ފޯކައިދޫ ބަލިކޮށް މިނިވަން ޗެމްޕިއަންޝިޕް ތިމަރަފުށި ކާމިޔާބުކޮށްފި

އެސްޓީއޯ މިނިވަން ޗެމްޕިއަންޝިޕްގެ ފައިނަލުގައި މިރޭ 3-0 އިން ށ. ފޯކައިދޫ ބަލިކޮށް ތ. ތިމަރަފުށިން މުބާރާތުގެ ޗެމްޕިއަންކަން ހޯދައިފި އެވެ.

މީގެ ކުރިން 2016 ވަނަ އަހަރުގެ ފައިނަލުގައި ތިމަރަފުށި ވަނީ ބ. އޭދަފުށި އަތުން ބަލިވެފަ އެވެ. އެފްއޭއެމުން 2015 ވަނަ އަހަރު އަލުން އަތޮޅުތަކަށް ހާއްސަކޮށްގެން މި މުބާރާތް ފެށި ފަހުން މި މުބާރާތް ކާމިޔާބުކުރީ ތިމަރަފުށްޓާއި އޭދަފުށީގެ އިތުރުން މިދިޔަ އަހަރުގެ ޗެމްޕިއަންކަން ހޯދި ދ. ކުޑަހުވަދޫ އާއި ސ. ފޭދޫ އެވެ.

ތިމަރަފުށި މި ފަހަރުގެ މުބާރާތް ކާމިޔާބު ކުރިއިރު ބަލިވީ އެންމެ މެޗަކުންނެވެ. އެއީ ފައިނަލް ބުރުގެ ފުރަތަމަ މެޗުގައި ނިލަންދޫ އަތުންނެވެ.

ބޯ ވާރޭގެ ތެރޭގައި މެޗު ފެށިއިރު ދެ ޓީމުގެ ފަރާތުން ފެނުނީ ހަމަހަމަ ކުޅުމެކެވެ. މެޗުގެ ނުވަ ވަނަ މިނިޓްގައި ފޯކައިދޫގެ ހުސެއިން ސޮބާހު އޭރިއާ ބޭރުން ލިބުނު ބޯޅަ ފޮނުވާލި ނަމަވެސް ރަނގަޅަށް ފައިގައި ލައްވާނުލުމުން އެ ބޯޅަ ދިޔައީ އަރިމަތިން ބޭރަށެވެ.

މެޗުގެ 12 ވަނަ މިނިޓްގައި ފޯކައިދޫ އޭރިއާ ތެރެއަށް އައި ބޯޅައެއްގައި ތިމަރަފުށީގެ އަހުމަދު ހައިލަމް އަށް ފޯކައިދޫގެ ގޯލްކީޕަރު އަހުމަދު ޝާހިދު ފައުލުކުރި ކަމަށް ބުނެ ތިމަރަފުށީގެ ކުޅުންތެރިންނާއި ބެންޗުން ޕެނަލްޓީ އަކަށް ވަރަށް ބޮޑަށް އެޕީލްކުރި އެވެ.

ވިއްސާރައިގައި ކުޅެން ޖެހުމުން ދެ ޓީމަށް ވެސް އެންމެ ރަނގަޅު ކުޅުން ދައްކަން އުނދަގޫތަކެއް ކުރިމަތިވި އެވެ. މެޗުގެ 26 ވަނަ މިނިޓްގައި އޭރިއާ ބޭރުން ތިމަރަފުށީގެ ހައިލަމް ފޮނުވާލި ބޯޅަ ދިޔައީ ހުރަސްދަނޑި މަތިންނެވެ.

މެޗުގެ 35 ވަނަ މިނިޓްގައި ފޯކައިދޫ ލީޑުނެގުމާ ގާތަށް ޖެހިލި އެވެ. އެ ޓީމުގެ ކެޕްޓަން ހުސެއިން ފަޒީލް ލިބުނު ހިލޭ ޖެހުމަކުން ނަގައިދިން ބޯޅަ ފާރިޝް ބޮލުން ފޮނުވާލުމުން ތިމަރަފުށީގެ ގޯލްކީޕަރު ޝާމް އަލީ ވަނީ މަތަކޮށްފަ އެވެ.

އޭގެ ފަހުން ތިން މިނިޓް ތެރޭ ތިމަރަފުށިން ވަނީ ދެ ލަނޑު ޖަހައިފަ އެވެ. ތިމަރަފުށްޓައް ކުޅޭ އައިވަރީ ކޯސްޓުގެ ކުޅުންތެރިޔާ ކުއާސީ މެޗުގެ 36 ވަނަ މިނިޓްގައި އޭރިއާ ތެރެއިން ހައިލަމް ފޮނުވާލި ބޯޅަ ގޯލަށް ވަނީ ކީޕަރު ޝާހިދު އަތުގައި ޖެހިފަ އެވެ. އޭގެ ދެ މިނިޓް ފަހުން ތިމަރަފުށީގެ ދެ ވަނަ ލަނޑު ޖެހީ އަމީން ޝާހު އެވެ. ހާފުގެ މެދުތެރެއިން ލިބުނު ބޯޅައެއް އަމީން ސާހު ވަނީ އެއް ފަހަރުން ޖަހައި ގޯލުގެ ކަނަށް ބޯޅަ އަމާޒުކޮށްލައިފަ އެވެ.

ފުރަތަމަ ހާފުގެ އިތުރު ވަގުތުގައި ތިމަރަފުށްޓަށް ތިން ވަނަ ލަނޑެއް ޖަހައިދޭން ކުއާސީ އަށް ލިބުނު ފުރުސަތުގެ ބޭނުން އޭނާ އަށް ނުހިފުނެވެ.

ތިމަރަފުށިން ދެ ވަނަ ހާފު ފެށީ ވަރުގަދަކޮށެވެ. ފުރަތަމަ ފަސް މިނިޓް ތެރޭ ލަނޑު ޖަހާނެ ގިނަ ފުރުސަތުތަކެއް އެ ޓީމުން ތަނަވަސްކުރި އެވެ. އެ ގޮތުން ބިދޭސީ ކުޅުންތެރިޔާ ކޮއާސީ ހުސްކޮށް ހުރެ ފޮނުވާލި ބޯޅައެއް ބޭރަށް ދިޔައިރު، ހައިލަމް ފޮނުވާލި ބޯޅަ ފޯކައިދޫ ޑިފެންޑަރުން ވަނީ ސަލާމަތްކޮށްފަ އެވެ.

އޭގެ ފަހުން ފޯކައިދޫ އިން މެޗުގެ ތެރެއަށް އައިސް ރަނގަޅު ކުޅުމެއް ދައްކަން ފެށި އެވެ. މެޗުގެ 57 ވަނަ މިނިޓްގައި ފޯކައިދޫގެ މުހައްމަދު ނަދީމް ފޮނުވާލި ޝޮޓް ދިޔައީ އަރިމަތިން ބޭރަށެވެ. އޭގެ ފަހުން އޭރިއާ ތެރެއިން ފާރިޝް ފޮނުވާލި ބޯޅަ ވެސް ގޯލާ ސީދާނުވި އެވެ.

މެޗުގެ ފަހު 20 މިނިޓް ތެރޭ ފޯކައިދޫ އިން ކުރިއަށް ޖެހި ގިނަ އެޓޭކްތަކެއް އުފެއްދި އެވެ. މެޗުގެ 73 ވަނަ މިނިޓްގައި ފޯކައިދޫގެ އަހުމަދު ރަފީއު ފޮނުވާލި ބޯޅަ ތިމަރަފުށިގެ ކީޕަރު ޝާމް ވަނީ މަތަކޮށްފަ އެވެ. އޭގެ ފަހުން ވެސް ފޯކައިދޫ އިން ލަނޑު ޖަހަން ފުރުސަތުތަކެއް ތަނަވަސްކުރި ނަމަވެސް ބޭނުން ނުހިފުނެވެ.

ކައުންޓަ އެޓޭކުގައި ތިމަރަފުށިން ވެސް ދިޔައީ ލިބޭ ފުރުސަތުތަކުގައި އެޓޭކް އުފައްދަން މަސައްކަތް ކުރަމުންނެވެ. ތިމަރަފުށީގެ ތިން ވަނަ ލަނޑު އިތުރު ވަގުތުގައި ލިބުނު ޕެނަލްޓީ އަކުން ޖެހީ ނައިޖީރިއާގެ ޑިފެންޑަރު އަޔޮޑޭޖީ ޓޫންޑޭ އެވެ. މިއީ އަކީ ކޮއާސީ އަށް ފޯކައިދޫ ކީޕަރު ޝާހިދު ކުރި ފައުލަކަށް ރެފްރީ ދިން ޕެނަލްޓީ އެކެވެ. ޝާހިދަށް ފައުލާ ގުޅިގެން ރަތް ކާޑު ދެއްކިއިރު، އޭރު ފޯކައިދޫގެ ތިން ބަދަލު ހަމަވެފައިވުމުން ޕެނަލްޓީ ޖެހިއިރު ގޯލުގައި ހުރީ ފޯކައިދޫ ކެޕްޓަން ފަޒީލް އެވެ.

މެޗުގެ މޮޅު ކުޅުންތެރިޔަކީ ތިމަރަފުށީގެ މެދުތެރޭގައި ތަފާތު މޮޅު ކުޅުމެއް ދެއްކި އަމީން އެވެ. މުބާރާތުގެ މޮޅު ކުޅުންތެރިޔަކީ ފޯކައިދޫގެ ފާރިޝް އެވެ.

މިނިވަން ޗެމްޕިއަންޝިޕް ގަދަ ހަތަރެއްގައި ހިމެނިގެން މި ފަހަރު ދިވެހި ޕްރިމިއާ ލީގުގައި ވާދަކުރާނީ ތިމަރަފުށްޓާއި ފޯކައިދޫގެ އިތުރުން ބ. ފެހެންދޫ އާއި ފ. ނިލަންދޫ އެވެ. މިރޭގެ ފައިނަލު ބެލުމަށް އެ ދެ ރަށަށް ނިސްބަތްވާ ގިނަ ސަޕޯޓަރުންތަކެއް ވަނީ ދަނޑަށް ވަދެފަ އެވެ. އަދި މެޗު ނިމުމުން ތިމަރަފުށީގެ ސަޕޯޓަރުން ވަނީ ދަނޑަށް އަރައި ޓީމާ އެކު ވަރަށް ބޮޑަށް އުފާފާޅުކޮށްފަ އެވެ.