އެންމެ ބޮޑު ކަމަކީ މަޖިލީހުގެ އަގު އެރުވުން: ނަޝީދު

ރައްޔިތުންގެ މަޖިލީހުގެ އިންތިހާބުގެ ކެމްޕޭނަށް އެމްޑީޕީން ނުކުންނަން ބެލި އިރު އެންމެ ބޮޑު މައްސަލައަކަށް ވެފައި އޮތީ ރައްޔިތުންގެ ކުރިމަތީގައި މަޖިލީހުގެ އަގު އަލުން އެރުވުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އުނގޫފާރު ދާއިރާއަށް އެމްޑީޕީގެ ޓިކެޓްގައި ކުރިމަތިލެއްވި މުހައްމަދު ވަހީދުގެ ކެމްޕޭނަށް ރ. ހުޅުދުއްފާރުގައި މިއަދު ބޭއްވި ޖަލްސާގައި ނަޝީދު ވިދާޅުވީ މަޖިލީހުގައި ވޯޓް ވިއްކާ ކަމާއި ބައެއް މެމްބަރުންނަށް ޖާއިޒް ނޫން މުއްސަނދިކަން ލިބިފައިވާކަން ރައްޔިތުންނަށް އެނގޭ ކަމަށެވެ. މަޖިލީހުގެ މެމްބަރުން ވޯޓް ވިއްކަމުން ގެންދިޔަ މިންވަރު ރައްޔިތުން އައީ ބަލަމުން ކަމަށް ވެސް އެމަނިކުފާނު ވިދާޅުވި އެވެ.

"ނަވާރަ ވަނަ މަޖިލިސް އުފެއްދުމަށް އެމްޑީޕީގެ ފަރާތުން ކެމްޕޭނެއް އެކުލަވައިލަން ވިސްނިއިރުގައި މި ޕާޓީއަށް ދިމާވެފައި އޮތް އެންމެ ބޮޑު މައްސަލަޔަކީ، ކިހިނެއްބާއޭ ދެން ރައްޔިތުންގެ މަޖިލީހުގެ ނަޒާހަތްތެރިކަން، ގަދަރާއި އިއްޒަތް، އޭގެ އަގު ރާއްޖޭގެ ރައްޔިތުންގެ ކުރިމަތީގައި ހިފެހެއްޓޭނޭ ގޮތަކަށް، ފެން ހިފެހެއްޓޭނޭ ގޮތަކަށް އަޅުގަނޑުމެން އެކަން ކިޔައިދޭނީ،" ނަޝީދު ވިދާޅުވި އެވެ.

މަޖިލީހުގެ ބައެއް މެމްބަރުން ވޯޓް ވިއްކައިގެން މުއްސަނދިވެފައިވާ ކަމަށް ތުހުމަތު ކުރައްވަމުން ނަޝީދު ވިދާޅުވީ ބައެއް މެމްބަރުން ދައުރު ނިންމަވައިލެއްވި އިރު މާލެ އާއި ހުޅުމާލޭން ފްލެޓް ބައްލަވައިގެންފައިވާ ކަމަށާއި ވިޔަފާރިތައް ވެސް ފައްޓަވާފައިވާ ކަމަށެވެ.

"ތިޔަ ބޭފުޅުންނަށް އެބަ އެނގޭ އެތަނަށް ވަންނަ އިރުގައި ދެ ޖީބުގައި އެއްވެސް އެއްޗެއް ނެތް މީހާ، ބޯލްޕޮއިންޓް ގަލަމެއްގެ ދޯރި އެކަނި ޖަހާލައިގެން ހުރީ ޖީބަށް. ނިމުނުއިރުގައި ހުޅުމާލޭގައި ފްލެޓެއް، މާލޭގައި ފްލެޓެއް. ރަށުގައި ބޮޑު ގެއެއް، ސަފާރީ އޮޑިއެއް، ނިމުނު އިރުގައި ބޭރަށް މީހުން ފޮނުވާ އޭޖެންސީއެއް. ނިމުނު އިރުގައި ކޮންސްޓްރަކްޝަން ކުންފުންޏެއް، ނިމުނުއިރުގައި ބުކްޝޮޕެއް، ނިމުނު އިރުގައި މީނާގެ ސައި ހޮޓަލެއް، ނިމުނު އިރުގައި މީނާ އަތުގައި ނެތް އެކައްޗެއް ވެސް ނެތް،" އެމަނިކުފާނު ވިދާޅުވި އެވެ.

އުނގޫފާރު ދާއިރާއަށް އެމްޑީޕީގެ ޓިކެޓްގައި ކުރިމަތިލެއްވި މުހައްމަދު ވަހީދު (ކ) އާއި ކުރީގެ ރައީސް މުހައްމަދު ނަޝީދު ސަލާންކުރައްވަނީ

އިންތިހާބުތަކުގައި ވޯޓް ގަނެ ވިއްކުން އޮންނަ މިންވަރާ ބެހޭ ގޮތުން ވާހަކަ ދައްކަވަމުން ނަޝީދު ވިދާޅުވީ ވޯޓް ދޭނީ އެއްޗެއް ލިބުނީމާ ކަމަށް ބައެއް މީހުން އަމިއްލައަށް ބުނަމުން އަންނަ ކަމަށާއި އެފަދަ މީހުން އެ ތިބެނީ ވަރަށް ބޮޑު އޮޅުމެއްގައި ކަމަށެވެ. އުނގޫފާރު ދާއިރާއަށް ޖުމްހޫރީ ޕާޓީން ކުރިމަތިލާފައިވާ ކެންޑިޑޭޓް އިލްހާމް އަހުމަދަށް ނުސީދާ ގޮތެއްގައި ފާޑު ވިދާޅުވެ ވާހަކަ ދައްކަވަމުން، އެމަނިކުފާނު ވިދާޅުވީ ފަހަރަކު ތަނަކަށް ކުރިމަތި ލަމުން އަންނަ މީހުންނަށް، އެ މީހުން ކުރަން އުޅޭ ކަމެއް ވެސް ނޭނގޭ ކަމަށެވެ.

"މިހެން ކުރިމަތި ލަމުން ލަމުން. އެތަން މިތަނަށް ކުރިމަތި ލަމުން އަންނަ މީހުން، ރަށުގެ ރައްޔިތުންނެއް ނުއެއް އިނގޭ. ވާން އުޅޭ ގޮތެއް އޮޅުން ފިލުވަނީއެއް ނޫން. ކުރީގައި ވީގޮތަކާ އަޅާލީކީއެއް ނޫން. އެހެން ނަމަވެސް ތަނަކުން ފައިސާތަކެއް ހިފައިގެން އައިސް ބަހަމުން ބަހަމުން ދަނީ،" ނަޝީދު ވިދާޅުވި އެވެ.

މަޖިލިސް އިންތިހާބުގެ ކެމްޕޭންގައި ރ. އަތޮޅަށް ކުރައްވާ ދަތުރުފުޅުގައި ނަޝީދު މިއަދު އެ އަތޮޅު އަނގޮޅިތީމަށް ވެސް ވަޑައިގެންނެވި އެވެ. އެރަށުގައި ބޭއްވި ޖަލްސާގައި ވިދާޅުވީ މި އިންތިހާބުގައި ވޯޓް ދިނުމުގައި ކޮންމެހެން ރަށު މީހަކަށް ވީތީ ވޯޓްދޭން ނުޖެހޭ ކަމަށެވެ. ވަކި ވަކި މެމްބަރުންގެ ގޮތުގައި ކުރެވޭނެ ކަމެއް ނެތްކަމަށް ވިދާޅުވެ ދައްކަވާ ވާހަކަ ވެސް އެ ރަށުގައި ތަކުރާރު ކުރެއްވި އެވެ.

"ދެން މިހާރު އެހެން ނޫނަސް މިއުޅެނީ ރަށު މީހެއް ހޯދަކަށެއް ނޫން. މިއުޅެނީ ރަށުގައި ހުރި ރުކެއް އަޅާލާކަށެއް ނޫނޭ. މިއުޅެނީ ރަށު މީހެއް ހޯދާކަށް ނޫން، މިއުޅެނީކީ ފަޅު ތެރޭގައި އޮތް އޮޑިއެއް އެހެލާކަށެއް ނޫން،" އެމަނިކުފާނު ވިދާޅުވި އެވެ.