ޗެންނާއީ (މެއި 5) - އިންޑިއާގެ ރޭލެއްގެ ފާޚާނާ އިން ފެން ނަގައިގެން ސައި ހަދައިގެން ޕަސިންޖަރުންނަށް ވިއްކަނިކޮށް ނަގާފައިވާ ވީޑިއޯއެއް ލީކުކޮށްލުމާ އެކު ސައި ވިއްކި މީހާ ޖޫރިމަނާކޮށްފި އެވެ.
ފާޚާނާގައި ހުރި އިސްކުރުން ފެން ނަގައިގެން ސައި ހަދައިގެން ވިއްކީ ޗެންނާއީ-ހައިދަރުއާބާދު އެކްސްޕްރެސް ރޭލުގަ އެވެ. އެ ރޭލުގައި ވިއްކި ސައި ޓައްޕުގެ ފެން ފާޚާނާ އިން ނަގައިގެން ގެންދާ މަންޒަރު މީހަކު ވަނީ ވީޑިއޯ ކޮށްފަ އެވެ. އެ މަސައްކަތުގައި ތިން މީހަކު އުޅުނެވެ. އެކަމަކު މީގެ ތެރޭން ލައިސަންސް އޮތީ އެކެއްގެ އަތުގަ އެވެ.
އިންޑިއަން ރޭލްވޭ އިން ބުނީ އެ މައްސަލަ ބަލާފައިވާ ކަމަށާ އަދި ސައި ވިއްކި މީހާ 1،500 ޑޮލަރާ އެއްވަރުގެ އަދަދަކުން ޖޫރިމަނާކޮށްފައިވާ ކަމަށެވެ.
ކާބޯތަކެތީގެ ރައްކާތެރިކަމުގެ އެތައް މައްސަލައެއް އިންޑިއާގައި ދިމާވެ އެވެ. އިރުމަތީގެ ކޮލްކަތާގައި ދާދި ފަހުން ވަނީ ކުނިވެފައި ހުރި އެއްގަމު މަސް ގޮނޑުން ނަގައިގެން ރެސްޓޯރެންޓްތަކަށް ވިއްކާ މައްސަލައެއް ފުލުހުން ފެންމަތިކޮށްފަ އެވެ. ފުލުހުން ވަނީ ކުނިވެފައިވާ 20 ޓަނުގެ މަސް ހިފަހައްޓައިފަ އެވެ. މި މައްސަލާގައި މިހާތަނަށް ވަނީ އަށް މީހަކު ހައްޔަރުކޮށްފަ އެވެ.
އެ ޚަބަރު ފެތުރުމާ އެކު ކޮލްކަތާގެ ރެސްޓޯރެންޓްތަކުގައި އެއްގަމު މަހުގެ ޑިމާންޑް ވަނީ ދެބައިކުޅަ އެއްބަޔަށް ދަށްވެފަ އެވެ.
ސަރުކާރުގެ ހިސާބުތައް ދައްކާ ގޮތުން ކާނާ ވިހަވުމަކީ އިންޑިއާގައި އެންމެ އާއްމު އެއް ބައްޔެވެ.
