ނ. މާފަރު އެއާޕޯޓަށް މިއަދު ޖެއްސި ޓެސްޓު ފްލައިޓުގައި ދަތުރު ކުރެއްވި ބައެއް ބޭފުޅުން ރަންވޭ މަތީގައި ފޮޓޯއަކަށް ހުއްޓިލައިގެން: މިތަން ތަރައްގީ ކުރަނީ ސިޓީ ހޮޓަލަކާއި ރިސޯޓަކާ ވެސް އެކު -- މިހާރު ފޮޓޯ / ހަސަން މުހައްމަދު
14 އޯގަސްޓް 2018 - 20:25
39 comments
ބައި ގަޑިއިރުގެ ދަތުރަކަށްފަހު، މޯލްޑިވިއަންގެ ޑޭޝް8 މަރުކާގެ ބޯޓު، ރަންވޭއަށް ޖެއްސުމާއެކު ބޯޓު ތެރެއިން އިވެން ފެށީ އަތްތިލަބަޑީގެ އަޑެވެ. ހަމަ އެ ވަގުތު ބޯޓުގެ ސްޕީކަރު ސިސްޓަމުން ފްލައިޓު އެޓެންޑެންޓް ވަރަށް ހާއްސަ އިއުލާނެއް ފުރަތަމަ ފަހަރަށް ބުނެލި އެވެ: "ދަތުރުގެ އެންމެހާ ބައިވެރީން. މިހާރު ތި ވަޑައިގެންނެވުނީ މާފަރު އިންޓަނޭޝަނަލް އެއާޕޯޓަށް."
މިއީ މާފަރަށް މަތިންދާބޯޓެއް ޖެއްސި ފުރަތަމަ ދުވަހެވެ. މާފަރު ރައްޔިތުންނަށް މިއީ ވަރަށް ހާއްސަ އަދި އުފާވެރި ދުވަހެކެވެ. ރަށަށް އައިސްފައި ވަނީ ބޮޑު ބަދަލެކެވެ. ރަށުގައި ކުޅި އޮތް ތަނުގައި މިހާރު އޮތީ އެއް ކިލޯމީޓަރުގެ ރަންވޭއެކެވެ.
"ކުރިން މި ތަނުން ފެންނާނީ ދޫނި. އޮންނާނީ ފެންގަނޑެއް. އެކަމަކު މިހާރު އަޅުގަނޑުމެން މި ޖެއްސީ ބޮޑު ރަންވޭއަކަށް، ކުރިމަގުގެ ބޮޑު އިންޓަނޭޝަނަލް އެއާޕޯޓަކަށް،" މާފަރަށް އުފަން ކުރީގެ ގައުމީ ފުޓުބޯޅަ ޓީމުގެ ކެޕްޓަން އަސްއަދު އަބްދުލްޣަނީ ބުންޏެވެ.
އާބާދީގައި 1100 މީހުން ހިމެނޭ މާފަރަށް މިއަދު ފުރަތަމަ ފަހަރަށް މަތިންދާބޯޓެއް ޖެއްސި ކަމުގައިވި ނަމަވެސް ކުރިމަގުގައި މިއީ ރާއްޖޭގެ އިގްތިސާދީ މުހިންމު ތަނބަކަށް ވެގެންދާނެ އެވެ. މިއަދު މާފަރުގައި ހަމައެކަނި ރަންވޭއެއް އޮތް ނަމަވެސް މި ރަންވޭއާއެކު ޒަމާނީ އެއާޕޯޓެއް އޮންނާނެ އެވެ. ބިޔަ ސިޓީ ހޮޓަލެއް އަޅާނެ އެވެ. އަދި އެންމެ މަތީ ފެންވަރުގެ ރިސޯޓެއްގެ ތަރައްގީ ކުރާނެ އެވެ.
"އިންޑިއަން އޯޝަންގެ އެންމެ އަގުބޮޑު ޓުއަރިޒަމް ދުވަސްކޮޅަކުން އޮންނާނީ މި ސަރަހައްދުގައި،" މާފަރު އެއާޕޯޓުގެ ރަންވޭގައި ހުންނަވައި ޓުއަރިޒަމް މިނިސްޓަރު މޫސާ ޒަމީރު ވިދާޅުވި އެވެ. "ވަރަށް ބޮޑު އަދި ތަފާތު ޕްރޮޖެކްޓެއް ރައީސް އަބްދުﷲ ޔާމީން ފައްޓަވާފައި މިއޮތީ."
މާފަރު އެއާޕޯޓުގެ ޓަވަރު އިމާރާތް ކުރަނީ: މިއީ އެއްފަހަރާ ހަ ޕްރައިވެޓް ޖެޓަށް ހިދުމަތް ދެވޭނެ އެއާޕޯޓެއް -- މިހާރު ފޮޓޯ / ހަސަން މުހައްމަދު
މިނިސްޓަރު ޒަމީރު ވިދާޅުވީ މާފަރު އެއާޕޯޓުގެ މަސައްކަތް މި އަހަރުގެ ނިޔަލަށް ނިމޭނެ ކަމަށެވެ. މާފަރު އެއާޕޯޓު ތަރައްގީ ކުރުމަށް ގާތްގަނޑަކަށް 60 މިލިއަން ޑޮލަރު ހޭދަވާއިރު މި ހަރަދުގައި ހިފަނީ ޔުނައިޓެޑް އަރަބް އެމިރޭޓްސްގެ އަބޫދާބީ ފަންޑް ފޯ ޑެވެލޮޕްމަންޓުންނެވެ.
ކުރިން މި ޕްރޮޖެކްޓް ހަވާލުކޮށްފައި އޮތީ ހާމިދު އިސްމާއިލްގެ މިލޭނިއަމް ކެޕިޓަލްސްއާ އެވެ. ފަހުން ހަވާލު ކުރީ އެމްޑީއޭގެ ލީޑަރު އަހުމަދު ސިޔާމްގެ ކުންފުންޏަކަށެވެ. ނަމަވެސް އަބޫދާބީ ފަންޑުން ހިލޭ އެއާޕޯޓު އެޅޭނެ މަގު ތަނަވަސްވުމުން އެ ޕްރޮޖެކްޓު ސިޔާމު އަތުން ނެގީ އެވެ.
"އެއާޕޯޓަކީ އެ ބޭފުޅުން ދިވެހި ރައްޔިތުންނަށް ދޭ ހަދިޔާއެއް. މި ސަރުކާރާއި އިމާރާތުގެ ސަރުކާރާ ދެމެދު އޮތް ގާތްކަން ރަމްޒުކޮށްދޭނެ ހަދިޔާއެއް،" މިދިޔަ ޑިސެމްބަރު މަހު ރައީސް ޔާމީން ވިދާޅުވެފައިވެ އެވެ.
އޭގެ ނުވަ މަސް ފަހުން އެއާޕޯޓުގެ ރަންވޭ ނިންމައި މިއަދު ޓެސްޓް ފްލައިޓު ޖެއްސި އިރު އެއް ކިލޯމީޓަރުގެ މާފަރު އެއާޕޯޓުގެ ރަންވޭއަކީ ވެލާނާ އިންޓަނޭޝަނަލް އެއާޕޯޓުގެ ރަންވޭހާ ފުޅާ ރަންވޭއެކެވެ. ރާއްޖޭގައި މިވަގުތު އޮތީ މިހާ ފުޅާ މިނުގައި އިތުރު ތިން އެއާޕޯޓެވެ. އަދި މި އެއާޕޯޓުގައި އެއްފަހަރާ ޕްރައިވެޓު ހަ ޖެޓަށް ހިދުމަތް ދެވޭނެ އެވެ. މިއީ އެހެން ރީޖަނަލް އެއާޕޯޓެއްގައި ލިބޭ ހިދުމަތެއް ނޫނެވެ.
މާފަރު އެއާޕޯޓުގެ ކޮންސްޓްރަކްޝަން ސައިޓު: އެއާޕޯޓުގެ މަސައްކަތް މިއަހަރުގެ ނިޔަލަށް ނިމޭނެ -- މިހާރު ފޮޓޯ / ހަސަން މުހައްމަދު
މިނިސްޓަރު ޒަމީރުގެ ތަސައްވަރާ އެއްގޮތަށް ނ. އަތޮޅުގެ މި ސަރަހައްދަކީ އިންޑިޔާ ކަނޑުގެ އެންމެ ލަގްޒަރީ ޓުއަރިޒަމް މަންޒިލަށްވާން އަދި ދުވަސްކޮޅެއް ނަގާނެ އެވެ. އެކަމަކު މާފަރުގެ އަދި މި ސަރަހައްދުން ރައްޔިތުންގެ އުއްމީދުތައް ހުރީ އެއަށް ވުރެ ވެސް ގާތަށެވެ.
މާފަރުގައި އެއާޕޯޓެއް އަޅަން އެންމެ ފުރަތަމަ އިއުލާން ކުރީ މީގެ 11 އަހަރު ކުރިން ރައީސް މައުމޫން އަބްދުލް ގައްޔޫމްގެ ސަރުކާރުންނެވެ. އެހެންވެ މިއަދާ ހަމައަށް ވެސް ރައްޔިތުން ތިބީ އެއާޕޯޓަކަށް ކެތްމަދުވެފަ އެވެ.
"ވަރަށް އުފާވެރި ދުވަހެއް މިއީ އަޅުގަނޑުމެންނަށް. އުއްމީދަކީ މިއީ އަދި ފެށުމެއް ކަމަށް. މިކަމުގެ ސަބަބުން ފުރުސަތުތައް ހުޅުވި، އިގްތިސާދު ރަނގަޅުވެގެންދާނެ ކަމަށް މި ބަލަނީ،" މިއަދު ޓެސްޓު ފްލައިޓު ޖެއްސި މަންޒަރު ބަލަން ނުކުމެ ހުރި މި ރަށު މީހަކު ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މައުލޫމާތު
16 August 2018
އަބޫދާބީގެ ކޮން ބޭފުޅަކައްތޯ ރަށެއް ހަދިޔާކުރީ މި ފްރީ ބަޖެޓު ހޯދަން؟؟؟ ކިތައް އަހަރަށްތޯ އެރަށް ދީފައޮތީ؟؟؟ ކޮން ކޮން ކިތައް ވިޔަފާރިވެރިންނައްތޯ ފައިދާ ވަނީ؟؟؟
ހުސްނުވާ ނޫނު ހިޔާލެށް
15 August 2018
މާފަރު ބައިނަލްއަގުވާމީ ވައިގެ ބަނދަރުގެ ފައިދާ ރައްޔިތުންނަށް ކުރާނީ މާފަރު ފަޅުހިއްކާ މިލަދުންމަޑުލުގެ ޝަހަރު އެތާ ހަދައިގެން! މާފަރާ މަނަދޫ ލަކްޒަރީ ޝަހަރެއް ގޮތުގައި ތަރައްގީވެ މިލަދުންމަޑުލުގެ ލަކްޒަރީ ރިސޯޓުތަކުގެ އޮފީސްތަށް އެތާ ހުރެމެ ހައިކުލާސް ހޮސްޕިޓަލުތަށް ހުންނަ ދުވަހަކީ ދެކެން ބޭނުންވާ ދުވަހެއް.
ދިރާސާ ދަރިވަރު
15 August 2018
މިޕްރޮޖެޓް ހިނގާދިޔަގޮތަށް ބަލާލީމާވެސް އެބައެނގޭ އުސޫލުން ބޭރުން ކަންތައްތަކެއް ހިނގާފައިވާކަން. އެގޮތުން ފުރަތަމަ އެއްބަޔަކަށް ދީފައި އެބައެއްގެ އަތުން ނަގައި އަނެއްބަޔަކަށް ދީފައި އެންމެ ފަހުން ތިންވަނަ ފަރާތުން މިތަން ތަރައްގީކުރަނީ. އަދި ތަރައްގީކޮށް ނިންމާފައި ހަވާލުކުރަނީ ސަރުކާރާއިތޯ ނުވަތަ ހިންގާނީ އަމިއްލައަށް ކަމެއްވެސް އަދި އެނގޭކަށް ނެތް. އަނެއްކާ މިޕްރޮޖެކްޓާއި އެކު ރިސޯޓެއް ޑިވެލޮޕްކުރަން އެބަލިބޭ. ވުމާއެކު ހުޅުވާލެވިފައިވާ ބިޑަކާއި ނުލައި ހިންގާ މިފަދަ ޕްރޮޖެކްޓްތަކުން ކޮމިޝަނުގެބައި ވަރަށް ބޮޑުވާނެކަމަށް ބެލެވޭ. އަހަރެމެން ލާދީނީ މިވަނީ ގޮތް ނޭނގޭ މިކަހަލަ ކޮމިޝަންތަކައް މަގުފަހިވާ ކަންކަމަށް ތާއީދު ނުކުރެވޭތީ. އަހަރެމެންނަށްވެސް އެބަ އިނގޭ ކޮންމެގޮތަކުން ނަމަވެސް ތަނެއް ތަރައްގީކުރެވިއްޖެ ނަމަ އެތަނެއްގައި އުޅޭ ރައްޔިތަކަށް ފައިދާވާނެކަން. މައްސަލައަކީ ޕްރޮޖެކްޓުގެ ކުރިން އެހެންބަޔަކު ނަހަމަގޮތެއްގައި މުއްސަދިވެގެން ދިޔުން.
ފުންއަސަރު
15 August 2018
މަރްހަބާ މާފަރު ރައްޔިތުން. ވިސްނާލަބަލަ. ރަށުގެ އެއްވެސް ބަޔަކާ ނުކުޅެ ތިޔަބުނާ އެއާޕޯޓެއް އެޅެންއޮތް. އެއާޕޯޓް އެޅުމަކުން މައްސަލައެއްނެތް. އެކަމަކު ރަށުގެ އެއްވެސް އެއްޗެއް ކަނޑާނުލާ ވަކިނުކޮށް އެކަން ކުރެވެން އޮއްވާ ރަށުގެ ތަންތަން ހިއްކާ ކޮށާ މަށާ ހެދީމާ ކަމުނުގޮސްގެން މިއުޅެނީ. ހަގީގަތުގާވެސް އެރަށަކީ މާސިންގާ ބޮޑުފަޅެއް އޮތް ރަށެއް. އެތަން ހިއްކާލީމާ ތިވަރުގެ ދެތިން އެއާޕޯޓް އެޅިދާނެ. ރާއްޖޭގާ މިހާރުއޮތް މަހާޖައްރާފު ގެންގޮސް އެތަން ހިއްކާލަން ނަގާނީ ގިނަވެގެން 15 ދުވަސް. ކިތްވެތަ އެގޮތަށް އެކަން ނުކުރީ. ތަނެއް ހަލާކުކޮށްލަން ޖެހޭނީ އިތުރު އެހެން ގޮތެއް ނެތީމާ ކަމުގާ ދކެން. ބަލާނިކަން މާފަރުމީހުން ހެވިދިލިފާ ތިބިވަރު.
ޒީނާ
16 August 2018
އޭރުން ކަލޭމެން ބުނާނެ ދޯ... ފަޅު ހިއްކައިގެން ފަރު ހަލާކު ކުރީއޭ.. ރަގަނޅު އެއްގޮތެއްވެސް ނެތް
ބޮޑްބޭބެ
15 August 2018
2018 އޮގަސްޓް ގަ ކުޅުދުއްފުށްޓާއި ހޯރަފުށްޓާއި ފުނަދޫ އެއާރފޯޓްފަ ފުލައިޓް ޖަންސާނާ ރައީސް މީހާ ބުނި. ވެލިގަޑެއް ނޫނީ އަދިނެތް. ވެލިގަޑުމަށްޗަށް ޖަންސަންވީ.
ފާތުމާ
15 August 2018
މާފަރުން މީހުން ބާލާނެ ކަމުގެ ފެހި ސިގްނަލް ޔާމީން ދީފި....
އަނގަފިނދު
15 August 2018
ބަލަގަ ޔާމިނު މީ ޔާމިނު އަޅާދިން އެއާޕޯރޓެއްތަ؟ ރަގަޅައް ކިޔާބަލަ ޢަބޫދާބީ ފަންޑް އެކޭ އެބައިންހެން ހީވަނީ!. ބުޅަލެއް މިގައުމުގެ ވެރިޔަކައް ހުއްޓަސް ބަޔަކު އަޅާ ދީފިއްޔާ އެޅޭނެ ދޯ!
ރަދީފް
15 August 2018
މަނިކްފާނު.ދުނިޔޭގެ ލޯންދޭ ގައުމުތަކުގެ ބޭންކްތަކުގަ ފައިސާވެސް އެބަހުރި.އަހަރުމެން 02 މީހުން ގޮސް ބުނެގެން އެމީހުން 500 ޑޮލަރުވެސް ލޯނެއްގެ ގޮތުގަ ދޭނެތަ؟؟ ނުދޭނެ ދޯ.އެހެންވީމަ ތަންކޮޅެއް ސެންސިޓިވް ކޮމެންޓްކުރުމަށް ނަސޭހަތްތެރިވަން.ސޮރީ.ޔުޒާނޭމުން ވެސް ލެވެލް ހާމަވޭ.ވ.ވެދުން
ރަދީފް
15 August 2018
*ލޯނު ދޫކުރާ
ވޯލް
15 August 2018
ޔާމީނު ކިޔާ އެއްޗެއް ދިމައެއްނުވޭ، އެއްފަހަރު ބުނާނެ އަހަރުމެން އަމިއްލައަށޭ ތަރައްޤީގެ މަޝްރޫއު ހިންގާނީ ދެން ބުނާނެ، އެހެން ޤައުމުތަކުން ހަދިޔާގެ ގޮތުގައި އަޅައިދޭ ތަންތަން ކަމަކު ނުދެއޭ. އެކަމަކު ޔާމީނުގެ ސަރުކާރަށް ބަޔަކު ދިން ހަދިޔާވެއްޖެޔާވެސް އެއީ ޔާމީނުގެ މޮޅުަކމުން. މި އެއަރޕޯޓް އެއަޅަނީ އެތަނުގައި ހަދާ ސިޓީހޮޓެލާއި ރިސޯޓްގެ ބޭނުމަށް، ތިއިން ނިކަމެތި ރައްޔިތުންނަށް ވާނެ މާބޮޑު ފައިދާއެއްނެތް، ރައްޔިތުނަނށް ފައިދާވަނީ ހޮސްޕިޓާ ނުވަތަ ސްކޫލް ރަގަޅު ފެންވަރުގައި އެޅީމަ.
ޣަދުރޭ
15 August 2018
މިކަހަލަ ކިތަށް ރަންވޭ އިބޫ އަޅާނެ..މީ ފެން މެޓާ
ބޮޑާބެ
15 August 2018
"މިނިސްޓަރު ޒަމީރު ވިދާޅުވީ މާފަރު އެއާޕޯޓުގެ މަސައްކަތް މި އަހަރުގެ ނިޔަލަށް ނިމޭނެ ކަމަށެވެ." ކަލޯގަޔާ! ނުނިމެނީސް ފްލައިޓް ޖައްސައިގެންދޯ މިއުޅެނީ؟ އަވަސް އަރުވާލައިގެން ތިހެން ކުރާ ކަންކަމަކީ ދައުލަތަށް ވާނެ ބޮޑު ގެއްލުމެއް! ހެޔޮ ނުވާނެ ކުރާ ކަމެއް ދެމެހެއްޓެނިވި ތަރައްގީއަށް މަގުފަހިވާ ގޮތަށް ކޮށްދީ!