އެވަރެސްޓުގައި މީހުން މަރުވީ ހަމައެކަނި ތޮއްޖެހިގެނެއް ނޫން: ނޭޕާލް

އެވަރެސްޓްގެ އެންމެ ކޮޅަށް އަރަން ކިޔޫގައި: މިއީ އެއް ފަހަރާ އެންމެ ގިނަ ބަޔަކު ފަރުބަދަޔަށް އަރަން އުޅުނު ފަހަރު -- ފޮޓޯ:އޭއެފްޕީ

އިދުހާމް ނައީމް، މިހާރު

27 މެއި 2019 - 10:23

1 comments

ދުނިޔޭގެ އެންމެ އުސް ފަރުބަދަ ކަމަށް ވާ މައުންޓް އެވަރެސްޓްގެ ކޮޅަށް އަރަން އުޅުނު މީހުންގެ ތެރެއިން މި މަހު ގިނަ އަދަދެއްގެ ބަޔަކު މަރުވީ ހަމައެކަނި ތޮއްޖެހިގެން ނޫން ކަމަށް ނޭޕާލުން އިއްޔެ ބުނެފި އެވެ.

މި މަހު އެވަރެސްޓަށް އަރަން އުޅުނު މީހުންގެ ތެރެއިން ގެއްލިފައިވާ މީހުންނާއި މަރުވެފައިވާ މީހުންގެ އަދަދު ވަނީ 10 އަށް އަރައިފަ އެވެ. މިއީ އެއް މޫސުމުގައި އާންމުކޮށް މީހުން މަރުވާ މިންވަރެއް ނޫނެވެ.

ހިތްވަރުގަދަކަމާއި އިންސާނުންގެ ގާބިލްކަމުގެ އެންމެ މަތީ ސިފަތަކުން ހިތްހަމަޖައްސާލަން ބޭނުން އެތައް ސަތޭކަ ބަޔަކު ކޮންމެ އަހަރަކު ވެސް އެވަރެސްޓްގެ ކޮޅަށް އެރޭތޯ ބަލަ އެވެ. އަދި މީގެ ކުރިން އެކަމަށް ހުއްދަ ނުދޭހާ ގިނަ އަދަދަކަށް މި އަހަރު ނޭޕާލު ސަރުކާރުން ވަނީ އެ ފުރުސަތު ދީފަ އެވެ. އެހެންކަމުން ފަރުބަދައިގެ އެންމެ ކޮޅަށް ގޮސް، ނޭރި ކިއުގައި އެތައް ގަޑިއިރެއް ހޭދަކުރަން ޖެހެ އެވެ. މިއީ ވަރަށް ބޮޑު ނުރައްކަލެއް ކަމަށް ތަޖުރިބާކާރުން ބުނެ އެވެ.

ނޭޕާލުގެ ޓުއަރިޒަމް އޮތޯރިޓީގެ ޑިރެކްޓަ ޖެނެރަލް ޑާންޑޫ ރާޖް ގިމިރް ވިދާޅުވީ މީހުން މަރުވީ ހަމައެކަނި ތޮއްޖެހިގެން ކަމަށް ބުނާ ބުނުން ދޮގު ކަމަށެވެ. މީހުން މަރުވުމުގައި މޫސުމަށް އައި ބަދަލުތައް ވެސް ހިމެނޭ ކަމަށް އޭނާ ވިދާޅުވި އެވެ.

ފަރުބަދައިގެ ކޮޅަށް އެރުމަށްޓަކައި ގިނަ އަދަދެއްގެ ބަޔަކު ކިއޫގައި ތިބި ފޮޓޯތަކެއް ސޯޝަލް މީޑިއާގައި ވަނީ އާއްމުވެފަ އެވެ.

ގިމިރް ވިދާޅުވީ މި މަހު އެވަރެސްޓަށް 381 މީހުން އަރާފައިވާ ކަމަށެވެ. މިއީ އާއްމުކޮށް އެވަރެސްޓަށް އެއްފަހަރާ އަރާ އަދަދަށް ވުރެ ގިނަ އަދަދެކެވެ.

އުމުރުން 44 އަހަރުގެ ފިޝާ: އޭނާ ވަނީ އެވަރެސްޓުގެ އެންމެ މައްޗަށް އެރިތާ ގިނަ އިރުތަކެއް ނުވެ މަރުވެފައި -- ފޮޓޯ: އޭއެފްޕީ

ގެއްލިފައިވާ މީހުންނާއި މަރުވެފައިވާ މީހުންގެ އަދަދަކީ 10 ކަމަށް، އެކަމުގައި އުޅޭ ގްރޫޕުތަކުން ބުނި ނަމަވެސް ގިމިރް ވިދާޅުވި ގޮތުގައި ގެއްލިގެންނާއި މަރުވެގެން ރިޕޯޓް ކޮށްފައިވަނީ އަށް މީހުންނެވެ.

އެވަރެސްޓަަށް އަރަން އުޅުމުގެ ތެރޭގައި މަރުވި މީހުންގެ ތެރޭގައި އެމެރިކާ އާއި އޮސްޓްރޭލިއާ އާއި އަޔަލެންޑާއި އިނގިރޭސި ވިލާތް އަދި އިންޑިއާގެ ހަތަރު މީހަކު ހިމެނެ އެވެ. އެވަރެސްޓަށް އެރުމުގައި އެހީތެރިވާން އުޅުނު ނޭޕާލުގެ މީހަކު ވެސް ވަނީ މަރުވެފަ އެވެ.

އިނގިރޭސި ވިލާތުގެ 44 އަހަރުގެ ރޮބިން ހައިންސް ފިޝާ މަރުވީ އެވަރެސްޓުގެ ކޮޅަށް އެރުމަށް ފަހު ފައިބަން އުޅުމުގެ ތެރޭގަ އެވެ.