ކެންސަރަށް ހޭލުންތެރިކުރުވުމުގެ "ޕިންކް ރިބަން ވޯކް" އަންނަ ހޮނިހިރު ދުވަހު

މިދިޔަ އަހަރު ބޭއްވި ޕިންކް ރިބަން ވޯކްގެ ތެރެއިން: ހުޅުމާލޭގެ އިތުރުން ބީއެމްއެލްގެ ބްރާންޗު ހުންނަ 27 ރަށެއްގައި މި ހަރަކާތް ކުރިއަށް ގެންދާނެ -- ފޮޓޯ / ބީއެމްއެލް

ހަސަން މުހައްމަދު، މިހާރު

23 އޮކްޓޯބަރ 2018 - 10:32

3 comments

އުރަމަތީގެ ކެންސަރަށް އާންމުން ހޭލުންތެރިކުރުވުމުގެ ގޮތުން ކެންސާ ސޮސައިޓީ އޮފް މޯލްޑިވްސް އާއި ބޭންކް އޮފް މޯލްޑިވްސް (ބީއެމްއެލް) ގުޅިގެން "ޕިންކް ރިބަން ވޯކް" އަންނަ ހޮނިހިރު، ރާއްޖޭގެ އެކި ސަރަހައްދުތަކުގައި، ބާއްވަން ހަމަޖައްސައިފި އެވެ.

ބީއެމްއެލް އިން ބުނީ، 2016 އިން ފެށިގެން ބާއްވަމުން އަންނަ މި ހިނގާލުން ހުޅުމާލޭގެ އިތުރުން ބީއެމްއެލް ބްރާންޗު ހުންނަ 27 ރަށެއްގައި ކުރިއަށް ދާނެ ކަމަށެވެ.

ޕިންކް ރިބަން ވޯކްގައި ބައިވެރިވާން ރަޖިސްޓްރީވާކަށް ނުޖެހެ އެވެ. ނަމަވެސް އެ ހިނގުމަށް ހާއްސަކޮށްފައިވާ ޓީޝާޓު ގަތުމަކީ ވަރަށް ބޮޑު އެދުމެއް ކަމަށް ބީއެމްއެލުން ބުންޏެވެ. ޓީޝާޓު ވިއްކައިގެން ލިބޭ ފައިސާ ހަދިޔާކުރަނީ ކެންސާ ސޮސައިޓީއަށެވެ.

މިދިޔަ އަހަރު ބޭއްވި ޕިންކް ރިބަން ވޯކްގެ ތެރެއިން: މި ހަރަކާތުގައި ޓީޝާޓު ވިއްކައިގެން ލިބޭ ހުރިހާ ފައިސާއެއް ހަދިޔާކުރަނީ ކެންސާ ސޮސައިޓީ އަށް -- ފޮޓޯ / ބީއެމްއެލް

ބީއެމްއެލުން ބުނި ގޮތުގައި ލެކިއުޓް، ރެޕިއުޓް ފިހާރައިގެ އިތުރުން ދުވުން ބާއްވާ ރަށްރަށުން 150ރ. އަށް އެ ޓީޝާޓު ލިބޭނެ އެވެ.

ރާއްޖޭގެ އެންމެ ބޮޑު ބޭންކުން ބުނި ގޮތުގައި ޕިންކް ރިބަން ވޯކް ކުރިއަށްދާއިރު އުރަމަތީ ކެންސަރަށް ހޭލުންތެރި ކުރުމަށް ހާއްސަ މައުލޫމާތުތައް ދޭނެ އެވެ.

މިދިޔަ ދެ އަހަރު ވެސް އެ ހަރަތާކަށް ވަރަށް ބޮޑު ތަރުހީބެއް ލިބުނު ކަމަށް ބީއެމްއެލުން ބުންޏެވެ.