ހޯދާފައިވާ ކާމިޔާބީތަކަށް ގަރާރުގައި ރިއާޔަތްކޮށްފައި ނުވާ ކަމަށް ވެސް ދިވެހި ސަރުކާރުން ބުންޏެވެ.

އަދި ބުނީ ރާއްޖޭގެ ޑިމޮކްރެސީ އިތުރަށް ހަރުދަނާކޮށް ވަރުގަދަ ކުރުމަށް، ބައިނަލްއަގުވާމީ ފަރާތްތަކާ ގުޅިގެން މަސައްކަތް ކުރަން ރާއްޖެ އިން ތައްޔާރަށް އޮތް ކަމަށެވެ. ޔޫރަޕިއަން އެކްސްޓާނަލް އެކްޝަން ސާވިސް (އީއީއޭއެސް) ގެ ވާހަކަތައް ބަލައިގަންނަ ކަމަށް ވެސް ސަރުކާރުން ބުންޏެވެ.

ފޮރިން މިނިސްޓްރީގެ ބަޔާން ނިންމާލަމުން ބުނެފައިވަނީ ސަރުކާރުން އިސްވެ އޮވެ، ބާއްވަން މަސައްކަތް ކުރަމުން އަންނަ ސިޔާސީ ޕާޓީތަކުގެ މަޝްވަރާތަކުގައި އިދިކޮޅު ލީޑަރުން ބައިވެރިވެވަޑައިގަތުމަށް ގޮވާލައިފަ އެވެ. މިނިސްޓްރީން ބުނި ގޮތުގައި މަޝްވަރާތައް ބާއްވަން ބޭނުންވަނީ ދިވެހިންނަށް ފާގަތި މުސްތަގުބަލެއް ހޯދައި ދިނުމަށެވެ. އެހެންވެ، މަޝްވަރާތައް ކުރިއަށް ގެންދިއުމަށް ސިޔާސީ ޕާޓީތަކުގެ ލީޑަރުންނަށް ވީހާވެސް އަވަހަށް ބާރު އަޅައި ދިނުމަށް މިނިސްޓްރީގެ ބަޔާނުގައި އީޔޫ އަށް ގޮވާލާފައިވެ އެވެ.

ފްރާންސްގެ ސްޓްރަސްބާގްގައި މިއަދު ބޭއްވި ޔޫރަޕިއަން ޕާލަމަންޓް ބައްދަލުވުމުގައި ހުށަހެޅި ގަރާރަށް ބަހުސް ކުރެއްވި ބައެއް މެމްބަރުން ވަނީ ރައީސް އަބްދުﷲ ޔާމީންގެ ސަރުކާރުން އިންސާނީ ހައްގުތައް ނިގުޅައިގަންނަމުންދާ ކަމަށް ބުނެ، ރާއްޖެއާ ދެކޮޅަށް ދަތި ކުރުމުގެ ފިޔަވަޅު އަޅަން ގޮވާލައްވައިފަ އެވެ.

ނަމަވެސް ރާއްޖެއާ ދެކޮޅަށް އީޔޫ އިން ފިޔަވަޅު އަޅާނެ ކަމަށް ގަބޫލު ނުކުރައްވާ ކަމަށް ރާއްޖެ އިން އީޔޫ އާއި ބެލްޖިއަމަށް ކަނޑައަޅާފައި ހުންނަވާ ސަފީރު އަހުމަދު ޝިއާން ވަނީ ވިދާޅުވެފަ އެވެ.

Raajje aa dhekolhah EU in fiyavalheh naalhaane: Safeeru

The most trusted news source in the Maldives

Mihaaru