އޮންލައިންކޮށް ޕޮލިސް ރިކޯޑަށް އެދޭ "ޕޮލިސް ސެޓްފިކެޓް ޕޯޓަލް" މިއަދު ތައާރަފުކޮށްފި އެވެ.
އިސްކަންދަރު ކޮށީގައި ބޭއްވި ރަސްމިއްޔާތެއް ގައި އެ ޕޯޓަލް އިފުތިތާހު ކޮށްދެއްވީ ޕޮލިސް ކޮމިޝަނަރު މުހައްމަދު ހަމީދެވެ.
އެ ރަސްމިއްޔާތުގައި، ހަމީދު ވިދާޅުވީ ޕޮލިސް ރިކޯޑު ހޯދަން ގިނަ ބަޔަކު އެދޭއިރު، މެނުއަލް ޕްރޮސެސް ދޫކޮށްލައި، އިލެކްޓްރޯނިކް ހިދުމަތެއް ތައާރަފު ކުރުމަކީ ލިބޭނެ ވަރަށް ބޮޑު ފަސޭހައެއް ކަމަށެވެ.
އޭނާ ވިދާޅުވި ގޮތުގައި، އޭގެ ނަތީޖާ އަކީ ޕޮލިސް ރިކޯޑު ހޯދަން ހޭދަކުރާ ވަގުތުތަކާއި އުނދަގޫތަކަށް ވަރަށް ބޮޑު ފަސޭހައެއް އަދި ހެޔޮބަދަލެއް އަައުމެވެ.
ޕޮލިސް ރިކޯޑުގެ ޕޯޓަލް ތައާރަފު ކުރުމަކީ ކުރިއަށް އޮތް ފަސް އަހަރަށް ކަނޑައަޅާފައިވާ ފުލުހުންގެ ސްޓްރެޓެޖިކް ޕްލޭންގެ ތެރޭގައި ހިމެނޭ ކަމެކެވެ.
ބިއުރޯ އޮފް ކްރައިމް ރެކޯޑްސްގެ ހެޑް، ޗީފް އިންސްޕެކްޓަ އޮފް ޕޮލިސް އަލީ ޝަރީފް ވިދާޅުވީ ޕޮލިސް ރިކޯޑު ޕޯޓަލް ބޭނުންކުރަން ފެށުމާ ގުޅިގެން، ރާއްޖެ އާއި ރާއްޖެ އިން ބޭރުގައި އުޅޭ މީހުންނަށް ޒަމާނީ ހިދުމަތެއް ފޯރުކޮށްދެވޭނެ ކަމަށެވެ.
ޕޮލިސް ރިކޯޑުގައި އަލަށް ތައާރަފް ކުރި ބަދަލުތަކުގެ ތެރޭގައި ސެކިއުރިޓީ ފީޗާއެއްގެ ގޮތުގައި ކިއުއާރު ކޯޑެއް ހިމަނައި، މި ކޯޑް ބޭނުންކޮށްގެން ސެޓްފިކެޓްގެ ސައްހަކަން ވަގުތުން ދެނެގަނެވޭނެ ކަމަށް ޝަރީފް ވިދާޅުވި އެވެ.