އައްޑޫ ހިތަދޫ ގެއެއްގެ ގޯތިތެރޭގައި އޮތް ކާރެއްގައި ރޭ ދަންވަރު ރޯކޮށް އަންދާލައިފި އެވެ.
ރޭ ދަންވަރު 1:30 ހާއިރު، ހިތަދޫ ދިރާމުލިގޭ ގޯތި ތެރޭގައި އޮތް ކާރުގައި ރޯކޮށްލުމުގެ ސަބަބުން ވަނީ ބޭނުން ނުކުރެވޭ ވަރަށް އަނދައިފަ އެވެ. އަދި މި ހާދިސާގައި، ގޯތި ތެރޭގައި ހުރި ސައިކަލަކަށް ވެސް ގެއްލުންވެފައިވެ އެވެ. ނަމަވެސް މި ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ.
އެމްއެންޑީއެފް ސަދަން އޭރިއާ އިން ބުނީ ދިރާމުލިގޭގެ ގޯތި ތެރޭގައި އޮތް ކާރުގައި ރޯކޮށްލިކަން ދަންވަރު 2:00 ހާއިރު އެންގުމާއެކު ހިތަދޫ ފަޔާ ސްޓޭޝަން އެ ގެއަށް ގޮސް އަލިފާން ނިއްވާލި ކަމަށެވެ.
މި ހާދިސާ މިހާރު ފުލުހުން އަންނަނީ ތަހުގީގު ކުރަމުންނެވެ.
ހިތަދޫގައި މި ފަހަކަށް އައިސް ކާރުތަކުގައި ރޯކުރުން ވަނީ އާންމުވެފަ އެވެ.
