އާ ހުށަހެޅުމެއް ލިބިއްޖެ ނަމަ އެމްއެޗް370 ހޯދަން އަލުން ފަށާނެ

ކުއާލަ ލަމްޕޫރު (މާޗް 10) - ގެއްލިފައިވާ މެލޭޝިއާ އެއާލައިންސްގެ ފްލައިޓް އެމްއެޗް370 ހޯދުމާ ގުޅޭ ގޮތުން އިތުބާރު ކުރެވޭ ރަނގަޅު ޕްރޮޕޯޒަލެއް ހިފައިގެން ކުންފުނިތަކުން އަތުވެއްޖެ ނަމަ އެ މަސައްކަތް އަލުން ފަށާނެ ކަމަށް މެލޭޝިއާގެ ޓްރާންސްޕޯޓް މިނިސްޓަރު އެންތަނީ ލޯކް ވިދާޅުވެއްޖެ އެވެ.

ކުއާލަ ލަމްޕޫރުން ފުރައިގެން ބެއިޖިންނަށް 239 މީހުންނާ އެކު ދަތުރުކުރި ބޯޓު ގެއްލުނުތާ މިދިޔަ ހުކުރު ދުވަހަށް ފަސް އަހަރު ފުރިފައިވާ އިރު ބޯޓާ ބެހޭ އެއްވެސް ހިލަމެއް މިހާތަނަށް ލިބިފައެއް ނުވެ އެވެ. ނަމަވެސް މަތިންދާ ބޯޓެއްގެ ބައިތަކެއް ވަނީ އިންޑިއާ ކަނޑުގެ ހުޅަނގުގެ ގައުމުތަކަށް ލައްވެފަ އެވެ.

ބޯޓުން ދަތުރުކުރި މީހުންގެ ހަނދާނުގައި ބޭއްވި އިވެންޓެއްގައި ލޯކް ވިދާޅުވީ ބޯޓު ހޯދުމުގެ މަސައްކަތް އަލުން ފަށަން ސަރުކާރުގެ ޕްލޭނެއް ނެތް ކަމަށެވެ. ނަމަވެސް ކުންފުނިތަކުން އެކަން ކުރަން ހުށަހަޅައިފި ނަމަ ސަރުކާރުން މަރުހަބާ ކިޔާ އެކަން ކުރިއަށް ގެންދާނެ ކަމަށް ވިދާޅުވި އެވެ.

ބޯޓުން ދަތުރުކުރި މީހުންގެ އާއިލާތަކުން ބުނަނީ ބޯޓު ހޯދުމުގެ މަސައްކަތް ހުއްޓާލަން ޖެހޭނީ ބޯޓު ފެނުމުން ކަމަށެވެ. ބޯޓު ހޯދުމުގެ މަސައްކަތް އެންމެ ފަހުން ކުރި އެމެރިކާގެ އޯޝަން އިންފިނިޓީން ވަނީ މިދިޔަ އަހަރުގެ މެއި މަހު 29 ވަނަ ދުވަހު އެ މަސައްކަތް ހުއްޓާލައިފަ އެވެ.

އޯޝަން އިންފިނިޓީން ވަނީ އިންޑިއާ ކަނޑުގެ ދެކުނުން ކުރިން ބެލި ސަރަހައްދުގެ އުތުރުން 80،000 އަކަ ކިލޯމީޓަރު (30،888 އަކަ މޭލު)ގެ ސަރަހައްދެއް ބަލައިފަ އެވެ. ނަމަވެސް އޯޝަން އިންފިނިޓީން މަސައްކަތް ހުއްޓާލީ ބޯޓާ ބެހޭ އެއްވެސް މައުލޫމާތެއް ނުލިބުމުންނެވެ.

އެމްއެޗް370 ހޯދުމަށް ކަނޑުއަޑީގެ 120،000 އަކަ ކިލޯ މީޓަރު (46،000 އަކަ މޭލު) ގެ ސަރަހައްދެއް ކުރިން ވެސް ވަނީ ބަލައިފަ އެވެ. ބޯޓު ހޯދަން އިންޑިއާ ކަނޑުގެ ސަރަހައްދު ބެލުމަށް މެލޭޝިއާ، ޗައިނާ އަދި އޮސްޓްރޭލިއާ ގުޅިގެން ކުރަމުން ދިޔަ މަސައްކަތް ހުއްޓާލީ ޖެނުއަރީ، 2017 ގަ އެވެ. ގާތްގަނޑަކަށް 1،046 ދުވަހަށް ފަހު މަސައްކަތް ހުއްޓާލި އިރު ވަނީ 200 މިލިއަން އޮސްޓްރޭލިއަން ޑޮލަރު ޚަރަދުކޮށްފަ އެވެ.

ބޯޓުން ދަތުރުކުރީ ޗައިނާގެ 153 މީހުންނާއި މެލޭޝިއާގެ 38 މީހުންގެ އިތުރުން އެމެރިކާ، އީރާން، ކެނެޑާ، އިންޑޮނީޝިއާ، އޮސްޓްރޭލިއާ، އިންޑިއާ، ފްރާންސް، ނިއު ޒީލެންޑް، ޔޫކްރޭން، ރަޝިޔާ، ޓައިވާން އަދި ނެދަލޭންޑްސް މީހުންނެވެ. ބޯޓުގެ 12 ކްރޫންނަކީ މެލޭޝިއާ މީހުންނެވެ.